السلام عليكم ...

قصه جديدة .. وان شاء الله تعجبكم ..

واتمنى الاقي منكم ردود وتعليقات

الجزء الأول

حلا بنت في اولى جامعة .. عايشة مع ابوها وامها وماعندها الا اخت وحده اصغر منها .. اسمها شوق ..

ملامحها ناعمه اذا كانت ساكته تفكر أو تتأمل .. تطلع جذابه .. واذا ابتسمت او ضحكت واستحت .. تبين عليها براءة مو طبيعية

, شعرها أسود وكثيف .. لكنه مو طويل مره ..

نحيفة شوي , وطولها متوسط ..

تحلّيها روحها .. !

يعني الواحد لما يجلس معاها ويعرفها , تحلى بعينه زياده من شفافيتها ..

جمالها الداخلي يطغى على الخارجي ..

توها السنة داخلة أولى جامعة .. سجلت في كلية العلوم .. ماتدري هي بتستمر فيه ولا بتحوّل .. !

مرّ من السنة الدراسية اسبوعين بس ..

وطاح ابوهم في المستشفى فجأه , وبدون سبب ..

حلا : هلا والله بأحلى صديقة في الدنيا

غدير : هلا والله ياقلبي انتي , شخبارك ؟

حلا : تمام الحمد لله انتي كيفك

..... : الحمد لله , شخبار ابوك ان شاء الله صحته أحسن الحين ؟

..... : الحمد لله يتحسن , انا الحن في السيارة رايحة له المستشفى مع امي وشوق

...... : طيب اخليك الحين , سلمي على امك

..... : وش فيك انتي هبله سولفي عادي

..... : ترا ماعندي شي بس قلت بشوف شخبار الجامعة معك ؟ ( غدير داخله علوم صحية)

...... : اسكتي بس ترا ودي ارجع للثانوي مو متأقلمه مع الوضع ابد

...... : لا حرام عليك والله الجامعة احلى بكثير بكثير , تحسين انك فتاة ناضجة

...... : هههههه لا ابشرك مازلت احس اني بزر , ما نضجت او عقلت

........ : لا ان شاء الله يارب تعقلك الجامعة

........ وهي تاكل حلاوة خذتها من عند شوق : يصير خير , غدير عندي حلاوة تبين ؟

........ : وش اللي يصير خير شكله مافي امل تعقلين , شوق اكبر منك هههههههههههههههه

....... : هههههه غدير عادي , اسمعي انا وصلت الحين بنزل من السيارة , يللا مع السلامه

...... : اوكي الله يقوم ابوك بالسلامه , اشوفك على خير ..


سكرت حلا من صديقتها , خذت شوق اختها ونزلتها من السيارة

ام حلا : حلا حبيبتي اسمعي , لازم مانطول عند ابوك

حلا بخوف : ليه ابوي فيه شي ؟

...... وهم يمشون للغرفة : ها ؟ لا مافيه شي بس مو زين الزياره الطويلة له ..

حلا بأسف : طيب

دخلت حلا على ابوها وحبته على راسه : شخبار باباتي اليوم ؟

ابوها بتعب : هلا بنتي هلا والله

حلا دفت ابوها شوي وانسدحت على طرف السرير جمبه : يللا بابا متى تصير اوكيه وترجع لنا ؟

ام حلا : حلا وخري عن ابوك شوي تراه تعبان مو تلصقين فيه , شوق اللي عمرها 5 سنين ماسوت مثلك

حلا بزعل : شفيها ماما والله مشتاقة له ,( وتطالع ابوها ) بابا انت متضايق مني ؟

ابوها : لا طبعاً بالعكس مبسوط , بس امك غارت ودها لو انها مكانك

ام حلا استحت : محمد بس عاد

شوق طبت على السرير : بابا انت شفيك ؟

محمد طالع في منيره ام حلا بعدين قال : بس السكر مرتفع عندي شوي

شوق طالعت في حلا يعني مو فاهمه ,

حلا ابتسمت : شوق تعالي ننزل الكافتيريا , نخلي ماما وبابا مع بعض شوي لحالهم

محمد : شيطانه يا حلا , كنك تدرين ان عندي كلام لأمك ..

حلا وهي تحمل شوق وتضحك : كلام العين , بيحكي عن اللأشواق , دليلي ... ( وطلعت وهي تكمل الأغنية ... )

كانت حلا ماسكة شوق وتمشي فيها لين الكافتيريا , حلا كانت تتحجب ,واحيانا تقط الطرحة على وجهها , ابوها وامها فري حيل , بس نظراتها البريئة تحب تتلفت على كل شي حولها ,,

شافت ممرضة ماسكة تقارير وتمشي , تخيلت صديقتها غدير تصير كذا بيوم من الأيام ..!

