Hitskin.com

موضوع: قصة فليسكو ,قصه مضحكه 25/1/2012, 10:52 pm

مضحكه , فليسكو , قصة , قصه

قصة فليسكو ,قصه مضحكه

يقول فلسكــــو:

قدر الله علي وتخرجت من الثانوي..وبدت رحلة البحث عن
وظيفه..خصوص إن مافيه أمل أكمل دراسه بعد ماجلست في الثانوي
عشر سنين بلياليها..

وبدت البهذله..كل مارحت أقدم على وظيفه طلعولي عشرين ألف
عذر..مـره معدلك نازل.. ومره ماعندك دورة كمبيوتر.. ومره
ماعندك دورة انجليزي.. ومره لازم تغير إسم امك.. ومره ليش
ماتلبس سروال قطن..ومره ليش ماتلبس طاقيه..وانواع الأعذار
المخيسه..

وجلست أقدم يومياً كل يوم أقدم في مكان..وجلست على هالوضع
اسبوع واسبوعين ومافيه فايده..وتأكدت إني لازم أدبر واسطه
عشان أتوظف..وتوجهت لابوي عشان يشوف أحد من الجماعه ولا من
اخوياه يتوسط لي..مع إني أعرف إن ابوي ماعنده ماعند جدتي بس
قلت اجرب..!!

وكان ابوي جالس هو وامي في الصاله..وماسك بأمي سوالف يحكي لها
عن بطولاته..وامي خبله فاقه خشتها ومتحمسه مع سواليفه..دخلت
عليهم وبعد ماشرحت لابوي مأساتي..إعتدل أبوي في جلسته وسوى
نفسه مهم.. وقال لي..شوف ياإبني.. إنت لازم تعرف إن الدنيا
مثل العالم..ولازم تعرف إن البحر غدار..وبماإن السمك يعيش في
البحر فمعنى ذلك إن النوم سلطان..وترى البشر مثل الناس والأسد
هو ملك الغابه..وانت لازم تتعب في الصغر لأن التدخين مضر
بالصحه..وتذكر إن لسانك حصانك إن لم تقطعه قطعك.. فالله الله
ياولدي بالسمعه الطيبه والأخلاق الزينه ولاتنسى إن المثل
يقول.. ذاكر دروسك أول بأول فإن هم ذهبت أخلاقهم ذهبوا..!!
قلت له..شدعوى يالحبيب..وش اللي تدخين وسمك والبشر مثل الناس
وذاكر دروسك.. ياخوي انا ابي واسطه عندك ولا لا..؟ قال
لي..فيه واحد أعرفه إسمه عطيه..ماسك وظيفه مهمه..وشخصيه
مرموقه في المجتمع..قلت له..حلو يالله كلمه وخله يتوسط لي في
أي وظيفه..
راح ابوي ولبس البشت حقه وأخذ ابوي التلفون واتصل على بيت
خويه..(والله إن ابوي ثور..لبس البشت يحسب خويه بيشوفه..عاد
من زين بشته لو تشوفه تحسبه فنيله من قصره..!!)وجلس ابوي يكلم
شوي..وبعد ماخلص ابوي من المكالمه قلت له.. هاه بشر..!!قال
لي..ردت علي زوجته وتقول إنه ماسك خفاره هاللحين..!!قلت له..
وش اللي خفاره..انت تقول إن وظيفته كبيره..!!!قال لي..ايه هو
جندي أول قد الدنيا.. وحارس على بوابه وماحد يدخل ويطلع إلا
بأمره..!!!انا بصراحه ارتفع ضغطي.. واللي قاهرني إن امي
مبسوطه ومصدقه وتناظر ابوي باعجاب..وانا اللي اناظر ابوي بحقد
وقلت له..أجل شخصيه مرموقه وآخرتها جندي أول.. انا أصلاً من
يوم عرفت إن إسم خويك عطيه وانا عارف انه ياإما بيكون جندي
ولا بيكون حارس مدرسة بنات.. لكن الشرهه ميب عليك
ياالشايب..أصلاً أنا من أول لحظه طلعت للدنيا وشفت وجـه امي
وشفت وجهك بصمت بالعشره إني بانحرف وباطلع شين وفقيـر..وأصلاً
انا من يوم شفت وجه الدكتور الأحول اللي ولدني وانا عارف إن
نهايتي في السجن الله لايعوق بشر.............. ابوكم حتى وانا في
الحضانه كان البزر اللي جنبي ملفوف في شرشف أحمر وريحته عطر
وانواع الألعاب عنده..هذا وهو توه مولود أجل إذا كبر وش
بيجيبون له ابن ال...........وانا جنبه ملفوف في جريده قديمه وريحتي
معفنه ومليان وجهي سعابيل ومخاط وانواع الذباب على وجهي..طالع
كني قطعة لحم معفنه..وكل هالعذاب اللي انا فيه عشان لقافتكم..
ياشيخ والله لو انكم ذيك الليله تعوذتوا من ابليس ولعبتوا
أونو ولاكيرم إنه أصرف من البلوه اللي وهقتوني فيها..انتم
تنبسطون وانااللي أكل تبن..
بعد كلامي حسيت إن ابوي وامي تأثروا..ونزل أبوي راسه وقام
يخطط بيده على الأرض(مسوي نفسه متأثر..!) وقربت مني امي ومسحت
على راسي..(وييين شايفتني كلب على غفله..!!) وسحبت طرف شيلتها المربوط..وفكت
الربطه وطلعت منهاريالين وعطتنياها وقالت لي..خذ هالريالين
ياوليدي ورح انبسط فيها..!!قلت لها..شايفتني فار أنا عشان
انبسط بريالين..خلي فلوسك معاك بس ..(احترم اهلك
يالثور..!!)

