بسم الله الرحمن الرحيم


قصة أمل ومطلق قصة واقعية حزينه جدا



أنا "أمل"أبيكم تسمعون قصتي ومعاناتي من البدايه للنهايه بشرط تقرونها كلها عشان تعيشون قصتي

وأبي البنات يستفيدون من قصتي كثير ..

قاعده أكتب لكم قصتي ومعي ولدي ياسر عمره سنتين وقاعده اطالع عيونه وابكي لانه يذكرني بعيون أبوه إللي ماراح انساه طول عمري..

عيشو القصة أول باول

أنا"أمل"عمري 26سنه عندي أخو واحد وأختين وحدة أكبر مني وهي متزوجة "هدى"والثانيه بالمتوسطة وهي أصغر مني


بداية حياتي كان عندي مشكله لا والله .. كان بالنسبه لي كابوس خطير يطاردني اسمه "مطلق" .. هذا المخلوق الذي ناشب لي في حياتي ..


مشكلتي ما أظن لها حل مشكلتي مع ولد عمي"مطلق" بأن أهلي وأهله حاجزيني
له من يوم حنا صغار أبوي الله يسامحه عطى عمي كلمه من يوم عمري خمس سنوات
وقال : أمل ل"مطلق" .. اللهم لا أسألك رد القضاء ولكن اسألك اللطف فيه

وطبعاً "الحجز" وعاده عند بعض القبايل أن البنت يحجزونها لولد عمها لين تكبر وتتزوجه وطبعاً أنا الضحيه

حيروني لها الغول"مطلق" لا ياربي كل شي إلا "مطلق"

ياليتكم بس تعرفونه والله حفله ..

وجهه كنه افلام كرتون ..

سبحان من كون هالأنسان على بعضه والله من يشوفه الواحد يموت ضحك مدري كن مكتوب على وجهه نكته !..

أول ماتشوفه تطري عليك البوكيمونات !!..

كله على بعضه مسرحيه كومديه تبي تدور فيه شي حلو فيه ما تلقى مستحيل قلبتها يمين ويسار بس ما في فايدة مسكرة بوجهي بكل الطرق ..

يمكن القلم إللي يحطه بجيبه الأمامي حلو ..

صحيح يقولون (الرجال مخابر مو مناظر) ..

بس أنا أقول (الرجال مخابر مو من اصحاب المقابر) اللهم لا شماته !..

غير شكله الأسطوري ..

عندك اسلوبه وطريقة كلامه ما يدري وين ربي حاطه ..

ما يفهم حيل "مفهي" ما يدري وش السالفه !!..

مكتوب علامة تعجب فوق راسه لونها أحمر وتأشر !!..


غير كذا فاشل بدراسته وسقيط ياخذ السنه بسنتين وانسان مايعرف يتكشخ الكشخه يمين وهو شمال !..




المهم طولت سب بهالمسلم ..

المهم ما يناسبني حييل أنا وياه واقعين بالإتجاه المعاكس ..


ما كنت أتخيل نهاية دنيتي على وجه "مطلق" ..

ما كنت أتوقع اليوم إللي يجي فيه أهلي ويقلون لي خلاص زواجك بكرى "بمطلق" ..




ما كنت أتوقع أنا وياه راح نكون في بيت واحد!..

لا وغرفة وحدة لا وكمان سرير واحد ..

والخافي أعظم !..

لا ياربي خذ روحي ولا روحه لا مستحيل ..

أنا أجمل البنات أتزوج "مطلق" أشين الخلق ..

أنا في كامل اناقتي وفي ثوبي الأبيض وفي أسعد لحضات حياتي وجالسه في كوشتي ..

والتفت جنبي مين !.. "مطلق"




لا ويبتسم بعد أبتسامة عريضة مع اسنانه اللي كنهم صفة شطرنج !.. ويقرب مني ويمسك يدي !..

وأصرخ ..لا ..لا ..لا ~~

وفجأة تصحيني أمي من النوم : أمل بسم الله عليك وش فيك ?..

صحيت من النوم وأنا أبكي وتلفت يمين ويسار ..

وأحمد ربي أنه حلم ..

الحمد لله إنه مو يوم زواجي قمت من الفراش وجلست أبوس في الأرض وأبوس فراشي ..

أمي : بسم الله عليك بنتي وش فيك ??..