وتذكرت نفسها ..

وشو طموحها ؟ هي حتى تخصصها ما تدري وشو .؟

وش ممكن تطلع ؟ ممرضة ولا مدرسة ولا موظفة ..!

وش الأنسب لها .. وأريح لها ..

التفتت حولها دقيقة , فقدت شوق ..

اوووو هذي وين راحت ..

ياربي انا شلون ماحسيت بيدها تفلت من يدي ..!

وسّعت حلا خطواتها .. لأقرب رسبشن , وكان فيه موظفه تشتغل ..

حلا :hello excuse me have yiu seen a little girl ?

الممرضة : I am sorry , you can ask that security

راحت حلا من عندها .. للموظف اللي واقف يطالعهم من بعيد

حلا : لو سمحت اخوي , ماشفت بنت صغيرة شعرها قصير ولابسة وردي ؟

يسلمو

شكلك بغيتي تكملين

وخربت عليك؟؟

..... : وين تركتيها .؟

......: تو , كانت جمبي هنا ..

..... : طيب تفضلي ارتاحي هنا وانا ادورها لك ..

...... بتردد : طيب

وقفت حلا فتره , شافت الرجال ماجا , قالت شكله يستهبل او مالقاها , اقوم ادور عليها بنفسي احسن ..

راحت تدورها في الجهة الثانية ,, مالقتها

بس شافت الموظف اللي كلمته قبل شوي , وهو جا عندها بس من بعيد قال : لو سمحتي , اختك اسمها شوق ؟

حلا : ايه , لقيتوها . ؟

الموظف : دقايق بس

غاب عن نظرها وهي واقفه تنتظره بكل صبر وخوف ..

جا شايل شوق بيدينه وهو يمسح على شعرها : خلاص حبيبتي لا تصيحين , هذي اختك شوفيها شوفيها

ويلف راس شوق عشان تشوف اختها ,,

طبت شوق من حضن الموظف مشاري وراحت تركض عن حلا : حلا .. حلا

حلا ضمت شوق : وينك فيه حبيبتي ليه رحتي عني ؟

شوق تمد يدها اللي لونها يروّع : سوفي سكّر علي السنسير

حلا بخوف : إه ,انتي دخلتي الأسانسير ؟

الموظفة اللي كلمتها قبل شوي : you shoud not leave her alone

حلا طالعتها بدون اهتمام , شتبغى هذي تلومني موب وقتها ابد

مشاري الموظف يكلم الموظفة : روحي انتي مالك دخل خلاص , اختي تحبين نوديها عند الدكتور يشوف يدها ؟

حلا بكل عفوية والدموع شوي وتطلع من عينها : أي أي يللا

بكل تلقائية حلا شالت شوق , صحح ان عمرها سنوات5 لكنها نحييفه وخفيفة ,, وتعطي اصغر من عمرها

مشاري وهو يمشي قدامهم التفت على حلا وقال بدون مايحط عينه بعينها : هاتي اختي , عنّك .

حلا : لا لا , مافي داعي , مشكور

وقف لحظه وابتسم , وقال : شوق حبيبتي تعالي , بشيلك على اكتافي

شوق من يدين حلا : انت حلو ؟

مشاري : ايه , ماخوّف , تعالي يللا بنروح الدكتور

نزلت شوق من حلا وراحت لمشاري , ومشاري في باله حلا , نحيفه وشكلها تعبانه وشايله ذا البنت , والعيادة بعيدة , وذا البنات من يشيلون شي قالوا ظهري وظهري ..

حلا ماستغربت تعلق شوق المفاجئ بمشاري , كذا شوق , تنشب في أي احد ..

راحوا عند الدكتور وتطمنت حلا على شوق , ونزلت معاها الكافتيريا شوي , بعدين رجعت لأبوها وأمها بالغرفة

ام حلا : يللا حلا نمشي

حلا : يوه لسّى ما جلست مع ابوي تو الناس

ام حلا : معليش حبيبتي , ابوك يبغى يرتاح , ( تقطع جملتها وعيونها على شوق) وش فيها يد اختك ؟

حلا قالت لها السالفة

منيرة : وينك عن اختك مانتبهتي لها .؟ اكيد تتمشين وتطالعين في الناس وتاركتها بلحالها

محمد : بس منيره , خلي البنت اكيد مو قصدها , يعني بتتعمد تهمل البنت ؟

منيرة تضايقت شوي وحلا سكتت , ماتبي تجيب طاري ضيعة شوق ومشاري والزحمة كلها

طلعت من المستشفى وهي في بالها ..

امي دايم محملتني مسؤلية اكبر من مسؤليتي ..

ليه تنتقصني وتتهمني بالإهمال ..!

والله إنها ماتهتم بشوق كثر ما أهتم فيها أنا .. !