ورجعت أقدم على وظايف بدون فايده..وفي احد التقاديم تعرفت على
شخصين..واحد اسمه مناحي يتميز بأن ملابسه تميل للون الأصفر..
طويل الوجه كن وجهه طريق الملك فهد..والثاني اسمه عكرمه يتميز
بأن لونه أسود لماع كنه فحمه مكبوب عليها مويه..

وتوطدت علاقتنا..(مايمديكم على توطدت..هاللكلمـه مفروض أحطها
في موضوع لحالها..!!)وصرنا نتقابل يومياًأناومناحي وعكرمه وفي
يوم من الأيام عزمتهم في كوفي شوب راقي عشان أخليهم يشوفون
العالم.. وأول ماجلسناعلى الطاوله صاح مناحي على العامل وقال
له..ياصديق عطني واحد كوفي شوب وكثر السكر.. وعكرمه جنبه جالس
يأشر للعامل بيده ورافع إصبعين.. يعني خلهاإثنين..!!!
والناس في الكوفي شوب جالسين يطالعون فينا باستغراب..وانااللي
أقوم واسحب عكرمه ومناحي واطلعهم برى المحل وانا ال................
فيهم على الفضيحه اللي سوها.. وحاول عكرمه إنه يلطف الجو
وعزمنا في بيتهم..وخصوص إن أهل عكرمه مسافرين والبيت فاضي(ليش
وش ناوين عليه..!!)وبعد ماوصلنا بيت عكرمه ودخلنا المجلس..
دخل عكرمه عشان يصلح لنا القهوه..وبعد لحظات طلع عكرمه ومعاه
صينيه فيها دلة القهوه والفناجيل وصحن غريب..وحط عكرمه
الصينيه قدامنا وانا أناظره بحقد..لأنه جايب مع القهوه صحن
سلطه...!!!!وقلت له..ليش جايب صحن سلطه..!!قال لي..والله
يافليسكو إني دورت تمر ومالقيت..وصعبه إني أجيب لكم قهوه
لحالها.. ولقيت هالسلطه في الثلاجه وجبتها..!!!قلت له..الله
عليك.. الله على العبقريه اللي فيك.. الله على سرعة البديهه
اللي فيك..الله .................... من عرفني عليك..!!وطلعت من
عندهم وانا مقهور...!!!

وبعد هذا الموقف يقول فلسكوو إني صادفت إثنين من أغبى الكائنات على
وجه الأرض.. (انت شف من يتكلم بس.. انت مفروض تنبسط إنك لقيت
ناس أغبى منك..!!)

ومع الأيام زادت صداقتنا واستاجرنا غرفه وصرنا نتقابل فيها
يومياً وتناقشنا انا ومناحي وعكرمه في قلة الوظائف وكثرة
الواسطات وفي إحدى السهرات دخل علينا مناحي ومعاه تلفزيون..
وقلت له..ماقصرت والله يامناحي أكيد إنك جايب التلفزيون عشان
تحطه في الغرفه..قال مناحي..لاوالله يافليسكو هذا التلفزيون
شريته أمس..ويوم رحت للبيت وشبكته وجلست أقلّب في القنوات
إنصدمت..لأني كل ماحطيت قناة يطلع فيها برنامج أو مسلسل شفته
قبل كذا..واناأتوقع إن الهندي لعب علي وعطاني
تلفزيون قديم...!! وتلقف عكرمه وقال..طيب يامناحي لاتظلم
الهندي.. وتأكد أول يمكن إن الرسيفر اللي عندك هو القديم موب
التلفزيون..!!
وانااللي أعض يدي من القهر ولاكلمتهم..لأني ماأدري وش أقول
للدلوخ هذوللي..!!

وفي يوم من الليالي خطرت في بالي فكره خطيره وهي اننا نكون
عصابه..ونسرق المحلات والبيوت والبنوك.. ورحب مناحي وعكرمه
بالفكره..وقال عكرمه.. ايوه يابويه بدال مانعيش عاله على
المجتمع نشتغل ونكسب من عرقنا..!!قلت له..إذاكنت بتكسب من
عرقك أجل والله يانت بتكسب ذهب.............. انت حتى في الشتا
تعرق..!!!
المهم إني مسكت عكرمه وقلت له..شوف ياعكرمه انا ابيك تتحمس
معانا وتترك عنك الدلاخه..وأبيك تبيض وجهي..قال عكرمه..إبشر
يافليسكو مالك إلاإني أبيض وجهك..قلت له..والله إني أدري إنك
ذيب بس تفكيرك مايساعدك..المهم إني إنسدحت في الإستراحه وأخذت
لي غفوه..وفي عز النوم حسيت بشي يتحرك على وجهي..ويوم قمت
حصلت عكرمه معاه كريم وجالس يدهن وجهي..قلت له..خير يابو
الشباب وش عندك..؟؟ قال لي..هذا كريم تبيض البشره..موب إنت
قلت لي إنك تبيني أبيض وجهك...!!!!!! قلت له..انت تبيني اكفخك
تبيني أتوطى على جبهتك..انا ابيك تبيض وجهي بافعالك
موب بالكريم يالدلخ..وتدخل مناحي وقال لي.. يافليسكوهذا حمار
لاتشره عليه وامسحها في وجهي هالمره..!!قلت له..يارجال تلايط
أنت يابو تلفزيون.. بعدين حرام عليك تخليني أمسح هالموقف
التافه في وجهك..مفروض تقول إمسحها في إذني ولاإمسحها في
إبطي..لأن وجهك أكبر من هالخرابيط..وجهك مفروض نمسح فيه جريمة
قتل ولا قضية مخدرات انت ووجهك اللي كنه سفينة التايتانك..!!
وتدخل عكرمه وقال لي.. يافليسكو لاتدقق في كلامنا وتصرفاتنا
لأن أعمارنا صغيره موب مثلك شايب..!!قلت له.. يعني تبي تفهمني
إنك صغير أنت وخشتك........... أنت لوتتزوج ويجيك ولد بيطلع من
بطن أمه وعمره خمس سنوات لأنه بيكون مطوّف.. وين صغير معه
وانت أيام ماكنت تدرس الثانويه كانوا يمشون لك راتب
تقاعد.. أنت لوتتوظف في وضيفه ثاني يوم بيحيلونك
للتقاعد من كبرك..قال ايش قال تونّي صغير..لكن ما أقول
إلاالله لايعيد اليوم اللي عرفتك فيه انت ووجهك المنعفط كنه
واحد مقفل على وجهك باب السياره وانت صغير..!!