طرت طيران على أمي وضميتها وقلت : تكفين يمه .. تكفين .. مافيه مجال تغيرون رايكم .. مستحيل آخذ "مطلق" تكفين .. أقنعي أبوي !..

أمي : أسكتي لايسمعك أبوك .. والله ليذبحش (يذبحك) .. وش فيه "مطلق" على ألأقل محد ضحك عليه !!..

أمل : محد ضحك عليه ?!.. إلا أنا كل ماشفته مت من الضحك عليه !..




أمي : يا بنيتي .. بكرى زواجك على ولد عمك .. لا تضايقين روحك أستانسي وساعدي نفسك ..


أمل : بكرى !؟.. مستحيل ؟!..

يمه مو كنكم أجلتوه الأسبوع الجاي ??..




أمي : خبله أنتي ??.. إنتي تدرين أن يوم زواجك بكرى !..


أمل
: آه .. آه .. آه .. يمه أتمنى آخذ قدري من الحياة أطول وقت ممكن قبل
أقابل خشة "مطلق" من كثر ما آكل حبوب منومة عشان ما أفكر بديت أنسى !!..

جلست أمي تقرى قرآن علي والدموع على خدها لأن ما بيدها حيله .. الكلمه كلمة أبوي وابوي مستحيل يتراجع .. جلست لحالي أنا والهموم ..




بكرى زواجي!!..

معقولة !!..

أحس الموت قرب مني ..

بكرى زواجي وأنا أتعس إنسانه بالدنيا ..

شلون أهرب من الواقع المرير !..




قمت
من فراشي وفتحت درج صغير جنب سريري وطلعت البوم صور لي لما كنت صغيره ..
وفيه صوره لي أنا و"مطلق" يوم كنا صغار مع بعض !.. (بس لو أعرف منهو اللي
مصورنا مع بعض الله لا يعافيه)




ورجعت بذكرياتي لورى لما كان عمري خمس سنوات .. أيام الخطوبه (ههه على خمس سنين) .. وكنت دايم أتهاوش معاه (سبحان الله من يومي صغيره ما ادانيه) !..


بس هو كان يحبني وما يضربني وكان دايم يشتري لي حلويات !..

(يبي يكسب رضاي)




كانو بيت عمي قدامنا وبجنبهم بيت "أحمد" ..




"أحمد" حبي ألأول

"أحمد" الطفل المدلل بالحاره

كان عمره 6سنوات ..

دايم يتهاوش معه "مطلق" وصراعات مستمره بينهم طبعاً بسببي !!..

أنا بس العب مع "أحمد" ونتهاوش مع "مطلق"

مطلق كان يغار من "أحمد" ومره شافني طولت لعب معه .. سحبني بشعري بقوه وقال لي : أدخلي ولا أعلم أبوك ..




أمل : إنقلع مالك دخل ..




مطلق : أنا زوجك لازم تسمعين كلامي ..




تفشلت قدام "أحمد" ..

ورحت للبيت مسرعه لأمي وقلت لها عن كلام "مطلق"

ضحكت أمي وقالت : إييييه يا بنتي أنتي زوجته ولييييين تكبرون بنزوجكم ..




استغربت أنا وقلت : يمه بس أنا ما ادانيه شكله يضحك ..

أمي : ما عليك بكرى يكبر ويزين وتساوى خشته !..


~

من وقتها وأنا كل يوم تطلع فيه الشمس أركض لبيت عمي وأشوف "مطلق" هي تساوت خشته ولا لأ ?!..




بس ما فيه فايده كبر وكبرت خشته معاه ..

نسيت الموضوع ولا أحد جاب لي طاري

——-

كبرت ودخلت المتوسطه وكنا سن المراهقه .. (المراهقه)

وأتذكر يوم من الأيام ..

كنا أنا وبنات الفصل متجمعات وكان موضوعنا عن مواصفات زوج المستقبل !..

كل وحده قالت إللي عندها ويوم جاء دوري قلت أبيه زي "توم كروز"

هنا .. ضحكوا البنات وكان معنا بنات عمي بنفس الصف ..

وقالوا : لا يكون قصدك "مطلق" توم !!..

وجلسوا يضحكون ..

إستغربت أنا وش دخل "مطلق"

قالت وحده منهم : ليش ما تدرين أن ولد عمنا "مطلق" حاجزك له ومن تكبرون يزوجونكم ..

~

معقوله يكون صدق !!..

معقوله أصير مثل مصير أختي"هدى" إللي زوجوها أهلي لولد عمي بالغصب !..