خليها عى الله .. تبقى امي ,, وماقدر اقول شي ..

ركبوا السيارة ووصلوا البيت ..

وكانت حلا جالسة في الصالة مع امها , وجا في بالها سؤال .. ترددت تسأله , بس قالت بعد شجاعة ..

ماما , عمامي يدرون ان بابا في المستشفى ؟

منيرة وبين انها تضايقت م السؤال : ليه تسألين ؟

حلا : ابغى اعرف , هم مقاطعينا ما قلنا شي , بس على الأقل مايزورون اخوهم بالمستشفى ؟

منيرة : مادري عنهم

حلا وبكل براءة : طيب هم ليه أصلاً مقاطعينا ؟

منيرة حطت الريموت على الكنبة وقامت : اوف حلا ابلشتيني , لا قام ابوك أسأليه , تكفين انتي لاقيه شي من عمامك الحين , خليهم مقاطعينا أحسن ..

( وقالت وهي تحط خطواتها على الدرج : انتبهي لاختك وهي تلعب , مو تسهين عنها ويسكر عليها باب ولا شباك , تراها لسّه بزر .. )

تنهدت حلا بضيق , بس تحاول تخفي ضيقتها هي لانها عارفه اسوب امها : ان شاء الله ..

مرت ايام ومحمد ابوها ما زال في المستشفى , وكل الرجال رايحين جايين عليه , إلا اخوانه مابين أحد منهم ..


صارت الساعة 6 ونص , رجعت حلا للبيت وهي تبتسم ..

انسدحت على السرير وهي ضامه دبدوبها .. تتذكر مشاري ...

شافته شوق اليوم , وركضت له , سلم عليها بعدين جا لحلا وسلمها اياه

مشاري : شوق يللا روحي لاختك

شوق : طيب , مع السلامه مشاوي ( تنطق الراء واو )

حلا ماقدرت تمسك نفسها وضحكت : هههههههه

مشاري التفت لمصدر الضحكة بعدبن نزل عينه على شوق : يللا مع السلامه


مع انه ماقال لها شي , بس التفت عليها طاح وجهها من صوت ضحكتها , لانها متقدر تمسك نفسها وتكتم ضحكتها ,وتطلع عفوية وبريئة , شبيهة بضحكة الأطفال ..


طقت منيرة الباب , وجات جلست على السرير ..

منيرة : حلا وش كنتي تسوين .؟

حلا : كنت قاعده أدرس , طفشت وانسدحت على السرير شوي

منيرة : حلا اسمعيني , بقول لك شي بس ترا مفروغ منه .. مافي مجال للنقاش والجدال ,, واللي نقوله انا وابوك يصير ..

طيب ؟

حلا بخوف : وشو ؟

منيرة : اسمعي , ابوك لازم يسافر برا يتعالج ,,

حلا : ليه ماما ابوي وشفيه , انتي قلتي ان مافيه شي

منيرة : لا بس عملية بسيطة وسهلة , وبيسافر برا بعد ثلاث ايام ان شاء الله

حلا وقفت من مكانه : احس انكم مخبين علي شي , بعدين ليه يتعالج ابوي برا , مستشفيات المملكة مافي احسن منها , والرياض مليانه مستشفيات كل واحد ازين من الثاني .

منيرة : قلت لك ابوك ماعليه الا العافيه ان شاء الله , بعدين هو محتاج يغير جو

حلا : طيب ؟

...... : بسافر أنا معاه , لازم يصير معاه أحد , وانتي عندك جامعه شلون تتركينها اسبوع ؟

حلا باستغراب : وشلون يعني ماني رايحه معكم ؟

...... : لا طبعا , انتي وشوق تقعدون هنا , بس لا تخافين مو بلحالكم , خبري فيك بزر وتخافين , انا كلمت خالتك عزيزة وقلت لها ورحبت فيكم , تسكنون عندها إلين نرجع انا وابوك ان شاء الله ..

قالت حلا وهي مقهوره ودمعتها على خدها : وش دعوه يعني تخليني عند اغراب وتروحين , مابيفرق لو اعتذر من الجامعة , كله يهون عشان بابا

منيرة : اوه لا تقعدين تصيحين علينا , بعدين خالتك عزيزة ماعندها مانع وطيبة وحبوبة , والله تحطك في عيونها , بقية خواتي اعرفهم , يمنّون عليك لو تطلبينهم كاس مويه

حلا : ماما , والله بضيق عليهم !

