السلام عليكم ورحمة الله وبركاته

جآء خطبني ك أي شاب جاء يخطب
اهله كلموا اهلي
سألنا عنه وافقت تحدد الموعد المحدد وتزوجت ..
انتهيت وبدت قصة عنآآي !



كنت اشوف زوجي شآآرد ذهنه يسرح كثير ..اذا كلمته يتأخر حتى يرد علي


والا يقول : هاه !!

خمنت ان ورى زوجي سالفه ماهي بسيطه يعاملني عادي جدا
مره من المرات كان كالعاده مستلقي وشارد ذهنه ...
ناداني قال : ميعاد
طالعت فيه قلت : ميعاد ؟ من ميعاد !!!
قال : هاه لالا ولاشي
وحاول يغير السالفه وانا الدم الي بعروقي نشف هذا الي كنت خايفه منه زوجي بحياته انسانه غيري !
طيب وانا وش خانتي بحياته ليه تزوجني ؟!
كانت اسأله كثيرة تدور براسي
خليته لين جاء باليل جات عيني بعينه وعلى طول دموعي نزلت سألته :ليش تخوني ؟
قال : سالفه طويله وانتي الحين صرتي زوجتي ومالك بالماضي وقفلي ع الموضوع
قلت : طيب ماضيك مالي فيه لاكن لاتخوني ترى اكثر شي يوجع المره ويجرحها من زوجها الخيانه !
مارد
كتبت له مسج :
إلى نصفي الثاني
كان وقع طعنتك عليّ مؤلم جداً
وعمق جُرحك ب صدري موجعاً جداً !
و رغم ذلك مدت يدي لك ليس إحتياجاً أو ضعفاً ،
بل لأني أدرك ماذا تعني كلمة [ العفو عند المقدرة ]



طنشت السالفه وتناسيتها بمزاجي والا انا مانسيتها


بعدها بفتره كان طالع بالصاله مو جايه نوم حسيت فيه استنيته طلع وبعدها بربع ساعه تسحبت وطلعت واسمعه يكلم كان يقول:




والله ياميعاد شيبت وانا بعز شبابي لو تشوفين شعري شيب من الهم
ميعاد انا احبك وابيك وابي اتزوجك ..انتي عارفه ان زوجتي تزوجتها عشان انسى بنت خالي
ويوم حبيتك نسيت بنت خالي ونسيت زوجتي ابيك انتي !!


كنت مصدومه اسمع وكأني في عالم ثاني طيب ليه يازوجي تسوي فيني كذا انا استاهل منك كذا!!!


رحت لميت كل عفشي ورحت له قلت منت مجبور تحبني ولامجبور تعيشني معاك وانت ماتحبني

بس الظلم انك تعذبني وكأن ماعندي احاسيس ولامشاعر وربي لوكنت اعرف ان بحياتك انسانه ماكان خذتك
ترى الزم ماعلى الوحده كرامتها وانا بحفظ الي بقى لي من كرامه معك واروح ..






قال : لحظه خلينا نتفاهم خلاص بسوي الي تبينه بس لاتروحين
قلت : والي داخلي كسرته كيف يتصلح ؟!


سامحتُكَ علَى كُل شَيئ ،
و غفرتُ لكَ أن تكُون كَاذِب ، جاحد أو حتّى بخِيل فِي مشاعرك تجاهِي ..
كُنتُ لكَ وحدكَ ! رغم ذلك قبلتُ أن تشاركنِي بكَ نِصف الدنيا ،
إلا [ الخيَانة ] !

منذُ أن وصلنِي نبأهَا و أنَا ألعَن قلبِي حينَ يحاول مسامحتكَ بها ،
و أعجَز عَن تقبّل صدمَة ضِيق عَين روحكَ ..
ربّمَا لأن عَين عمري كَانت قَد إمتلَأتْ بِكَ وكنتُ أظنّ أنّكَ مثلِي !
لَا أن أكُون فِي إحدَى يديكَ بينمَا تبحث اليد الأخرَى عَن غيري ..
سامحتُكَ علَى كُل شَيئ ،
إلاّ أمر إستغفَال قلبِي ! ليسَ بيدِي أن أسامحكَ عليه ،
أو أَن لَا أشعُر بعده أنّك غرِيب عنّي ..