طلعت من المدرسه والف سؤال في راسي ..

رحت للبيت بسرعه مشي لأنه قريب من المدرسه

يوم قربت من البيت .. إلا المح " أحمد" عند باب بيتهم جالس ..

يا الله من زمان ما شفت هالوجه إللي يفتح النفس ..

قرب مني والبسمه في وجهه




أحمد : سلام أموله وينك من زمان ما شفناك !.. ولاعشان كبرتي وصرتي تلبسين عبايه شفتي نفسك علينا ?..

أمل : لا والله يا أحمد بس اخوي يهاوشني يقول أنتي كبرتي عيب تلعبين معهم

فجأة
ودون سابق أنذار !!.. ما طالعت إلا الغبرة جايه من بعيد !؟.. إلا أبو
الشباب "مطلق" جاي مسرع وهو إللي يلبق نعوله عندنا .. طبعاً هو ما يعرف
يسولف ولا يتكلم إلا إذا فسخ نعوله !.. يقول آخذ راحتي بالكلام أكثر !!..

هذي معلومه بسيطه لا أكثر عن الفتى الأسطوري ..

المهم وهو اللي يسحب "أحمد" من عند رقبته ويقوله : وش عندك مع بنت عمي ?..

وأنا إللي أدفه وأقوله : عيب يا "مطلق" أحمد ما سوى شي ؟!..

مطلق : أقول هذي بعد كم سنه راح تصير زوجتي رح شف لك وحده ثانيه !..

أنا هنا عصبت .. وأنا إللي أعطيه كف على وجهه ..

دخلت مسرعه للبيت لأن كنت خايفه يجيني الرد على طول ..

بس الحمد لله ستر الله ..

رحت لأمي وسألتها : يمه وش سالفة "مطلق" ??..

وقلت لها وش صار بالمدرسه ووش قال مطلق بعد ..

قلت لها : لا يكون مخبين عني شي وانا ماني داريه ??..

هنا
أمي فهمتني السالفه وسالفة حجزي ل"مطلق" أنا صرخت : يمه .. لا .. مستحيل
مطلق !!.. لا .. لا يمه .. أكيد تمزحين .. أكيد مسويه معي صادوه !!..

قعدت أبكي بكاء هستيري ..

ضمتني
أمي وهي إللي تبكي معي أمي : يا حبيبتي هذا الكلام من زمان .. ما تدرين لو
أبوك يغير رايه فيه .. وبعدين توك صغيره إنسي يا حبيبتي ..

أمل
: وشو صغيره ?.. تبون تكبروني وتزينوني وتسمنوني وتهدوني له ?.. قولي يمه
من الحين إذا الكلام جد خليني أتلاحق عمري ما أبي أصير مثل مصير أختي "هدى"
!..

—–

مرت الأيام وشهور محد جاب لي طاري الكل مسكر على الموضوع ..

أنا كنت أشجع نفسي وأقول مستحيل يعني من سابع المستحيلات آخذه !..

جانا
خبر أن أهل "أحمد" أنتقلوا للخارج بسبب شغل أبوه ضلينا أنا وياه متصلين مع
بعض عبر الأيميل وكان دايم يطمني أنه راح يجي ويتزوجني !..

——————–

"مطلق" صار يسير علينا دايم ويجيب لي هدايا (غصب إلا يحببني فيه) صحيح يحبني ويموت فيني ..

بس القلب ما يبيه والعين ما تطيق شوفته ..

—————

صحيت من تفكيري العميق على صوت أمي وصورتي أنا و"مطلق" بيدي فتحت الباب لأمي ..

قالت لي : يا الله حبيبتي أستعدي الحين بتجي النقاشه وتنقشك ..

دخلت علي أختي "هدى" وشافت الحزن بعيوني ..

ضمتني وطالعت فيها وقلت : هدى كأن عندك بشرى ساره لي .. كني سمعت أنهم أفرجو عني !!.. سمعت أن "مطلق" أعتق رقبتي لوجه الله !..

أمي و"هدى" قعدو يطالعون لبعض يحسبون أني أنجنيت ؟!..

مسحت أختي "هدى" على راسي وقالت : ما تدرين يمكن تكوني اسعد انسانه شوفي شلون أنا سعيدة مع ولد عمي الحين مع أني كنت ما بيه ..

طالعت فيها وقلت : مصدقة أني بآخذه .. إيييه نجوم السماء أقرب له !!..