ورجع كل واحد لبيته.. واتفقنا اننا نجتمع في اليوم الثاني..

وفي اليوم الثاني اجتمعنا وقررنا إننا نسوي بروفه.. وسألتهم
إذاكان يعرفون بيت عشان نسرقه.. وقال مناحي.. أناأعرف بيت
خلونا نجرب فيه..وفعلاً قمنا وتوجهنا للبيت.. وطقينا اللطمه
عشان مااحد يعرفنا..وبعد ماوصلنا للبيت ما امداني أقول يالله
نسرق إلا وعكرمه يركض وشات الباب برجله..وانااللي ألقطه مع
حلقه وقلت له..خير عسى ماشر..!! قال لي..لازم نسوي كذا لأننا
عصابه قويه موب أي كلام.. قلت له..يارجال كلك تبن وخلك
وراي..وتعلقت في عداد الكهرب وطمرت السور ومسكت يد عكرمه
ورفعته معاي فوق السور..وناديت مناحي عشان أرفعه معانا فوق
السور..لكنه رفض وقال لي..لامايحتاج أنا معاي مفتاح..!!قلت
له..وش لون معاك مفتاح..؟؟قال لي.. ياخوي هذا بيتنا..!!!قلت
له.. هاللحين إحنا ندور بيت نسرقه وانت جايبنا بيتكم..؟؟؟قال
لي..انت اللي قلت من يعرف بيت..!!!!وانا اللي أدف عكرمه من
فوق السور..ونزلت على مناحي ................

وفي اليوم الثاني خططنا أننا نسرق أحد البيوت اللي شكلهـا
فخم..وبعد ما اخترنا بيت واضح ان صاحبه غني وراقبنا البيت على
مدى يومين اللين طلعوا أصحابه..وأول ماقلت يالله نسرق انطلق
عكرمه ورفس الباب برجله.. وانااللي اسحبه مع شعره العراده
وقلت له..تراك غثيتنا بهالحركه يالثور من وين تعلمتها..؟؟قال
لي..أنا أشوفهم يسون كذا في الأفلام..قلت له..انت مالعب في
راسك إلاأفلام المصاريه..وطبينا البيت واكتشفنا إن عندهم كلب
حراسه في الحوش..وقام يلحقنا الكلب وبسرعه دخلنا داخل البيت
وسكرناالباب..وقلت لهم كل واحد يسرق لحاله واذا خلصنا نتقابل
في غرفتنا.. وتفرقنا.. وحاولت انا أسرق لكني حسيت بحركه
واصوات وطلعت من البيت بسرعه وتوجهت لمكان الاجتماع بدون ما
أسرق شي..وجلست أحتري مناحي وعكرمه

وبعدلحظات جاءمناحي وهو شايل خيشه كبيره واستبشرت بالخير يوم
شفت الخيشه.. وقلت له..هلا والله بالذيب هلا والله بالحرامي
الكبير.. وجلس جنبي مناحي وهو بيتشقق من الفرحه..وحط الخيشه
قدامي..وحسيت إن الخيشه تتحرك..وقلت له.. وش سرقت أنت..قوم
افتح الخيشه خلنا نشوف وش جايب انت..وقام وفتح الخيشه وطلع
منها شغاله اندنوسيه....!!! قلت له..وش هذا ياأخ مناحي..؟؟
قال لي..ياخوي لقيتها نايمـه وسرقتها عشان ناخذ راتبها...!!!قلت له..تفك فيها أزمه يالغبي.....
..رايحين نسرق حنا ولانسوي عمليه انقاذ يومك جايب لي
الشغاله..وفكيت الشغاله وخليتهاترجع..ودخلت مناحي في الخيشه
وربطته وسطها..وجلست أحتري الحمار الثاني..
وشوي إلاعكرمه مقبل ومعاه خيشه..وقلت الله يستر من
هالخياش..واول ماوصل قلت له..هلا والله بالقوي..هلا والله
بسيد الحراميه..عاد عكرمه انبسط وجلس يمسح عرقه ويتنفس بسرعه
وجلس جنبي يوريني الجروح اللي في يده بسبب السرقه عشان
أمدحه..وقلت له..اناأشهد ان امك جابت رجال..والله انك
ذيب..وشوي إلاأسمع صوت غريب في الخيشه..!!!!!!
انا استغربت وقلت لعكرمه يفتح الخيشه..ويوم فتح الخيشه إلاوهو
سارق كلب الحراسه.....!!!!قلت له.. هاللحين الله ياخذ هالوجه
تارك البيت واللي فيه وسارق لي كلب .......!!!!قال
لي..والله يافليسكو أنامن صغري أحب الحيوانات......!!!
قلت له..بتجننوني انتم.. قوم الله يقلعك ورد الكلب مكانه
.........!!!!
بعد عمليه السطو على البيت الفاشله يقول فلسكو:

ورجعت لبيتنا وانا منهبل واكلم نفسي بسبب هالحمير الله يوريني فيهم يوم
..وفي اليوم التالي..اجتمعنا عشان نخطط لشي
جديد..وكنت جالس أنا وعكرمه في الغرفه ودخل علينا مناحي وقال
لنا.. يالربع ترى صاحب الغرفه كلمني ويقول إن الايجار
حلّ...ونط عكرمه بحماس وقال...هاه بشر عساه جاب درجه
كامله...!!!! وانا اللي أشوت عكرمه وقلت له... جالسن في مدرسه
حنا.. هو يقصد حلّ يعني جاء وقته موب حلّ يعني جاوب
يالثور....!!!!ورجع عكرمه مكانه وراسه في الأرض من الخجل..

