الحـب ما يسـكن قـلوب ومـحاني
الحب أسمى عاطـفه تسـكن الروح
يا حبّـك اللي كل ما اظـما سقاني
سراب لال ودرب مهجور ونزوح
ما اقـول منـك اللي لفاني كـفاني
لانـّي أحبّـك هجـر وعـناد وجروح
إن غبت عنـّي طال عمر الثواني
تـقول عـمر الثانـيه من عـمر نـوح
وان جـيتـني مـرّت ليالي زماني
ما كنـّه الاّ الـبـرق بعـيـوني يـلـوح
قبل الجفا عـذرك سبقـني وجاني
لا تعـتـذر ذنبـك من العـام مسـموح
أبني على شوفك صروح وأماني
وشلون ما تبني على شوفي صروح
إن كان غيري عوّضك عن حناني
ما عاضني غيرك من الغـيد مملوح
إنت الأخـيــر .. وإنـتـه الأوّلانـي
لو كان حبّـك حد قلبي على الصوح
والله ما بـاح بـغـرامـك لـسـانـي
إلا عـيـوني يوم يـطـرونـك تـبـوح
كتمت سرّك لين دمعي عـصاني
راعي الهوى لو يكتم السر مفضوح
لا تـلوم قـلبٍ جـر فـيك الأغـاني
حتى الحـمام يجـرّه الشـوق ويـنوح