أختي قعدت تطالع فيني بدهشه !..

جتنا النقاشه ..

ورسمت رسمه حلوه على يديني ..

رفعت يديني فوق وجلست اطالع فيهم ..

تذكرت أول ما تنقشت في الثانويه كان عندنا حفل تخرجنا في المدرسه وأنا كنت مشاركه فيه ..

ذاك اليوم كنت مستانسه مره بس للأسف !..

رجعت للبيت وسمعت أتعس خبر بحياتي

~~~^^

جيت البيت إلا عندنا عمي وعياله ..

دخلت إلا أمي عندها مرة عمي وأختي .. قلبي عورني ..

دخلت غرفتي طوالي وقفلت على نفسي كأني كنت أهرب من شي !!..

صحيت المغرب على صوت باب غرفتي يدق ..

فتحت وعيوني نوم إلا أمي وأختي وهي إللي تخمني أمي وتبارك لي ..

قلت بستغراب : وشو يمه ????!!..

أمي : مبروك قبل شوي ملكنا لك على ولد عمك "مطلق"

! @! @! @ ! @ ! @ ! @ !

ماصحيت من صدمتي إلا وأنا في المستشفى ماتتصورون وش كثر أنقلبت حياتي فوق تحت ..

الدمعه ما جفت من عيوني مااطلع ولا أروح لحد ..

تخيلو أنتم بموقفي !!..

انسان ما أداني طاريه أروح وأتزوجه !!!..

تمر الأيام وأحس موتي قرب مرت فكره في بالي قلت مالي إلا أدق عليه وأفهمه أني ما أبيييييه .. ما أبيييه ..

أخذت الرقم من جوال أخوي ودقيت عليه في يوم من الأيام وجاني ذاك الصوت الجهوري مطلق : الوووووووو?..

أمل : السلام عليكم أخوي !..

مطلق : هلا من معي ?..

أمل : أنا أمل بنت عمك !؟..

مطلق بدهشه : يؤيؤيؤيؤ زوجتي ??..

ما مداني ملكت عليك تبين تكلميني !.. لهدرجه ماعندك صبر ..

وأنا
أقاطعه : أسمع يا "مطلق" ماني مطولتها معك أنت ولد عمي على عيني وراسي ..
بس وربي ما أفكر فيك كزوج .. إنت مثل أخوي .. ياخيي مابيك ماحبك أموت ولا
آخذك ..

كنت أنتظر رد قاسي منه ..

بس الولد ساكت !!..

وبعد سكوت طويل رد علي : اسمعي يا "أمل" إنتي ماتحبيني يمكن بس أنا أموت بترابك والله يا "امل" إنك عيوني .. أدري أنك مستحيه من الزواج بس والله يا "أمل" للحين ماعرفتني !..

أنا خاش لك مفاجآت في زواجنا !..

أمل : تستهبل أنت وخشتك ?.. وجهك أكبر مفاجأة !!.. قال مفاجآت قال !.. ياخي خل عندك كرامه وأتركني !..

رد علي وصوته غير : أمل اسألك بالله ليش ماتبيني ??.. لأني ماني حلو صح ??..

ما بغيت أصدمه حيل وأقول إيه ..

قلت : غير شكلك ياخي أنت فاشل في كل شي .. حنا ما نناسب بعض!.. وصدقني إذا خذيتني بنطلق ..

طوالي سكر السماعه بوجهي ..

الملعون ما خلاني أكمل !!..

——————–

بعدها بأيام ما صار يجينا "مطلق"

حتى أخوي استغرب عن سبب أنقطاعه ..

وحتى أهل الحاره ما صار أحد يشوفه ..

أنا هنا استانست ؟!..

قلت : أكيد أن خطتي نجحت وكرهني وبيتركني ..

المهم جاء ذاك اليوم إللي الاقي فيه رساله بجوالي من رقم "مطلق"

كاتب فيها : أوعدك يا "أمل" إني راح أتغير وراح اسوي المستحيل عشان أرفع راسك .. وراح تشوفيني بعينك

حبيبك المخلص : مطلق

~

حبتك القرادة هذا ما أيس مني وش ناوي يسوي ?..

مضت سنه كاملة و"مطلق" لا حس ولا خبر ..

حتى جاء اليوم إللي قالوا فيه أن "مطلق" أخذ من العشره الاوائل على المملكه ..

الكل تفاجأ وانصدم ?..

بعدها بشهور جانا خبر أنه تم قبوله بكلية الطيران أنا هنا فطست ضحك ما أتخيل شكله ..

حسبتها مزحه بس طلع الكلام جد !..

بعد شهر جتني مكالمه على جوالي منه جاني صوته حزين حيل ..

مطلق
: اسمعي "أمل" أنا مابي منك أي كلمه .. بس حبيت أقولك بكرى بسافر للخارج