وفاجأني مناحي وقال لي.. وش رايك نسرق بنك....قلت له..ليش وش
ناوي عليه يابو الشغالات..ناوي تسرق حارس البنك
هالمره...!!!قال لي.. يافليسكو ليش انت تحطمني.. ليش دايم
مستهين في قدراتي..ترى انا ألف عصابه تتمناني....قلت
له..يارجال كلك تبن انت وجهك الطويل اللي كنه لوح
تزلج.....قال لي..يافليسكو لاتبالغ وجهي موب طويل.....قلت
له..والله ياهو موب طويل بعد.. انت من طول وجهك لو
تسافر الشرقيه بيوصل وجهك قبلك وبيخلص أشغاله وبيرجع الرياض
وانت توك مابعد وصلت الشرقيه...قال ايش قال تبالغ.............
أنت إذا جيت تقضي حاجتك وجلست في الحمام لازم ترفع راسك فوق
عشان مايحك وجهك في الأرض........... انت إذا جيت تركع في
الصلاة لازم تفتح ارجولك عشان يدخـل وجهك من بينها..........
انت يوم جت أمك تولدك كنت أنت ووجهك مشروع توأم بس فشـل في
آخر لحظه.. (والله يانا حاقد عليه..أجل سارق لي شغاله..!!)

وحسيت إن مناحي زعل علي وحبيت إني ألطّف الجو.. والتفّت على
مناحي وقلت له.. اخبارك يابرجس...(طلعـت عن النص..لأن برجس
إسم مناحي الصدقي)ومات الجمهور من الضحك..ومناحي انحرج ويأشر
لي بيده ومفتح عيونه يعني وش السالفه..وقلت له.. هاه أخبار
البواسير.. وكرها الجمهور ضحك..حتى واحد كان مار من جنب
المسرح مات من الضحك وهو مايدري وش السالفه..وتحمس مناحي..
وقال لي..وانت ياخالد أخبـاار جدتك بنه..وأغنيه يابلادي
واصلي( والله ماينعطى وجه بيجيب فضايحي كلها..!!)وانا
اللي أشر لمناحي بيدي يعني هدي الوضع وخلاص خلنا نرجع للنص
الأصلي..... لكن مناحي أوبرجس مسك خط..والتفت على عكرمه وقال
له..وانت ياوليد أخبارك..أجل صابغ وجهك أسود..والله إن اللون
الأسود أصرف من لونك الصدقي..وين ياخي فيه إنسان لونه
برتقالي..قال عكرمه..ياشيخ روح انت وجبهتك..بالله فيه انسان
تجيه بواسير في خشمه..!!!!!
وخربها مناحي وعكرمه
(برجس ووليد)..وجابوا فضايح بعض..أناقلت باطلع عن النص عشان
ألطف الجو مادريت إن هالحمير بيخربونها..وطبعاً الجمهور كان
مبسوط وميت من الضحك..وقمت أنا أهديهم وأمسح على روسهم واقرى
عليهم عشان يهدون ويرجعون للموضوع.. وخليتهم يتصالحون مع بعض
عشان مايخربون الموضوع وصمم مناحي إنه يعزم عكرمه للعشا عشان
يراضيه.. وقال مناحي لعكرمه..لازم تتعشى عندي الليله..قال
عكرمه..لاوالله خلها وقت ثاني لأني ماني جوعان
هاللحين...!!!قال مناحي.. يارجال لازم أقوم بواجبك.. قال
عكرمه..ماعليك من واجبي إنت علمني صفحة كم الواجب وانا باحله
لحالي...!!!!!وجلست انا أناظر عكرمه بحقد واقول له..الرجال
يعزمك وتقول ماني جوعان.. والواجب صفحة كم..الله ياخذ المرجله
اللي تعرفها ياشيخ..!
وتفرقنا بعد هالموقف واتفقنا اننا نجتمع اليوم الثاني عشان
نبتدي نشغل عصابتنا..وفي الصبح اتصلت على مناحي وعكرمه
واجتمعنا.. وتوجهنا لأحد البنوك عشان نشوف وضعه ووضع الأمن
فيه والمداخل والمخارج عشان نسرقه..ونبهت على مناحي وعكرمه
يركزون في الشغل..وبعد مادخلنا البنك وجلسنا نتفحصه..لقيت
مناحي يسولف مع حارس البنك..وطلع حارس البنك من اخويا مناحي..
وسأل حارس البنك مناحي.. وش عندك هنا..تبي مساعده؟ قال
مناحي..لاوالله سلامتك انا جاي انا واخوياي نشوف وضع البنك
لأننا ناوين نسرقه انشاالله..وانهبل حارس الأمن.. وانااللي
القط مناحي من يده واسحبه برى البنك..وقلت له.. حمارأنت..ليش
تعلمه اننا ناوين نسرق البنك..؟؟؟قال لي..هو اللي سألني..يعني
تبيني أكذب عليه..!!!قلت له.. واذا سألك تعلمه على
طول..!!!وبعدين مافيها شي لو كذبت عليه تراك حرامي مانتب إمام
مسجد...