جاء اخوي واخذني وكنت حامل بالشهر الرابع تقريبا ..
صارت احداث كثيره بختصرها اني رجعت عشان الي فبطني
ومره من المرات كنا قاعدين نتناقش فالاسم :
قال اتمنى يجينا بنت
قلت ليه
قال انا ابغى اسميها ميعاد
(واكيد كلكم تعرفون الحين من صارت ه الميعاد بحياة زوجي )
قلت : مستحيل
والله ماتسميها لو تموت ماتسميها ميعاد
قال والله مو بكيفك غير اسميها ميعاد
قلت طيب
وصرت افرش سجادتي وادعي انه مايجيني بنت قلت يارب ارزقني ولد
ويوم ولدت جاني ولد
فرحت من كل قلبي لانه مارح يقدر يسمي ميعاد
جاني قال بنسمي ريان
قلت اوكي حلو وسميناه
عادي انشغلت انا مع ولدي وصرت اشوفه كل الدنيا
واشغلني حتى عن اني انبش ورى زوجي بس مره ذبحن الفضول يوم رجع خليته الين دخل الحمام الله يكرمكم
وشفت جهازه وقلت بفتحه فتحته كنت عارفه رمز الحمايه من كثر ماتخاصمنا عطاني الرمز حق القفل يوم افتح
الرسايل مالقيت شي
فتحت التقويم والقى رسايل من ميعاد بغيت انجلط
تخيلو
هي سمت ولدي
لقيت رساله منها
مكتوب عادي تسمي ريان ؟
وحصلت رساله من زوجي كلها حاطها بالتقويم
كاتب لها :
كنت اتمنى يجيني بنت اسميها على اسمك عشان اسمي يرتبط مع اسمك الين اموت
بس جاني ولد وسميه انتي ..
كان حاط الخلفيه صورة يد وحده لابسه عبايه عرفت انها يدها
لانه فتح الباب وانا ماسكه الجوال
سويت نفسي ماخفت ولاشي قلت له : وبعد حاط يدها خلفيه ؟؟ هذا الي ناقص
قال : حطي الجوال
قلت :لا بمسحها
قال : والله لو مسحتيها لامسح روحك
آآآآآآآآآآآه ناظرته وقلت للدرجه هذي:
شَدّ حِيَلكْ فَيّ " جِرّوحيُ ~
. . . خَلْ هَذآ الجَرحُ | يَكبرّ ..
إجَتهدّ ؛. . . عَذّبَ ليّ رَوحيّ . . !
طِيحّ
. . . مَنّ هَ العَينْ اكَثرّ ’
قلت له : طلقني وروح تزوجها انا تعبت معاك ياولد الناس عذبتني حرام عليك
قسم بالله لايصير فيني شي تراك انت السبب
قال : حرام لاتظلمين ميعاد تراها طيبه
وترى هي بنت رجال وقفت معاي وقفات مانساها لها
تذكرين يوم رحتي بيت اهلك وانتي حامل
كنت مابرجعك بس ميعاد كلمتني تبكي ترجتني تقول لاتطلقها واذا طلقتها ماعرفك ولاتعرفني انا وجودي غلط بينكم
انا الي انسحب مو زوجتك
وانا اسمع له وجروحي تنزف
وهو يحكيني ودموعه على خده
يقول أسرتني بطيبتها يوم جيت ارجعك ماكان فجيبي ريال واحد قالت ميعاد
تعال انا عندي الفين حاطتهم من زمان ماحتاجهم الحين خذهم وروح تمشى مع زوجتك وغيروا جو ومسامحتك دنيا وآخره
وانساني وعيش حياتك مع زوجتك ..
كمل واحس كل كلمه خنجر يزرعه بظهري قال حبيتها وهي الحين ماتبيني قالت عش حياتك مع زوجتك ولدك ..
أخذ شماغه ومفتاح السيارة وطلع وقلبي ينزف وعيوني تدمع ولسان حالي يردد :