بكمل دراستي وراح أرجع وأنا طيار أنشاء الله كل هذا قسم بالله لعيونك يا
"أمل" لعيونك لأنك صدمتيني حيل يوم قلتي أني فاشل !..

"أمل" مستحيل أعيش بدونك تكفين أنتظري رجعتي

~~

جيت بقاطعه بقوله لو وش ماسويت مابيك لو رجعت ملك مابيك ..

قالي : مابي منك أي رد أحبك ..

سكر السماعه بوجهي

——————–

سافر أبو الشباب للخارج وأهله يبكون على فراقه وأنا أبكي على رداءة حظي ..

وأنا أنتظر هالغول متى يرجع هو وطيارته !..

مضت سنين وسنين وأنا أكبر وهمي يكبر ..

طول هالفترة وأنا أتخيل شكله وهو راجع قلت يمكن يتغير وجهه هناك ..

مضت أربع سنوات وقربت رجعته للبلد ..

أنا شديت حيلي بالدراسه عشان أنسى همي ..

——————–

جاء ذاك اليوم إللي وصلت فيه طيارته للبلد عند عمي عشى بمناسبة تخرجه طيار والكل ينتظر "مطلق" ..

أنا هنا كلي آمال أني أشوف واحد ثاني ..

قلت يمكن أشوف قدامي "براد بيت" ولا "توم كروز" !!..

بشوف كيف صار هالطيار !!..

وأنا إللي اطل من الدريشه بشوف خشته يمكن تساوت هناك ?..

وقفت
السياره الكشخه عند باب عمي وينزل منها ذاك المسكب بشماغ وأنا إللي يخفق
قلبي .. ويلف وجهه على بيتنا آلا هذي هي خشته ما تغيرت .. لا وكبرانه بعد
!..

دخل وسلم على أمي وأهلي جتني أمي تقول : "مطلق" يبي يشوفك ويسلم عليك ..

قلت لها : يخسي .. ماعندنا بنات ينشافون قبل الزفه !..

أمي : عيب عليك هذا زوجك أمشي لا تفشلينا مع الطيار ..

جت فكره في بالي ¥¥ وأنا أروح أتغطى وأدخل عليه وأمي معي وجلسنا بالمجلس وسكرت علينا الباب أمي وراحت ..

أنا خفت ورحت انخشيت ورى الكرسي ..

يمه شفته قرب لي ..

صرخت
وقلت : تكفى أنا مثل أختك تكفى يا "مطلق" أعتق صراحي أنت الف بنت تتمناك
مشاء الله مزيون (من جنبها) وكشخه وطيار .. حتى بنات عمي ميتين عليك
"عاليه" و "سعاد" بس أنا قلت لهم : بشاوره وأرد لكم ..

تكفى ياولد عمي وش قلت ??..

حط الهدايا على الأرض وعلامات الحزن على وجهه ..

جاء بيطلع مسرع ..

وأنا إللي أركض وراه وأنزل تحت عند رجوله ابي ابوسهم وأتوسل له يتركني ..

كنت أبكي بحرقه وأنا أقول : تكفى يا ولد العم أتركني ..

وهو
إللي يرفعني من على الأرض والدموع تملى عيونه ويقول بصوت خانقته العبره :
تكفين يا بنت عمي لا تبوسين رجولي .. إنتي "أمل" .. مكانك فوق الراس .. مو
تحت .. لو تبين روحي أعطيك ياها بس إلا هالطلب يا "أمل" وهو إللي يبوس على
راسي يطلع برى مسرع ..

——————–

رحت لغرفتي وأنا أتذكر شكل "مطلق"وهو يبكي ..

معقوله كل هذا يحبني !!..

بصراحه أنا صدمته حيل ..

بس شسوي ما أبيييه ما أبيييه !!..

صحيح
هو تغير حيل والكل لاحظ صاير على قولتهم جنتل مان .. وكشخه وكل العيال
يتعلمون منه وصاير لبق بالكلام ومثقف بزياده والكل يضرب له حساب بس ياربي
شسوي ما أحبه ..

حاولت أني أحبه بس ما قدرت !.. (يمكن لأني ماخذه المسأله عناد من يومي صغيره !??)

——————–

أنا حسبت أنه بعد موقفي راح يكرهني ويتركني بس للأسف !!..

بعدها جاني أتعس خبر سمعته !!..

جاني الخبر أنه حدد زواجنا بعد شهر !..

وش قصده شكله بنتقم مني @@!..

لا أخاف الدعوه شكلها عناد !!..

قسم بالله ألف فكره جت في بالي عشان أنحاش من واقعي بس للأسف ماقدرت وصار إللي صار

——————–

صحيت من تفكيري على صوت أمي ..

قربت مني ومسحت دموعي إللي على خدي ..

أمي : نامي حبيبتي بكرى وراك روحه للكوافيره بدري أنتي عروس لازم تريحين ..