وطلع عكرمه من البنك وسألته هاه بشر كل شي تمام..؟؟؟ قال
لي..ولايهمك أنا سويت نفسي اعبي استمارة التعريف وكنت جالس
أعبي الإستماره وانا اراقب الوضع.. قلت له..حلو واكيد رميت
الاستماره وطلعت...؟؟قال لي..لاعبيتها وعطيتهم..قلت له..حلو
واكيد كتبت معلومات كذبيه...؟؟؟قال لي..لاكتبت معلوماتي صدق
رقم جوالي واسمي الكامل وعنوان بيتنا وكتبت اسمك انت ومناحي..
وتصدق يافليسكو لقيت فراغ مكتوب فيه المهنه وكتبت فيه المهنه
حرامي..!!!
وجلس عكرمه يضحك هو ومناحي وبغوا يموتون من الضحك....قربت من
عكرمه وقلت له..ياخي والله انك زاحف ومنسم..بالله كتبت المهنه
حرامي وكتبت اسمي بعد...!!
قال لي وهو بيموت من الضحك..وكتبت رقم جوالك وعنوان بيتكم
بعد.. وكرها ضحكه..وانااللي أمسكه واطرحه في الأرض وألكّمه
اللين عرف إن الأرض كرويه.. وقلت لهم..الله يلعن
هالوجيه..حمير انتم..انا قلت لكم بنسوي عصابه ماقلت لكم بنسوي
فرقة كشافه عشان كل ماقبلتوا واحد علمتوه بخططنا..يالله انت
وياه روحوا جهزوا انفسكم والوعد في نفس المكان هذا الساعه
وحده في الليل عشان نسرق البنك..
وتفرقنا وراح كل واااحـد بيته..

وقبل الموعد اتصلت على مناحي وعكرمه اجتمعنافي غرفتناعشان
نستعد لسرقة البنك..وكنامشغلين التلفزيون على قناة الجزيره
وكان فيها أخبار..وكنت أناجالس أفكر في الخطه وأهوجس..ولفت
نظري إن عكرمه جالس يناظر الأخبار وهو ميت من الضحك.. وجلست
أطالعه باستغراب وهو بيتقطع من الضحك.. وقربت من عكرمه وقلت
له.. عسى ماشر يابو الشباب ترى اللي في التلفزيون أخبار مهوب
مسرحيه...!!!رد علي عكرمه..يافليسكو أدري إنها أخبار بس أنا
جالس أضحك على الخبل اللي صورته صغيره في آخر الشاشه لأنه
جالس يسوي حركات استهبال بيده..تصدق يافليسكوإني كل يوم أحتري
الأخبار عشان هالخبل...!!!!!!
قلت له..ياحمارهذا مايستهبل.. هذا يقول الأخبار بلغة
الإشاره..قال لي عكرمه.. وين يافليسكو تلعب علي انت ووجهك..وش
هاللغه اللي اسمهالغة الإشاره..حتى الاشارات صارلهالغه..أجل
بكره بيخترعون لغة للوحات....!!!قلت له..ياحمارهذي لغة
الطرمان.. قال لي..طيب وش الدوله اللي لغتهم الاشاره..!!!؟؟؟
وانااللي اسحبه مع رجله وادخله الحمام اللي في الغرفه واسكر
عليه من القهر..ورجعت وجلست وانا ضغطي مرتفع من أسئلته
المخيسه..وناظرني مناحي وقال لي..لاتعصب يافليسكو..انت عرف إن
عكرمه حمار ومايفهم بسرعه....!!!! ومارديت على مناحي وجلست
أفكر في خطة سرقة البنك..وكنت خاش جو مع الخطه وفجأه سألني
مناحي..فليسكو كم تاريخ اليوم..؟؟قلت له..إثنين صفر...قال
لي..لمين..!!؟؟؟قلت له..وش اللي لمين..!!؟؟قال لي.. لمين
الاثنين..!!؟؟قلت له.. ياخوي اليوم اثنين من شهر صفر..قال
لي..إيه أنا أحسبها نتيجة مباراة..!!!!!وانا اللي انفجر من
القهر وسحبت مناحي مع شعره وحبسته مع عكرمه في الحمام...!!!!!

وقبل موعد السرقه بساعتين طلعت مناحي وعكرمه من
الحمام..واتفقت معهم إن كل واحد يروح يرتب أوضاعه ونلتقي عند
البنـك في الموعد المحدد..

وفي تمام الساعه الواحده ليلاًكنت انافي موقع البنك جالس
احتري مناحي وعكرمـه..وبينماأنا واقف سمعت صوت يقول..هلا
والله فليسكو..والتفت حولي وماشفت أحد..وقمت اسمي بالرحمن
واتعوذ من الشيطان وسمعت الصوت مره ثانيه يقول..وش فيك
خايف..؟؟؟ ودورت على مصدرالصوت وماشفت أحد..وطقتني أم الركب
وعورني بطني من الخوف..شوي إلاواحد ماسكني مع كتفي ويقول..
إشبك ياواد انا عكرمه ماعرفتني..وادقق النظرإلا وهو عكرمه
فعلاً..وانااللي يرجع لي النفس وقمت اتحمد الله انه ماطلع
جني..وقلت لعكرمه..ياخوي شف لك صرفه في نفسك..انت مفروض تلبس
مثل لبس عمال البلديه اللي فيه الوان فسفوريه عشان نشوفك في
الليل..ولاحط لمبه في راسك عشان ننتبه لك..!!