لا تروح !
هات لي هذي الجروح . .
ادري ماتغلا علي !
: ولاسف تغلى . . عليهم !
هات جرحك
خله لي . .
انا متعوده . . ( طعون )
لاني اصلا من عرفتك
وانا ادري بك
( تخون )

.......
جلست افكر ودموعي تنزل ع خدي مثل الجمر ..تحملته بمافيه الكفايه

حتى اهلي يوم كنت ازعل واروح عمرهم ماعلمتهم بس عشان صورة زوجي

ماتهتز قدامهم جلست اطالع فولدي واضمه وابكي ..يالله حتى ولدي هي الي سمته
وانا الي كنت على نياتي قلت اكيد عاجبه الاسم
...
رجع زوجي باليل كنت بالغرفه ناداني بالصاله عشان ولدي كان نايم
رحت له
قال : خلينا نفتح صفحه جديده
قلت انت طويت كل صفحات عمري انت ربطت ميعاد معي للقبر
انت انسان حقير قلبك ماهو قلب انت تعيش بصخر جلمود داخلك
وياحسافه على كل شي عطيتك ...
فجأه دق جواله ناظرته قلت رد
واذا انت رجال رد وخلني اكلمها
رديت عليها : قلت لها ارتاحي انا طالعه من حياته للابد
اشبعي فيه انتي وياه حقيرين وتنفعون لبعض
انا رايحه اعيش في بيت اهلي فيني جروح تكفيني عمر منكم
مارح اسامحك لانتي ولاهو ..
ولاتفرحين دامه خاني عشانك بيخونك عشان غيرك واوعدك ..
رميت له الجوال قبل حتى ماسمعها اش قالت
قال لها :يالله ميعاد بعدين اكلمك
ناظرته بكل احتقار ..وطلعت غرفتي ابي اخذ شنطتي جاء عندي
قال: تكفين لاتروحين
قلت : خلاص انا انتهيت وانا تعبت منك ومنها
قال اجلسي طيب لبكرة احنا الحين اخر اليل
وانا بكرة اوديك قلت طيب عطيته ورقه كنت كاتبتها له ورحت غرفتي انام
َتعبتُ ، فِي نهايَة الأمر .. أَنَا [ بشَر ]
مهمَا كَانت قُوّتِي وشِدّة تحملّي أمامكَ !
............... ما خطبِي ؟ لكَي ترفضنِي هكذَا كلّمَا أخضعتُ لَكَ قلبِي
ولِمَ كُنتُ أقدّم لَكَ كُل ما أملكه مِنَ المشاعِر ،
......... بينمَا تَزِن أنتَ كُل مَا تعطِينيه مِن أحاسيسكَ !
وأدركَ أنّك آخِر مَن قَد يستوعِب ألمِي حين يقرأنِي
رسائلِي لَا تصِل إليكَ ، ودمُوعِي لَا تصِل إليكَ ، ودعوَاتِي لَا تصِل إليكَ
و آهَاتِي لَا تصِل إليكَ ، و إنتحَابَاتِي لَا تصِل إليكَ ..
................ وَلا شَيئ .. لَا شَيء يخصنّي قَد يهمّكَ
تسخَر منّي الدّنيَا الآن ،
و تخرِج أمَامِي لسانهَا إستهزَاءً بِأنّي قَد أحبتكَ أنتَ ,
........................... بينمَا كُنتَ تعبَثَ بأضلعِي !
الفرق بيني وبينكَ /
هُو أني كبّرتُ حجمكَ ب سذاجة بداخلِي ، بينمَا إتّضح ليَ صِغر حجمِي بكَ مؤخرًا !
أعطيتك الفرصَة تلو الفرصَة لإثبَات كونك تستحقني ، ولكنك كنتَ تكسرنِي كُل مرّة .. .
وما عاد يهمّك الآن أمر جبرِي ..
حزينة لأجلكَ ‘
أضعتنِي و أنت تدرِك تمامًا ماهيّة حبّي لك التّي كانت ،
لا تعنِيني الآن ولَن تعنِيني أبدًا ،
شكرًا لَكَ فقط , كَان بإستطاعتكَ أن تسعدنِي ولكنك تعمّدتَ أن تضرب الرّوح ب فأس خيانتك دائمًا
.............
اليوم الثاني جاء زوجي يصحيني ماصحيت حاول ماصحيت كلم الاسعاف وجوا
اخذوني كنت بغيبوبه محد عارف ليش جلست شهر كامل وانا بالعنايه المركزة لافتح ولاتكلم ولادري عن الي حولي
وربي رحمني من التفكير بميعاد وبخيانات زوجي
اهلي يسألون زوجي وش فيها قال : وربي مادري راحت تنام ويوم جيت اصحيها ماصحيت
الدكاترة : اكدوا انه انفجر عرق وصار لي نزيف مما دخلني بغيبوبه شهر كامل
تدرون ليه انفجر ..!!
كنت اكتم بقلبي كنت آكل بنفسي كنت اقهر وابكي حتى ماقول لاهلي عن مشاكلي كنت اسكت واسكت واسكت لحد مانفجر فيني عرق ودخلت غيبوبه
الدكاتره قالوا : نامت وهي متضايقه ؟
زوجي استحى يرد عليهم وش يقول من يوم أخذتها وانا اصبحها بهم وامسيها بهم
كان درس لزوجي وصفعه تصحيه
كانت غيبوبتي هذي فيها رجعه لي للحياه وكتب لي ربي عمر ثاني
صحيت بعد شهر كامل يوم صحيت حصلت زوجي واقف عندي
مر علي شريط حياتي معاه كرهته ذيك الحظه لفيت ع الجهه الثانيه
قال : الحمدلله ع سلامتك
قلت : ابي حضن امي ابي احضنها وانسى كل همومي محد يحبني كثرها
قال : امك طلعت قبل شوي وقلت لها تروح ترتاح وانا جلست
سكت لاني كنت جد تعبانه
طلعت من الستشفى بعدها ورحت على بيت اهلي ..
كلمني زوجي قال: متى اجي اخذك
قلت : لاكملت خيانتك .. لاعاهدت نفسك ماعاد تشقيني انا وريان بانتظارك ...
//
\\
//
\\