~~~

عروس !!??..

لا والله كنكم موديني للمقبره حاولت أنام بس ماقدرت ودموعي ماوقفت ..

جاء الصباح ودخلو علي أخواتي يبون نروح للكوافيره أنا هنا كني بحلم ساكته وما أتكلم بس دموعي تنزل ..

طلعت من الكوافيره وكنت في غاية الجمال ..

كنت اطالع نفسي وأقول ياحسافتي على خشة "مطلق" طبعاً رفضت اسوي زفه أنا وياه عشان محد يضحك عليه وأتفشل !..

جت اللحظه الحاسمه ..

زفتي عليه في القفص الذهبي مدري وش فيني جتني رجافه وأم الركب وقعدت أبكي وأصيح تكفون رجعوني !!..

أمي وأختي قعدو يهدوني أخوي طلع يبكي ..

أبوي جاء وباس على راسي وقال : الله يوفقك ..

طالعت فيه وقلت : الله يسامحك ..

طلع ابوي والحزن بوجهه ..

كنت ماسكه يدين أمي بقوه وأرجف ..

كنت أنتظر أخوف منظر بحياتي أنتظر لحظة دخوله علي

~~

دخل علي وأول مالمحت كشرته حامت علي كبدي ..

قربت من أمي وقلت : يمه .. لا تتركيني له ..

جاء وسلم على أمي ومدري وش قالها ؟!..

وطلعت أنا بغيت أنجن يوم شفتها طلعت ..

وقعدت أصوت : وين يمه ??..

طالع فيني وهو يضحك وقال لي : أمك راحت خلاص .. إنتي لي ..

طالعت فيه بحقد وقلت : تنكت أنت ??.. رح نادها بسرعه أبيها ..

قعد يضحك مره ثانيه وقال : يا حلو العروس المستحيه ??..

وأنا أتلفت يمين ويسار أدور العروس المستحيه وأقول بدهشه : مصدق عمرك أنت ?.. رح ناد أمي ما طالعت إلا قفل الباب وهو مبتسم ..

سحب المفتاح وقلت الحين يبلعه وأول ماشفت الوضع كذا وانا أتلفت بدور لي شي بضربه براس قبل لا يقرب ..

وأول ما شفته قرب وأنا أصرخ : أرجع موبحسن لك إذا قربت !..

وإللي قاهرني أنه فاطس ضحك يحسبني أمزح معه !..

فجأة شال شماغه ونزل بشته ..

قلت في نفسي : إذا نزل ثوبه والله لصكه بالمزهريه !!..

جلس على الكنبه وهو يطالع فيني وعيونه تبي تاكلني !..

وأنا شكلي يضحك واقفه بالزاويه وأرتجف ..

@@

طالع فيني وقال : تعالي طيب اجلسي هنا والله ما راح أقرب لك ..

رفضت وضليت جالسه بزاويه ..

قال لي وهو يضحك : إلا متى وأنتي كذا ??!..

ضلينا على هالحال لمدة ساعه كامله وهو ما نزل عينه عني يطالعني بنظرات كانت كلها حب !!..

قام وقرب مني ..

وأول
ما قرب حطيت يدي على وجهي وطلعت ذاك الكلام إللي كنت شايلته لليلة الزفه
وأنا أقول : أنا ماحبك انا مابيك والله خذيتك غصبن علي والله بغيت أنتحر بس
عشان ما أتزوجك ..

مافيه كلمة سب وهجاء ما قلتها بعد ماتعبت وسكت ..

