بدي احكي الكم قصة من التراث الفلسطيني حلوة كتير و ياريت تعجبكم
كان يا مكان في قديم الزمان كان في وحدة اسمها كنفوشة وكان كل يوم جوزها يروح من الشغل ويصير ينادي عليها يا كنفوشة يا كنفوشة افتحي الباب وترد كنفوشة وتفتح الباب ,ومرة من المرات كان جوزها بالشغل وكان في زلمي (بياع متجول بس ما معه اشي يبيعه)بلف بالشوارع وبنادي معي اسماء للبنات حلوة للبيع واسعارها بتعجبكم,سمعت كنفوشة البياع وراحت تركض تنادي عليه ,وسالته عن الاسماء اللي معاه وعن سعر كل اسم وهو قال الها معاي اسم عيشة وحقه عشر دنانير ,قالت كنفوشة مادام بدي اشتري اسم بدي انقي اسم حلو هو انا كل يوم بشتري اسم ,اعطيني اسم احلى ,قال الها البياع معاي اسم حلو كتير بس غالي كتير سعره عليك قالت اله شو ,قال الها سارة وحقه 40 دينار ,قالت لا غالي كتير اشي ارخص لانه ما في معي بالدار الا 20 دينار قالهاطيب في عندي اسم مناسب الك وهو زينة الدار .فرحت كتير كنفوشة باسمها الجديد وراحت بسرعة تطبل ع اهل البلد وتقولهم عن اسمها الجديد و الحزين جوزها بالشغل ومش داري بالهبلة مرته شو بتعمل .ولما رجع جوزها من الشغل صار ينادي كنفوشة انا رجعت افتحي الباب ومات وهو ينادي وهي مش قابلة ترد تا شفقة عليه جارتهم وقالت اله انها مرته غيرت اسمها قام جوزها صار ينادي يازينة الدار افتحيلي هالباب ,قامت فتحت الباب بسرعة,ولما خرفته انها اشترت بكل المصاري اسم فقد عقله وقال الها صدقي ما انا راجع ع الدار تا الاقي في النيا وحدة اهبل منك ,وطفش مسكين من البلد وضل يمشي حتى وصل بلد بعيدة وكان عطشان كتير ومعصب وقرر انه يدق على دار يطلب شربة مية ,ولما دق الباب فتحت اله بنت وطلب مية وجابت اله, وهو بشرب قالت اله انت يا اخوي من وين قال الها من جهنم ,فقالت له امانة الله انت من جهنم طيب شفت امي وابوي هناك وكيف هم ان شاء الله بخير وان شاء الله مش ناقصهم اشي ,اذا وصوك يا اخوي تجيب الهم اشي ما تستحي قول ,فقال بعقلة فرصة اعوض اللي ضيعته الهبلة مرتي ,وقال الها اه بدهم شوية مصاري واكل ,قامت قالت اله في 40 دينار لاخوي محوشهن بده يتجوز فيهن بس ولا يهمك هسا بجيبلك اياهن وحملته السلام لاهلها ,وطلع من الدار وهو فرحان وبقول لحاله هاي في اهبل من مرتي انا لازم ارجع عندها,وبعد ما طلع من دار هالهبلة بخمس دقايق رجع اخوها ع الدار وقالت لاخوها اسكت من قبل شوي اجى واحد من طرف امي وابوي وطلب مصاري الهم واعطيته ,قال اخوها ولك انت مجنونة من وين بده يشوف امك وابوك ما هم ماتوا قبل عشر سنين,دليني من اي طريق راح تا الحقه قبل ما يهرب وجيبي الحصان اركبه ,وفعلا لحق ع الحصان يدور ع النصاب وهو بالطريق لقي زلمة قاعد ع طرف الطريق يتريح وما كان يعرف انه هاد هو النصاب وقال اله ما شفتليش واحد مرق من هون قبل شوية قال اله ليش بتسال قال في واحد نصاب ضحك على اختي واخد مصاري وقال الها بده يعطيهن لامي وابوي ,قاله النصاب امبلا قبل شوية مرق من هالطريق ,قام قاله طيب هسا انا بدي الحقه بالحصان وامسكه ,قال اله النصاب استنا يازلمة هات الحصان امسكلك اياه وانت الحقه مشي لانه الحصان اله اربع اجرين وبطول وهو يقيم اجر ويحط اجر اما انت الك اجرتين وبتلحقه اسرع ,قاله الاهبل اخو الهبلة والله حكيك مزبوط امسك الحصان وهسا برجع الك,وراح مسكين يركض مشي. قام النصاب قال الحمد لله هاذ انا باقي بعز على القليل مرتي هبلة شوية مش زي هاذول جوز المجانين وركب ع الحصان ورجع لزينة الدار ومعه40 دينار وحصان وقال الها اتاريه في ناس اهبل منك.................لف كتير بتشوف كتير.................. وتوته توته خلصت الحدوته.[b][i]
مع تحياتي للشعب الفلسطيني ولكل الشعوب العربيه
اختكم : لمار الووووورد
Hitskin.com
موضوع: قصه من التراث الفلسطيني روووعه ومضحكه 