وجلسنا نحتري مناحي..وشوي إلاأربع سيارات واقفه
عندنا..وانااللي أسحب عكرمه وقلت له..انحش انكشفنا وهذوللي
المباحث..ومادريناإلامناحي نازل من وحده من السيارات
وينادينا.. ورجعت انا وعكرمه وسألت مناحي..من هذوللي..؟ قال
لي..هذوللي عيال عمي علمتهم إننابنسرق بنك وصمموا إنهم يجون
يتفرجون علينا...!!!!!قلت له..انت أهبل ولاتستهبل..بنسوي عروض
دلافين حنايوم انك جايب عيال عمك يتفرجون..حمار انت..!!!!قال
عكرمه..يابويه خليهم ينبسطوا ويشوفوا عصابتنا إيش تسوي..قلت
له..تراك غثيتنا انت الثاني يابويه ويابويه..جالسين في دهانات
الجزيره حنا..بعدين الله ياخذ من عرفني عليكم أقولكم بنسرق
بنك وانتم تروحون تعلمون العالم.. ماتدرون إننالوانكشفنا
بننسجن..بتجننوني انتم...!!!!وقلت لمناحي..بعدين ليش لابس
شماغ..جاي تسرق أنت ولاجاي تغازل..!!!!!قـال لي..يافليسكو
ماأقدر افصخ الشماغ أخاف يشوفني واحد من الجماعه بدون شماغ
ويحسبني صرت خكري..قلت له.. ياخوي وأحد قال لك اننا بنروح
نتمشـى في التخصصي عشان يشوفونك جماعتك...يالله بس صرف عيال
عمك عشان نبدا في سرقة البنك...

وبعد ماصرف مناحي عيال عمه...عطيت عكرمه ومناحي خطه سرقة
البنك..وهي إن عكرمه يجلس برى البنك عشان يراقب..وخصوصاً انـه
في الليل ماأحد بيشوفه..وانا ومناحي ندخل للبنك من السطح عشان
مايشوفنا حارس البنك..وأي شي يصير يتصل علينا عكرمه على
الجوال ويعلمنا بالوضع.. والجوال أكيد بيكون على الهزاز..وبعد
ماعلمتهم الخطه قال مناحي..يافليسكو أنا أشم ريحة خيانه..قلت
له..يارجال انطم هذي ريحة آباطك الله يقرفك..!!!وقال لي
عكرمه..يافليسكو وش رايك نصلي ركعتين قبل مانبدا عشان الله
يوفقنا..قلت له.. رايحين نحرر فلسطين إحنا ياذبابة الحمير..
انتم الظاهر ماتعرفون معنى كلمة عصابه الظاهر إنكم تحسبونها
مثل هيئة الأمر بالمعروف والنهي عن المنكر..

وأخذت مناحي معاي وقلت لعكرمه يراقب ولايتحرك من مكانه..
وتسلقنا السطح انا ومناحي..ولقينافتحة تهويه في السطح
ودخلنافيها..ومشينامع فتحة التهويه ووصلتنا لصالة
البنك..ونزلنا في صالة البنك..وكان حارس الأمن نايم في
الصاله..ومشيت أنا بشويش وحطيت ورقه سودا على كاميرا المراقبه
اللي في الصاله..وقلت لمناحي..لاتطلع صوت وخلك وراي.. قال
لي..يافليسكـو حارس الأمن هذا خويي وش رايك أروح أسلم
عليه..!!! قلت له..كلك تراب وخلك وراي..
وقلت لمناحي يزحف علي بطنه بشويش معاي عشان ندور الغرفه اللي
فيها الخزنه..قال لي مناحي..ماأقدرأزحف لأن وجهي يضايقني..قلت
له..ماقلت لك إن وجهك طويل وماصدقتني..خلاص إزحف على ظهرك
أجل..!!!وجلسنا ندور غرفة الخزنه..وشوي إلامناحي يقول..
يافليسكو والله اني جوعان وش رايك نوقف العمليه ونروح نتعشى
وبعدين نكمل...!!!!قلت له.. مسافرين إحنا..وش اللي نوقف نتعشى
وبعدين نكمل..أقول إزحف وانت ساكت لأزحفك على وجهك..وكملنا
زحف..شوي إلاحسيت إن الجوال يدق.. وطلعت الجوال وطلع عكرمه
اللي متصل.. وسألته صار شي..؟؟؟ قال لي..يافليسكو تعبت وانا
واقف وماصار شي..وين ياخي معطيني دور مخيس..!!قلت له.. ياشيخ
كل تبن وراقب..قال لي.. طيب عطني مناحي أبي أسولف معاه..قلت
له.. ياخوي تراك هبلت فيني..طالعين رحله إحنا..وش اللي تسولف
معاه..!!!!قال لي..طيب إذا واجهتوا مشكله علموني وانا باجيكم
طايروانقذكم وأوريكم شجاعتي..قلت له.. عاد انت عنتر بن شداد..راقب وانت ساكت لأطلع عليك وادوس في بطنك..

ولقينا غرفة الخزنه أخيراً..وكان عندها كاميرا غطيتها بشماغ
مناحي..وفتحت باب الغرفه بسكين..ودخلنا الغرفه وطلعت بودره من
جيبي ونثرتها في الغرفه(وش عنده جيمس بوند..!!)واكتشفت بعد
ماانتشرت البودره إن الغرفه ملغمه بأشعة ليزر وإذالمسها أي
واحد تنطلق صفارات الإنذار..وكانت أشعة الليزر متشابكه مع
بعض..وقال مناحي..وش رايك يافليسكو بما أن جسمي مرن ليش
ماتخليني اجرب امر مـن بين أشعة الليزر..!!!قلت له..وش عنده
كاثرين زيتا غونز..وبعـدين انت مايمديك تمشي خطوه إلاووجهك
لامس الأشعه كلها..

وطلعت من جيبي مرايه مدوره حقت البرايه أم نص ريال.. وعطيت
مناحي مرايه برضه..وقلت له يزحف بشويش واذا وصل عند شعاع ليزر
يعكسه بالمرايه اللين يتعداه..وبدينا نزحف..وكنت أنا خايف
إنناننكشف.. والتفت على مناحي عشان أشوف وش يسوي ولقيته جالس
يطالع وجهه في المرايه ويفقع الحبوب اللي في وجهه..وقلت
له..وش تسوي ياثور..؟؟قال لي..ياخوي خرب وجهي صاركله
حبوب..قلت له.. جالس عند حلاق أنت.. امش الله ياخذ
هالوجه..وزحفنا اللين وصلنا الخزنه..

