قالت ترى منت بحلو قلت رجـال
والزين ماهو من شروط الرجولـه
ـ ـ ـ ـ ـ
الزين يلقى عنـد لباسـة الشـال
والرجل زين ان كان زانت فعوله
ـ ـ ـ ـ ـ
قالت علامك تلبس شماغ وعقـاال
انت بدوي؟ قلت بدوي ومن حموله
ـ ـ ـ ـ ـ
ما ألبس بناطيل لها الوان واشكال
وامتر الشارع بعرضـه وطولـه
ـ ـ ـ ـ ـ
قالت اجل راعي معاميـل ودلال
شرب القهاوي تحسبونـه بطولـه
ـ ـ ـ ـ ـ
كيفي يابنت الحضر دله وفنجـال
وحليب خلفـه بالمـراح معقولـه
ـ ـ ـ ـ ـ
وحب الكرم والجود وعلوم الابطال
مغروس فينا من زمـان الطفولـه
ـ ـ ـ ـ ـ
قالت ترى بنت البدو حظها مـال
قلت احذري حذرا تكوني جهولـه
ـ ـ ـ ـ ـ
بنت البدو يابنت مضرب للامثـال
فوق الجمال وطاعة الله خجولـه
ـ ـ ـ ـ ـ
ماحطة اصباغ ولا حطت ظـلال
ولا سيرة بالسوق سيـر مهبولـه
ـ ـ ـ ـ ـ
هي مهرة تصعب على كل خيـال
وانتي ومثلك عسفهـن بالسهولـه
ـ ـ ـ ـ ـ
قالت تغزل بي وشف حبة الخـال
ناظر عيوني والرموش الكسولـه
ـ ـ ـ ـ ـ
قلت العفو مايجتمع حـب وهبـال
ولكـل ذوق فالمـــزاييـن جـولـه
ـ ـ ـ ـ ـ
قلتي وقلت وكلمة الصدق تنقـال
الزين ماهو من شروط الرجولـه
