يوم من الايام كان يوم خميس قال لي صديقي يابو فلان وش يعني لك يوم الجمعة ؟؟
قلت تبي الصدق والله انه يوم ثقيل علي وتحس انه ضايع وماتحس انه اجازه ممكن لأن بعده يوم السبت اثقل يوم .
قال أستغفر ربك أجل لو طلبت منك شيء تسويه يوم الجمعة وش تقول ؟؟
قلت هات اللي عندك ؟ قال لي / بس بشرط تراه تحدي وهنا تختبر صبرك وقوتك ورجولتك .. يوم قال رجولتك قلت تهبى ما بقى إلا انت تختبر رجولتي . رجال من فوق خشمك . قال طيب نشوف مين انا وإلا انت قلت طيب ..!! هات وش عندك . قال بسألك بعض اسئلة ؟ قلت تفضل متى تروح صلاة الجمعة ؟ قلت احيان حسب اذا كانت ايام صيفيه واجازه احيانا تروح علي نومه واصليها ظهر , وأحيان اقوم على الاقامة ومرة الحق الركعة الاخيرة لكن طوال حياتي ما اخبر اني رحت قبل الصلاة . المرة الوحيدة اللي حسيت اني صليت جمعه يوم حضرت قبل الاذان بخمس دقايق حسيت اني احسن واحد في الحارة . قال اصلحك الله ؟ فقلت مثل ما قال عادل امام في مسرحيته : وماحال الاوس والخزرج وش اللي اصلحك الله تبغاني اكذب واقول اني اصلي الجمعة في الصف الاول .!!! قال لي / اللي ابغاك تسويه صعب عليك مادام هذا وضعك ؟ قلت افا ياولد " اطلع من نفخوي. " , وش يعني صعب, تبغى اصلي بهم واخطبهم ترى فصيح واعرف اصف كم كلمه وفي الاخير ادعو على اليهود والنصارى واقم الصلاة . وانتهينا
قال لي الموضوع اكبر من كذه بقولك هذا الحديث وانا متأكد انك ماسمعت فيه !!
قلت هات . فقال لي حديث اول مرة اسمع به في حياتي الحديث هو (( من غسل يوم الجمعة واغتسل ,ثم بكر واستبكر ,ومشى ولم يركب,ودنا من الامام فاستمع ولم يلغ,
كان له بكل خطوه عمل سنه صيامها وقيامها) رواه ابو داود والترمذى قلت طيب وش المطلوب ؟؟ قال انت فهمت الحديث قلت ايه فهمت !! قال نبغى نسويه .. !!! تكفي يابو فلان خلنا نسويها جمعة وحده في حياتك جمعة وحدة تكفى . جمعة وحدة تسوي ذا الموضوع تحصل على اجر بكل خطوه تفهم انت بكل خطوة اجر سنه صيام وقيام .
قلت حاضر علمني وش اسوي قال ابد الحين الخميس ارقد بدري وعلى الفجر انا بمر عليك نصلي الفجر جماعة واعطيك العلم قلت انت صاحي تبغى ترقدني الساعة تسعه واليوم خميس وفله ودجه قال بابو فلان جمعة وحدة في العمر . المهم رحت البيت وجلست أتقلب مانمت الا الساعة 2 في الليل وكان الفجر يتأخر المهم جت السا عة اربع ونص والحبيب عند الباب يدق جرس . خرجت قلت وش عندك ترى باقي ربع ساعه على الاذان قال اقول توضأ والبس وتعال . في الطريق الى الصلاة قلت وش الخطه قال ابد بعد صلاة الفجر نخلص اذكار ونروح ناكل "معصوب "وبعدها طال عمرك رح إستحم واغتسل غسل الجمعة والبس احسن ثيابك وتبخر وتعطر قبل شروق الشمس اجيك البيت واوقف سيارتي ونروح للمسجد ؟؟ قلت من جدك فيه مسجد فاتح الساعة سبعه الصبح ؟؟ . قال المهم بوقف السيارة ونروح مشي ونطبق الحديث كما ورد وان شاء الله نحصل على الاجر . قلت تم المهم سويت اللي قال و نحن ماشين في الخط قلت خلني اسولف ونقطع الطريق قال اقولك ولا كلمه في هذا اليوم تعرض فيه الصلاة على النبي عليه السلام فصلي على محمد حتى نوصل المسجد . وصلت المسجد ودخلت ورحت في آخر المسجد قلت ياولد حط راسك وارقد . قال لي صديقي هي هي انت وين رايح ,قلت وش فيك بقعد في ألأخير قال نسيت الحديث وش معنى " فدنا من الامام " قلت اها يعني في الصف الاول قال نعم . رحت الصف الاول المهم مجموعنا كلنا في المسجد حوالي خمسة . اثنين شيبان مطوفين . قعدت جنب واحد منهم وصليت كم ركعة وقرات سورة الكهف وقرات كم سورة من يمين ويسار وكل ماجيت ببطل استعجبت من هذا الشايب اللي جنبي متحمس وكل بعد نص ساعه يقوم يصلي ركعتين ويدعو ويسجد وداخل جو غريب صراحة غرت منه وصرت اسوي مثله. وعلى هذا الحال حتى اذن وسمعنا الخطبة وغلقت الصلاة وجلسنا نذكر الله . المهم التفت علي الشايب وقال تقبل الله ؟ قلت منا ومنكم ؟ قال ماشاء الله شاب ويجي بدري للصلاة هذا والله نعم الاستثمار . قلت الله يسلمك هذا من فضل الله لكن ياعم ترى اول مره اسويها لي صديق علمني بهذ الامور قال ونعم بصديقك اول مرة ولن تكون آخر مرة . ثم قال لي الشايب شوف وانا عمك انا لي 11 سنه على هذا الحال قلت 11 سنه وانت تقوم بدري وتجي قال نعم وابشرك بعد اختم القران كل جمعة من السبت الى الخميس اقرأ 24 جزء ويوم الجمعة من الساعة الاولى حتى يؤذن للصلاة أقرأ 6 أجزاء قلت طيب انت كل شوي تقوم تصلي . قال لي ياولدي انا كل ما اخلص جزء اقوم اصلي كم ركعة شكر لله وثناء وتقرب اليه بان سهل لي طاعته ويسر لي قراءة القرآن وجعله ربيع قلبي . خرجت من المسجد وانا اقول واااااااااااسفاااااااه كنت افكر نفسي بطل اذا جيت قبل الآذان بخمس دقايق . كنت مخدوع وفيه هناك ابطال ابطال فوق التصنيف
وش اللي اصلحك الله تبغاني اكذب واقول اني اصلي الجمعة في الصف الاول .!!!
قلت 11 سنه وانت تقوم بدري وتجي قال نعم وابشرك بعد اختم القران كل جمعة من السبت الى الخميس اقرأ 24 جزء ويوم الجمعة من الساعة الاولى حتى يؤذن للصلاة أقرأ 6 أجزاء قلت طيب انت كل شوي تقوم تصلي . قال لي ياولدي انا كل ما اخلص جزء اقوم اصلي كم ركعة شكر لله وثناء وتقرب اليه بان سهل لي طاعته ويسر لي قراءة القرآن وجعله ربيع قلبي . خرجت من المسجد وانا اقول واااااااااااسفاااااااه