وجلست أحاول أفتح الخزنه..وبينمـا أنا احاول التفت على مناحي
ولقيته رجع يفقع الحبوب اللي في وجهه..وانا اللي أصفقه على
جبهته..ويوم صفقته على جبهته طاحت منه المرايه..
وتدحرجت..وحطيت يدي على راسي لأني خايف إن المرايه تلمس في
أشعة الليزر وننفضح..وكانت الأشعه كلها مرتفعه عن الأرض شوي
لكن الشعاع الأخير كان على مستوى الأرض..وتدحرجت المرايه ويوم
وصلت عند الشعاع الأخيرقامت تدور على نفسها ووقفت..والتفت على
مناحي ورفسته على بطنه وقلت له..بغيت توهقنا الله يقلعك..

ورجعت أحاول أفتح الخزنه..وبعد جهد فتحتها..وطلعناأكياس
وجمعنا الفلوس من الخزنه..وقلت لمناحي يجلس مكانه وانا بازحف
اللين أوصل عند باب الغرفه وباعطيه المرايه حقتي..وزحفت اللين
الباب ويوم وصلت الباب رميت المرايه لمناحي..وأول ماأخذ مناحي
المرايه جلس يطالع وجهه ويفقع الحبوب..وانا اللي أفصخ جزمتي
وأصوب على وجه مناحي عشان الجزمه ماتلمس الأشعه ومحطتها في
وجه مناحي..وقلت له..جبت لي الضغط والسكر..امـش
لاتفضحنا..وزحف مناحي اللين وصل عندي..وطلعنا بشويش ورجعنا
للصاله..ولقينا حارس الأمن باقي نايم.. وتسلقت أنا فتحت
التهويه عشان نطلع.. وناولني مناحي أكياس الفلوس..وطلعت اللين
وصلت السطح.. وجلست انتظر مناحي يطلع لكنه تأخر.. ورجعت مره
ثانيه للبنك عشان أدور مناحي..وسمعت صوت إزعاج..ويوم دخلت
لقيت حارس البنك ماسك مناحي ومتناشب معاه..

وسألت مناحي..وش السالفه؟قال لي..ياخوي انا يوم جيت طالع صحيت
الحارس من النوم وسألته إذا كان يبي خدمات ولايوصي بشي أجيبه
له من برى..لأنك عارف يافليسكو إن الحارس صديقي وشينه ادخل
البنك واطلع وانا مااسلمت عليه..!! وانا اللي امسك راسي من
القهــر وقمت أرفس مناحي واقول لـه.. طلعت لي الشيب الله ..................
هالخشه..ترانا جايين نسرق ماجينا نتعشى عند الحارس...وناظرني
حارس البنك وقال لي..يعني انتم حراميه..؟؟قلت له..يعني بالله
وش رايك انت..يعني واحد داخل البنك آخر الليل من فتحة التهويه
وش تتوقع بيكون سباك يعني..!!قال لي..لايمكن يكون
كهربائي..!قلت له.. انا من يوم شفتك صديق مناحي وانا غاسل يدي
منك... وضربت الحارس على راسه واغمي عليه عشان مايبلغ
علينا... وطلعت أنا ومناحي من البنك..وفي الطريق قال لي
مناحي...والله مالك داعي يافليسكو تضرب صـديقي حارس
البنك..بالله ترضى إني أضرب صديقك..!!قلت له.. يارجال عض على
شحمه واسكت..أجل تصحي الحارس من النوم عشان تقوله توصي شي من
برى....
وصلنا لسطح البنـك انا ومناحي..وسمعت صوت طياره هيلوكوبتر
فوقنا..ويوم طالعت فوق لقيت طياره عليها شعارالشرطه وموجهه
انوار الكشافات علينا انا ومناحي..وضحك مناحي وقال..الظاهر
إنهم يحسبونا جرابيع..!!قلت له.. ماودك تنكتم وتخلينا نشوف وش
السالفه.. وقربت من سور السطح وشفت شـي مايتصدق..دوريات
الشرطه وقوات الطوارئ والحرس الوطني والدفاع المدني وكاميرات
التلفزيون والقنوات الفضائيه كلهم يحترونا تحت وموجهين
المسدسات والرشاشات علينا..انا ماقدرت أبلع ريقي من الخوف
والتفت على مناحي وتفلت ريقي اللي ماقدرت أبلعه في وجهه..!!!

ومر وقت قصير وانا ما أدري وش السالفه وماأدري وش أسوي..من
اللي جاب هالناس كلهم..ووش عرفهم إننا نسرق البنك.. ووين راح
عكرمه.. وماذا تفعل أمريكا في العراق..وهل العرب مسؤلون عما
يحدث في العراق..هذه الإسئله وغيرها الكثير سنتطرق لها في
حلقة الإتجاه المعاكس القادمه(أعذروه يالربع..من الخوف ماعاد
يعرف وش يقول)ومن الخوف صرت أشوف الأشياء تـتحرك بالحركه
البطيئه..الطياره تتحرك فوقنا وصوت الطياره وحركة الشرطه
تحت..وسمعت صوت يقول..سلم نفسك يافليسكـو انت ومناحي المكان
محاصر ولاتجبرونا نستخدم القوه معاكم..!!

