اسهل واسرررع طريقة للكيكة الاسفنجية
المقادير:
-3 بيضات
- واحد كوب سكر مش مطحون
- اتنين كوب دقيق مش مكبوسين ( وياريت يكون دقيق الكيك والبيتزات)
- نصف كوب زيت عباد أو زيت زيتون بكر مسخن (عشان ميكونش ليه ريحة)
- اتنين كيس فانيليا صغيرين
- باكو بيكنج بودر
- واحد كوب لبن ( انا بعمل كوباية اللبن دي بلبن بودرة ) وممكن بلبن عادي طبعا.
الطريقة
1- هنحط البيض وكوباية السكر ونص كوباية الزيت وكيسين الفانيليا ونص كوباية اللبن في الخلاط ونضرب الخليط كويس طبعا بنضرب شوية صغيرة ونريح الخلاط وبالظبط بتضربيهم دقيقة ونص مثلا لحد ما الخليط بس يتخلط كويس وتشوفي فقاعات هوا كده على الوش .
2- هنجهز الدقيق : ننخله بالمصفاة الضيقة بتاعة العصير أو منخل طبعا للي عندها منخل وننخل معاه باكو البيكنج بودر ( واللي تحب الكيكة بكاكاوما انا تشيل معلقتين دقيق من المقدار وتحط مكانهم معلقتين كاكاو خام).
3- نجيب الخليط نفضيه في طبقواسع عشان نعرف نقلب الدقيق عليه .
4- نحط الدقيق براحة حبة حبة على الخليط ونقلب بالمعلقة لحد ما يتخلطوا كويس ببعض وطبعا اللي عندها مضرب سلك يدوي هيكون افضل لو استعملته بس عادي لو بالمعقلة هيتخلط برضه كويس، ونفضل نقلبه حوالي خمس دقايق كده بايدينا كويس عشان الهوا يدخل الخليط ويبقا نافش وحلو ...
5- ندهن صينية متوسطة ويكون حرفها عالي ، نحط فيها زيت كويس ندهن بيه الصينية ورشة دقيق نرشهم كده ونرج الصينية كويس عشان الدقيق والزيت يعملوا طبقة كده في كل الصينية والكيكة متلزقش .
6- نكون مولعين الفرن من قبل ما نحط الخليط في الخلاط عشان يلحق يسخن لأن اصلا كل ده مش هياخد منك وقت يادوب كل ده مش أكتر من عشر دقايق فقط .
7- نحط الصينية على الرف اللي في النص في الفرن والنار تكون متوسطة وسيبيها خالص متفتحيش عليها نهائي نهائي حتى لو شميتي ريحتها سيبيها بعد ما تشمي ريحيها حوالي 10 دقايق ممكن ساعتها تفتحي وانتي مطمنة وتبدأي تجسيها بسكينة ولا حاجة عشان تتأكدي انها استوت و ان شاء الله هتنبهروابالنتيجة
وبالهنا والشفا
Hitskin.com