رجع لي بعد شهر وجهه شاحب ولونه باهت وشعره كساه الشيب
شفته كسر خاطري نسيت كل الي سواه فيني فما زلت انا انثى البياض
رجعني ورجعت اعترف انه تغير معاي كثير صار يحبني اكثر صار قريب اكثر صار يهتم فيني اكثر
تأكدت انه قطع علاقته معاها نهائي
بس ... مازال احيان يغلط ويناديني : ميعاد
مازال مصر لاجانا بنت يسميها ميعاد
ومازالت جروحي تنزف ..

عشت قرابة السنه حياتي الزوجيه شبه هادئه ماكنت اعرف انه الهدوء الي يسبق العاصفه
كبر ريان شوي صار هو كل حياتي حسيت انه احلى شي بحياتي من يوم تزوجت
مره كنا جالسين انا وزوجي بعد مانام ريان باليل ..
حسيت فيه شي لانه كل شوي يناظرني استغربت نظراته ..
طالعني قال : لو اكتشفتي في يوم اني كذبت عليك بشي تسامحيني
طالعت فيه ": قلت لا
قال ليه
قلت لان شوارعك كلها مليانه عتب ومافي موطأ قدم اني اسامحك لاخطيت مره ثانيه
سكت وطالعت فيه لقيته سرح
قلت له : شوف انا ماسامحتك عشان باقي احبك لا انا عشان ريان سامحتك وانا عشان ريان بأعيش
والا انت من زمان مت بداخلي
ناظرني قال : ذاك اليوم يوم تنومتي بالمستشفى انتي نمتي متضايقه
قلت : انا من يوم اكتشفت وش انا بحياتك وانا كل يوم انام متضايقه
بس ذاك اليوم كان العيار ثقيل شوي وانت عارف اش صار بذيك اليله مايحتاج اذكرك
قال ايه مايحتاج ادري
ناظرني قال : تحبيني ؟
قلت : لو كنت سألتني هالسؤال اول ماتزوجتك كان قلت لو انك تطلب عيوني بقول ان العمى خيره
بس الحين لا ماحبك
سكت وغصب عني نزلت دموعي قلت :
محمد انت موبس خنتني ولابس جرحتني ولابس ظلمتني انت ذبحتني مير الله كتب لي عمر اعيشه
واتمنى ماندم على اني رجعت سلمتك عمري الثاني
ابتسم لي ابتسامه مافهمت معناها
بس تأكدت انه هالانسان مات بداخلي ..
بعد 8 شهور كنت حامل بطفلي الثاني ..بالشهر السابع .. كنت تعبانه كثير بحملي الثاني
جاني مره زوجي قال : امم خلاص هالمره انتي سمي حتى لو جات بنت انتي سميها
قلت : اكيد اجل بخليك انت تسمي
قال طيب
يعني الموضوع بالنسبه لك منتهي ؟
قلت : ايه ع بالك بكون غبيه للمره الثانيه
ضحك وطلع
؟؟؟؟؟؟؟؟؟؟؟؟؟؟؟
بعدها بأسبوع كان يوم خميس طلع ع صلاة العشاء والساعه 9 ونص جاء وفتح الباب
دخل وانا اناظر فيه مو مصدقه وصرت امسك ظهري من قوة الالم زوجي لابس البشت الاسود