ونزلت أنا ومناحي مع المواصير اللين وصلنا تحت..وأول ماوصلنا
تحت..تجمعوا علينا الشرطـه وحطوا الكلبشات في يدينا بعد
ماأخذوا مننا أكياس الفلوس...وتجمعوا علينا مصورين القنوات
الفضائيه.. عشان يجرون معنا لقاء..وقام مناحي يسولف عليهم
ويقول..أهدي هذا الانجاز لحكومتنا الرشيده..ولقيادتنا
الحكيمه..كما أحب أن أهديه لأبي وأمي.. ولجميع الجماهير التي
وقفت معنا وساندتنا..!!وانا من القهر رفسته برجلي وقلت
له..خير يابوالشباب فايزين بكاس آسيا إحنا..ترانا حراميه
يالـــــــــ.....................!!

وبينما الشرطه ساحبينا عشان يركبونا في السياره لمحت عكرمـه
مكلبش وماسكينه إثنين من الشرطه..وترجيت العسكري اللي ماسكني
إنه يخليني أكلم عكرمه دقايق بس..لأني منقهر أبي أعرف وش
السالفه وكيف تجمعوا هالعالم..وبعد إلحاح وافق العسكري ووداني
عند عكرمه..وأول ماشافني عكرمـه قام يبكي ويقول..ماني مصدق
إني شفتك مره ثانيه يافليسكو..ماأقدر أمنع دموع الفرح بشوفتك
ياصديقي العزيز...قلت له..خلنا من هالخرابيط وعلمني وش اللي
صار وش اللي عرف الشرطه..وليش ما اتصلت وعلمتناإن الشرطه جت؟؟

نزل عكرمه راسه في الأرض وقال..بصراحه يافليسكو أنا سمعت صوت
إزعاج في البنك..قلت له..أيـوه هذا حارس البنك قومه مناحي
الثور لكني تصرفت وضربت الحارس..قال لي عكرمه..أنابصراحه
ياصديقي العزيز يافليسكو خفت عليكم..وحاولت أتصل عليكم لكن
الشحن حق بطارية جوالي انتهى..وماقدرت أتصل عليكم..وكنت
مرتبك..وفجأه شفت سيارة شرطه من بعيد..ولحقت سيارة الشرطه
ووقفتها..وشرحت للشرطي الوضع..وإن أثنين مـن أعز أصدقائي
دخلوا يسرقون البنك وتاخروا..واتصل الشرطي على مركز الدوريات
وبلغهم وتجمعوا كلهم عند البنك..وهذي كل السالفه ياصديقي
العزيز..!قلت له..ماشاء الله عليك ياخوي أنا ماأدري من وين
جايب هالذكاء والحكمه وحسن التصرف..أخوياك جالسين يسرقون
البنك وانت تروح تبلغ الشرطه عليهم........... أم الذكاء اللي فيك
ياشيخ..الله........... مخك يالبغل..قال لي..يافليسكو لاتغلط أنا
خفت عليكم.. خفت إنه يكون طبوا عليكم حراميه وانتم في البنك
وماكان قدامي إلاهالطريقه..!!قلت له..طبوا علينا حراميه
هاه..رايحين مركز صيفي إحنا..انا ماأدري انت من وين
تفكر..يعني بالله أنا ومناحي داخلين البنك آخر الليل وش
نسوي..يعني بالله تتوقع إننا داخلين نسدد فواتير الكهرب..أكيد
داخليـن لأننا حراميه وناوين نسرق البنك يالدبشه..قال
يافليسكو لوسمحت لاتقول عن نفسك حرامي انت أكبر من
كذا..ومهماكانت الظروف لاتقول انك حرامي...وجلس يبكي عكرمه
..!!

انا بصراحه ماعاد أدري وش أسوي هبلوا فيني هالأثنين
وجننوني..وقمت أشد شعري وأضرب نفسي ومره أضحك بصوت عالي ومره
أبكي..وضربت فيوزاتي..وسحبني العسكري وركبني السياره وانا
جالس أكلم نفسي وأصيح لازم تستمرالعصابه..!

وبعد ماركبوني السياره ودوني مستشفى المجانين بعد ماطير مناحي
وعكرمـه آخر خليه حيه في عقلي..أمامناحي وعكرمه فانقطعت
أخبارهم عني..بس حسب المعلومات اللي وصلتني وانا في المستشفى
انه انحكم عليهم بالسجن لمدة ثلاث سنوات لكل واحد منهم...بس
تبون الصدق..رغم إني في مستشفى المجانين وجالس بين
المجانين...بس والله ان هالمجانين أعقل من مناحي وعكرمه الله
لا يوفقهم..!!

واسدل الستار على أخطر عصابه في الشرق الأوسط
والعالم..العصابه العظيمه اللي ماسرقوا ولاشي.. العصابه التي
سيظل العالم يذكـرهالسنوات طووويله..العصابه التي قال
عنهاالشاعر العالمي كريستيان أبوللو (لاأحد يدقق..يعني مشيتوا
اللي فوق كله وتنشبون لي في هالأسم.!!)

ياماحلى السرقات مع سيحة البال*في عصابه مافيها نفس ثقيله
هذا مناحي وهذا عكرمه لابس الشال*وهذا فليسكو </A>اللي مافي
مثيله..!

موضوع: رد: قصة فليسكو ,قصه مضحكه 26/1/2012, 4:17 am

ههههههههههههه

مشــكووــره..يــأأذوووق.. علــ القــصــه..

دمــتــي.. ودأأمــت..لــنــأأ مــوأأضيــعــكــ..^ـــ^

موضوع: رد: قصة فليسكو ,قصه مضحكه 27/1/2012, 1:30 pm

شكرا ع الرد الجميل

موضوع: رد: قصة فليسكو ,قصه مضحكه 2/8/2012, 11:21 pm

وين الردوود

» قصه مضحكه
» قصة مضحكه
» قصه مضحكه
» قصص مضحكه مرررررررررررررررررررره
» قصه رعب مضحكه