طالعت فيه إلا هو منزل عيونه بالأرض ..

رفع راسه وكانت نظراته مليانه حزن ..

قال لي : أمل .. تدرين أنك أجمل أنسانه بهالكون ??!!..

قرب مني ..

قلت : الحين يضربني .. باس على راسي وطلع برى الغرفه ما دري حسيت أني وحش وقتها بس والله غصبن علي ما أبيه ..

جو أمي وأخواتي عندي ..

ضمتني أختي "هدى" وقالت : أنشاء الله عجبك أشوفه حيل مستانس ويقول لأبوي وأخوي أنكم جلستوا تسولفون وتضحكون !..

استغربت !!..

بصراحه خفت أنه يعلم ابوي بكلامي ..

بس الحمد لله ستر علي ..

ضلينا على هالحال لمدة طويله مانقرب لبعض ..

إذا نمت بسرير نام هو على الكنبه بصاله ..

وإذا شفته نايم على السرير قبلي .. رحت ونمت بصاله .. وأتفاجاء في الصباح إلا أنا علي السرير وهو بصاله !..

كانت الفله إللي اسكن فيها من أجمل فلل المنطقة ..

وعندي طباخه وخدامه وسواق بيت كامل متكامل زي البيت إللي كنت أحلم فيه .. بس للاسف كان ينقصه الحب المتبادل !!..

كنت أتحاشى الكلام معاه وهو حب يخليني على راحتي بس كان هو مايسكت يسولف وينكت وقصص ما تنتهي ..

كنت بس اسمعه من دون ما أناقشه .. كانت سوالفه تجذبني .. بس أنا أبين له العكس ..

نظرات عيونه كانت تضعفني شوي ..

بصراحه تصرفاته جدا رائعه على عكس ماتوقعته !..

كل صباح أصحى فيه من النوم الاقي هديه على سريري منه !.. هدايا فخمه مره أبن الحلال ماقصر معي بشي !..

بس قلبي هو إللي قصر !..

——————–

سافرنا
شهر العسل للخارج "اسبانيا" من يوم أنا صغيره كنت أحلم فيها .. ما فيه
مكان مارحنا له .. كل إللي في بالي شريته وهو يدفع وهو مبسوط !..

كان طول الوقت ماسكني ما حب يفارق يدي لحظه وحده !..

ضلينا شهر هناك وبعدين رجعنا لأرض الوطن ..

الكل يمثل قدام اهله انه سعيد وبالأخص هو !..

———

جاء ذاك اليوم الغريب !!.. إللي دق فيه جوال "مطلق" ..

كنت ماره من جنب الغرفه وانا اسمعه يتكلم بصوت عالي ويصارخ !..

والمفاجأة كان يكلم بنت !..

واسمعه يقول : خلاص يا "نوال" انسيني !..

@~@

أنا هنا ماني مستوعبه !..

منهي المقروده إللي تكلمه !!..

حسيت عيوني حمرت معقوله تكون غيره ??!!!..

لا لا ما أظن ..

طلع
هو قال لي بيروح لصاحبه ونسى جواله .. وأجي والاقي في جواله أكثر من خمسين
مكالمه ورسايل حب وغرام وعتب كانت من رقم غريب على ما أظن من البنت نفسها
!..

جواله ما يسكت مكالمات ماحبيت اسأله لان ما يهمني في يوم من الأيام كنا جالسين بصاله وكان معاه اللاب توب جالس يستخدمه ..

دق جواله وقال لي : إنه العمل طالبينه فورا !!..

نسى اللاب توب مفتوح وأنا أقوم واجلس عليه والاقي إيميله مفتوح ..

كان معاه بالايميل بنات كثير

@@

قريت الرسايل في الوارد كانت كلها بنات يعتبون عليه وعلى غيبته والاقي رساله من وحده اسمها "نوال" ..

كانت رسالتها حزينه ..

وكاتبه فيها : يا مطلق راح أسوي المستحيل عشان ترجع لي
وبس :ert45yg4h:
اتمني ان تردون ع موضوعي :منلبمنل:
بـــــــــــــــــــــاي :jhu877t7:

ييييييييوه كملي مررة حلوة

واااااااااااااو روعه اكملي بلييييز

بليييييييييز كملي لو سمحتي


حدي متحمسه

روووووووووووووووووووووعه
ابداااااااااااااااااااااع + ابدااااع
بس اهي صج طويله بس مرهه حلوه