المكونات
مقادير العجينة:
4 كوب دقيق
½ ملعقة كبيرة خميرة فورية
½ كوب زبدة سايحة
ملعقة صغيرة ملح
2 بيضة مخفوقة
مقادير الحشو:
½ كيلو لحمة مفرومة
ثمرة طماطم مقطعة قطع صغيرة
2 ثمرة صغيرة بصل مفروم
ملعقة كبيرة زبدة
ملح وفلفل
للتزيين:
بيضة مخفوقة مع ملح وفلفل
حبة البركة
طريقة التحضير
1- اخلطي الدقيق مع الملح، وبعد كده اعجنيه مع السمنة والبيض المخفوق، لغاية ما تتكون عجينة متماسكة.
2- دوبي الخميرة في ربع كوب ميه دافية وسيبيها لغاية ما حجمها يزيد، وبعد كده ضيفيها على العجينة واعجنيها كويس مرة تانية، وسيبيها في مكان دافي لمدة نص ساعة تقريبا لغاية ما العجينة تخمر.
3- لتحضير الحشو؛ شوحي البصل مع الزبدة على النار وبعد كده ضيفي عليه الطماطم وقلبيهم مع بعض شوية لغاية ما الطماطم تتسبك، وبعد كده ضيفي عليهم اللحمة المفرومة، وقلبيهم مع بعض وسيبيها على نار متوسطة لغاية ما اللحمة تنزل الميه اللي فيها، وبعد كده تبليها بالملح والفلفل والبهارات، وسيبيها لغاية ما تستوي، وارفعيها من على النار.
3- بعد ما العجينة تخمر، قطعيها دواير صغيرة، وافردي كل قطعة بالنشابة، وبعد كده ضيفي على كل قطعة ملعقة صغيرة من الحشو، وبعدين طبقي كل أطراف العجينة على الحشو على شكل مستطيل.
4- رصي الفرموزا في صينية مدهونة بالسمنة، بحيث تكون أطراف العجينة لأسفل، وادهني الوش بالبيضة المخفوقة وزينيها بحبة البركة، وبعد كده دخلي الصينية في الفرن لحد ما قطع الفرموزا وشها يحمر، ورصيها في طبق التقديم، وزينيها بشرائح الطماطم.. وبالهنا والشفا.