قال : مها انا اليوم زواجي جيت اسلم عليكم قبل اروح
بآخذ عروستي من القاعه وبسافر اسبوعين وراجع ..
وقتها دنقت راسي حزن حسيت بشتاتي وقتها حسيت نفسي طفل اهله بايعينه
تدرون دمعة وحده مانزلت مني ضحكت فوجهه قلت
قسم بالله
قسم بالله
ماكنك مودّعني
ولا بتطيح ابد دمعه
ولا قلبي بيوجعني
عساك تروح ماترجع
وبقولك شي واسمعني 0 ( كذا تسمع؟ )
يمين الله
يمين الله
على مثلك ابد مادمع !!
حاولت اكون قويه وانا بموت من الالم وحسيت ظهري يألمني بقوة
جلست ع ركبي
قال : اذا بتروحين لاهلك كلمي اخوك وروحي لحد مارجع

قلت :
ي سَنينيَ!
............ وشَ كثر ضحّيت لَأجلَه !
وِفَ النِهايْة
........... ضحّى ... فينيْ !
آآآآآه ياعمري حسافه . .
قلت روحي :
وهاك شوية جروحي
واعذريني حيل والله
على قلة الكلافه ..!

حاولت اتمسك بالكرسي واوقف لاني كنت تعبانه حيل
قلت اسمعني قبل لاتروح تحرم علي يامحمد بعد اليوم
وانا فعلا رايحه بس لاتنتظر مني ارجع لو اشوفك ميت قدامي
ودامك تزوجت خلاص بعد عن حياتي وعيش حياتك بعيد عني وعن اطفالي

ناظر ساعته قال : اوه تأخرت مع السلامه

قفل الباب وانا اقسم بالله اتوجع واتألم وحسيت اني بموت وماقدرت اتحمل كلمت اخوي قلت له تعبانه
تعال ودني المستشفى
جاء اخوي وكنت في حاله مايعلم فيها الا ربي
وكنت طول الوقت استغفر واقول يارب هون علي يارب ارحم ضعفي يارب احفظ جنيني يارب ان كان محمد ظلمني
فخذ حقي وانا اشوف يارب حملني من الظلم شي ماطقته ..يارب انت وحدك ملاذي وكنت ابكي ودموعي زي المطر عجزت اروضها
وصلت المستشفى وكشفت علي الدكتورة وقالت المشيمة كانت صغيرة وموية الراس كانت ناقصة عشان كذا الجنين ما كان عارف يتحرك وكان يسبب لي آلام وقالت اني لازم أاطلع ع التنويم
جاني دكتور وفحص دقات قلب البيبي وكانت للأسف ضعيفة وذلك بحكم انه مو عارف يتنفس لأنه موية الراس عنده مو كفاية..
منعوني من الحركه وبعد يومين رجعوا كشفوا لان كان عندهم امل ينتعش الجنين وماحتاج لولاده مبكرة بعد ساعه رجعوا فحصوا دقات قلب الجنين ولأسف ما كان في أي تغيربعدين جات الدكتورة اتكلمت معي وقالت انه البيبي لازم يطلع من بطني لأنه مو عارف ياخذ نفس
وقالوا اني لازم أعمل فورا عملية قيصرية قبل ما يصير شي للبي لا سمح الله

