بوحشة السكته تلاكَوا
شمعه مشتهيه ضواهه وشاعر جروحه جديده
هي تخلص دمعه دمعه
هوه يخلص جلمه جلمه ودمعة الشاعر عنيده
يختنگ بالعبره وتفر ويكَظهه
والحچي المدفون يتشلبه عى جيده
تعانده اثكَال القوافي
ويشتعل دمه بوريده
اشتعلت بصفنته الشمعه
وانطفت من رجفت ايده
وهذا طبع الشاعر
شما يحترگ يكتب قصيده
وهذا طبع الشاعر شما يشتعل
يهفت بهيده
بدمعه لو بحچايه ترفه
لو يدفي الروح بالحلم اليريده
ويكتب اشعاره على هدوم البنات
وشوفة الحلوات عيده
يكتب اول سطر ترچية احديثه
ويكتب الثاني غزل لعيون غيده
ويجمع النجمات كل اثنين روح
وتضل بس روحه وحيده
ويفز ليل الغربه نار
ويكتب الغربه الليالي السود ودموعه بريده
يهدهه وي جاري الفرات المالكَه الدمعه التزيده
ويبچي وي هور الچبايش
طينه صك على المشاحيف وعبرنه
وصارت العبره بعيده
ويبس من نصه وكفرنه
بغيمه زخت ظهر بارح
زخة الصيف اشتفيده
وخلصت المحبره واخر سطر عنده
يكتبه ويشطبه ويعيده
الشاعر يموت وتضل بس القصيده
يا قصيده
القصيده الما تذل
والقصيده المشت بالسچه السراط
وما رضت عنهه تزل
والقصيده الخضرت من عطش رفحه
وحملت الماينحمل
والقصيده الرفرفت طيرة مناره
اتدور وي في المناره وما تمل
والقصيده الهلهلت بعجود اهلنه
ولمت اذار الشمل
وصاحت بكل حيل اهلهه
اليعدل الما ينعدل
انه خبزه شعير مستويه بسموم
اتعور اسنون الرده وما تنوكل
وانت خبزه اركَاگ واتطركَت حار
منين ما تنكظ سهل
لا تدگ راسك براس المشتريك
وتوصف المايل عدل
القصيده الرخصت بسوگ البلاش اتضل رخيصه
والقصيده الغاليه بسوگ السوالف
مثل نبضات الكَلوب الما تذل
ولو نساهه الوكت واتعده الزمان اتضل عزيزه
ونار حداد السيوف شما نستهه الريح نفخه وتشتعل
والقصيده التشبخ على الليل الاسود من تحب
خطهه شاعرهه على حيطان السجون
وصارت اليوم على بيبان المدارس تنكتب
كاَلهه وروحه على چفه
وكَابل الموت الرده الماينچهب
كَالهه بوجه المنافق والصبغ وجهه چذب
طيني مو عبره وتسدهه وتحرم الماي العذب
انه شتله بجرف طافح
بيك وبلياك اشب ,
كريم الجسار
