السلام عليكم ورحمة الله كل عام وأنتم بخير ربنا يبلغنا رمضان على خير ان شاء الله مقادير كيك السويسرول: 5 بيضات كبار(البياض مفصول عن الصفار) كوب الا ربع سكر بودرة فانيليا رشة ملح 3 ملعقة كبيرة كاكاو 3 ملعقة كبيرة دقيق دى المقادير
طبعا الكاكاو مخلوط مع الدقيق الكيكة دى اسفنجية لا فيها بيكنج بودر ولا زبدة الطريقة اول حاجة فى بولا بلاستيك هنضرب بياض البيض مع رشة الملح لغاية مايبقى مارينج ابيض ويبقى عامل زى التلج
وفى بولا تانيه هنضرب الصفار مع الفانيليا ونحط عليه السكر البودرة بالتدريج على 3 مرات لغاية مايبقى لونه ابيض وهش وده شكل الصفار بعد ماتضرب مع كل كمية السكر البودرة هنبدء نضيفله المارينج(بياض البيض)على 3 مرات ونقلبهم بخفة شديدة من تحت لفوق عشان نحافظ على كمية الهواء اللى فى الخليط
وده شكل بياض البيض مع الصفار لما قلبناهم وخلصت كمية المارينج اللى عندنا هنضفلهم الكاكاو والدقيق بردو على 3 مراحل بالتدريج وبردو نقلبهم بخفة شديدة من تحت لفوق لغاية ماالخليط يمتزج ونتأكد ان مفيش اى تكتلات للدقيق والكاكاو كده بقى الخليط جاهز عندى هنحط الخليط فى صينية خبز متبطنة كويس بورق الزبدة ونحاول نساويه فى الصينية على قد مانقدر حطيت الكيك فى الفرن على حرارة منخفضة لغاية ماتم السواء واول مايطلع من الفرن نغطيه بفوطة او ورق زبدة عشان مينشفش وبعد كده نقلبه ونشيل من عليه ورق الزبدة بحذر ونبدء نحشيه باللى احنا عايزينه انا حشيته كريم شانتى وفراولة(لأنى طبعا عايشة فى بلد الفراولة فلازم استغلها) بالنسبة لطريقة اللف انا شفت كزا فيديو على اليوتيوب عن السويسرول وطريقة لفه وفعلا الطريقة نجحت معايا انتو بتلفوه بالعرض بورق زبدة وممكن بعد كده تحطوه فى التلاجة عشان يتماسك اثناء التزيين والتقطيع وممكن لاء انا زينته بفراولة وصوص شوكولاته وشوكولاته مبشوره وده شكله النهائى