وصاروا يسألون عن ولي امري يبونه يوقع ع العمليه
قلت : مالي ولي الا الله انا اتحمل كامل المسؤليه لاصار لي شي ..زوجي عريس
عضيت ع شفايفي حسره والم قلت : ايه ياخالد زواج محمد كان قبل امس
ضرب اخوي بيده ع الجدار قال : حقير
بعد ماطلعت ذاك اليوم من المستشفى حكيت اخوي كامل السالفه مع زوجي
وقعت واتخذوا الاجراءات بشكل سريع وطلعوني ولبسوني لبس العمليه وكان اخوي وريان معاي فالممر
ناظرني اخوي ودمعت عينه : قال تقومين بالسلامه شدي حيلك عشان القمور هذا والي جاي بالطريق
ناظرته قلت : امانه ياخالد اذا صار لي شي ولدي امانه عندكم لاتخلون محمد ياخذه امانه لاتخلون ميعاد تربيه
امانه لاتحرقون قلبي اذامت قولوا لمحمد تراني زعلانه عليه وماني مسامحته ..
كان ريان مع خاله ويناظرني ويبكي يبي يجي عندي يقول :ماما ماما
ولدت وجبت ولد قمر زي ريان ...
سميته راكان وقعد في الخداج لمدة شهر
.. وطلعت بيت اهلي .. واهلي
طبعا بعد ماعرفوا بزواج زوجي قالوا ماترجعين له ...وانا كنت اساسا مستحيل ارجع له بعد كل شي صار
رجع زوجي من شهر العسل ...جاء ياخذني
مارضيت اقابله وقلت لاخوي يبلغه اني ابغى الطلاق ومابغى غيره
قال قبل اطلقها ابغى اقابلها للمره الاخيره :
لبست حجابي وطلعت له بالمجلس ..قال خلاص تبغين نتطلق ؟
قلت : ايه ولاني ندمانه انا لو ظليت معك بيظل الندم شوكه بحلقي الين اموت
قال: فكري طيب
قلت : افكر!!!!!
افكر بيوم تناديني ميعاد والافكر بيوم زواجك يوم رحت وانا اتألم قفلت الباب ورحت ولاهميتك
الحين جاي تطلب مني افكر!!!
مستحيل انا ان قلت اكرهك فهي شويه عليك
لمَا تمسّكتَ بدنوْ موقفكَ معِي
وأصرّيتَ على أن تتدحرَج كرة ثلجكَ مِن أعلَى قمّة فِي عيني بإتجَاه الأسفَل ،
لمَا تعمّدتَ أن تكسرنِي إلى الحَد الذّي يخجلنِي الآن من مواجهَة كبريائي ،

لا يهم الآن .. إِن كَان يهمّكَ أَن أغفِر لَكَ ،
إذهَب بإتّجَاه رِيح الغِيَاب
.........................ولا تعُد مهمَا حدث .!
قال : طيب بس سامحيني
قلت : الله لايسامحك لادنيا ولاآخره ..

وطلعت من المجلس ..مابغى ابكي قدامه ولابغى ابين اني حزينه على فرقاه
طلعت


وكان قدامي ابوي كان متأثر بكل الاحداث الي صارت لي وبان في وجهه كان مهموم
ناظرني ودمعت عينه قال :سامحيني يابنتي ماعرفت اعطيك الي يثمنك
رحت قربت منه حبيته على راسه قلت :
افا يابوي تبكي وانا رغم كل ماصار اضحك واهز القاع من تحتي
لا يابوي لاياتاج راسي انت مالك ذنب
تكفى لاشوف دمعتك يبه مكتوب لي من قبل انولد ان بيصير لي كذا وكفايه طلعت ب احلى اثنين
ريان وراكان وكفايه اني غفرت له اكثر من مره وكان هو مصر في كل مره يخسرني يبه يكفيني انك انت ابوي
ماني حزينه عليه ماني تعبانه من فراقه ..شوفني رفعت راسه وابتسمت له
باسني على جبيني قال: الله يكملك بعقلك يابنتي ..صدق اني عرفت اربي

//
طلقني ..عشت حياتي كان يجي ياخذهم كل خميس يمشيهم ويرجعهم
بديت اعيش بدوا اولادي يكبرون بدت ترجع لي ضحكتي ..
مره كنت طالعه انا وعيالي واخوي نتمشى ..ويوم رجعت وصلنا عند البيت ..
اول مافتحت السيارة ونزلت ..كان عند بيتنا وجه اعرفه زين ..
ناظرني خالد : قال مها هذا محمد
يوم نزلت جات عيني فعينه ..
كنت متنقبه وقفت غصب عني حسيت خطواتي ثقيله حسيت الكون بكبره مايوسعني
خطواتي لباب بيتنا كانت ثقيله كنت اسمعه يكلم اخوي خالد يقول :
تكفى بس خلها تسامحني ماني متوفق بحياتي ..زوجتي حملت مره وجانا طفل معاق ماطول ومات
وحملت بعدها مرتين واجهضت والسبب مو معروف تكفى خلها تسامحني ماني متوفق ..ابيها ابي ارجع مها
دخلت بيتنا وبس قفلت باب الحوش وجلست وابكي ...
جاني اخوي .. وقبل يتكلم .. قلت : الله لايسامحه ليش راجع اش يبغى
انا كل مانسيت جاي يرجع ليه مايرتاح هو الين اموت يعني
قال: مها انتي الطيبه تقولين كذا ؟
قلت : ماعادني طيبه الله لايوفقه لابالدنيا ولابالاخره

دخلت ..وشايله جروح بقلبي مارجعت حيت الا لما شفته ..
مرت الايام والشهور بعد سنتين ..كنا جالسين بالحوش نتقهوى انا واهلي ..
وشوي الا الجرس يدق ..قام ابوي ..راح يشوف ورجع وهو يحمل نونو بايده ..وشنطه
كلنا طالعنا فيه مستغربين ... بس هو ماكان يناظر الا فيني
نزلت عيني ف الارض ..
قال ابوي : مها تربين مها . وتكسبين اجر؟؟؟؟
طالعت فأبوي كمل : قال مها ربك غفور رحيم وهالطفله مالها ذنب
مها محمد يقول مابلاقي حد يحب بنتي ولايربيها مثل مها
نزلت دموعي غصب وكل ماقرب مني ابوي عشان يعطيني البنت احس قلبي يسرع بدقته
كانت صغيره البنت حيل مسكتها ويدي ترجف ..
قال ابوي : ربك يامها الواحد وهو يشوف لاتشمتين فحال زوجك زوجته مات بعز شبابها بعد ماولدت جاها نزيف حاد ومات بعد ولادتها بيومين ومابقى له احد
الدنيا دارت فيه وطعنته مثل ماطعنك
والله يامها انه يبكي يقول ياعم تكفى خل مها تسامحني ظلمتها وربي عاقبني
.. قولي الحمدلله على كل حال ..
.....

*ميعاد راحت بخيرها وشرها واسأل الله ان يغفر لها ويرحمها
*محمد ندمان وبيعيش طول عمره ندمان
*مها عايشه حياتها ومبسوطه بأحلى ثلاثه تربيهم
(ريان وراكان ومها )
*سبحان الله بعد ماكان زوجها مصر يسمي ميعاد دارت الدنيا والظروف وسمى مها بزوجته الاولى
انتهت ....