...... : انتي تدرين ان خالتك مطلقة وعايشه لحالها مع عيالها

...... : أي ادري , بس عندها ولد كبير , احس احراج , والله فشله اني احكره

...... : وش تحكرينه , طلال اصلا موب فاضي لأحد , همّه على دراسته , بعدين والله طلال طيب ومحترم , يعني اقدر أأمنك عندهم , لو تطلبين أي شي يجيبون لك اياه .. من طيبة قلبهم وذوقهم ,,

ومنال اخته مافيها شي , صحيح ان علاقتكم مو قوية مره , بس تقوى مع الأيام اذا رحتي عندهم ..

حلا ساكته ومتربعه على السرير وحاضنة المخده وماسكه نفسها , ومو مقتنعة بالموضوع .. ماتبغى

هي تعرفهم صح .. وتعرف شخصياتهم وطيب اخلاقهم وذوقهم ..

بس ولو , قوية انها تروح تسكن عندهم ف البيت ..


منيرة : المهم جهزي لك انتي واختك كم غرض , عشان تروحون بيت خالتك يوم الاثنين ..

طلعت منيرة من الغرفة وحلا رمت نفسها على السرير تصيح ..

بعد فترة , دق جوالها

حلا : هلا غدير كيفك ؟

غدير : ليه صوتك متغير ؟ فيك شي ؟ ابوك فيه شي ؟

...... : لا مافيه ( وقالت لها السالفة )

غدير : عادي والله حلا مافيها شي , انتي تمونين عليهم , وبسهوله تدخلين معاهم جو , بالعكس تعرفي عليهم زاده وقوّي علاقتك فيهم , مهما كان هذلي اهلك ..

حلا وهي تصيح : طيب , ليه امي تسوي كذا ؟ احس احيان كثير تستثنيني من حياتها , ولا حياة ابوي , تتصرف فيني زي ماتبي ..

حتى سوالفي ماتعجبها ..

تشوفينها حليوه وحبوبه بعدين تقلب بعد فترة

غدير : حلا , هذي امك , لا تقولين عنها كذا .. الحين وسعي صدرك وجهزي ملابسك , انا بسكر بس قلت اطمن عليك ..

حلا : اوكي حبيبتي مشكوره , باي

الجزء الثاني

دخلت منيرة بيت اختها عزيزة ,, ووراها حلا وشوق , بخطوات خجولة
منيرة : لا وصّيك على بنتي ها ! انتهبي لها
عزيزة : افا عليك احطها بعيوني الثنتين .
حلا استحت وابتسمت بطفولة : مشكورة خالتي ماتقصرين
جلست حلا على الكنبه بعباتها وطرحتها , ودخلت في سوالف مع منال , انبسطت عليها ..

وشوي الا دخل طلال للصالة ..

راح وحب راس امه وسلم على خالته

عزيزه : طلال , هذي حلا بنت خالتك وهذي الصغيرة اسمها شوق

طلال وقف قدام حلا وقال بكل تلقائية :هلا حبيبتي حلا , في صف كم أنتي ؟ ( فكر شوي وقال ) ثالث متوسط صح ؟

الكل ضحك الا طلال وحلا اللي كان طايح وجهها بس حبت تسوي جو وقالت : دبّ , انا بأولى جامعه

طلال فتح عيونه على الآخر والتفت على منال : من جدها هذي ؟

منال : أي طلال وشفيك ؟

طلال : سبحان الله تركض السنين ..! ( وشال شوق وحبها ) أي هذي اذكرها دايم اشوفها , اما حلا مانشوفها دايم ( والتفت عليها ) ليش حلا ؟

منال : موجوده , بس انت دايم عند عمامي ..

طلال : طيب انا طالع ابدل , حلا خذي راحتك ..

عزيزة استأذنت وطلعت ورا طلال لغرفته ..

عزيزة : طلال لو سمحت , ابيك كذا تمون عليها , اعتبرها اختك , لا تبين لها انك مستحي منها تستحي زياده

طلال : عادي يمه تبيني استأجر شقه او غرفه في فندق عشان تاخذ راحتها احسن

عزيزة : لا والله تزعل , وتتضايق أكثر بعد , خلنا بطبيعتنا أحسن , بس انت تصرف على طبيعتك سولف ودردش بس بحدود ها ؟

طلال : افا عليك يمه انتي قاعده تحرصيني ؟ هذي حسبة منال ! إلا تعالي يمه , من جدكم هذي صارت بالجامعة ؟

عزيزة : شفت شلون ؟ الله يالدنيا .. يللا حبيبي بدل ملابسك وارتاح شوي ..

طلعت عزيزة من عنده وظل يتذكر ..

يوم كانوا صغااااار , خطبوا له حلا , بس كذا يستهبلون , وسمّوهم لبعض ..

بس الحين وييييييين , ماتوقع حتى حلا تتذكر السالفة .. !


بدل طلال ملابسه , وانسدح على السرير ..

جلس يفكر في بنات خالته .. حلا وشوق ..

هو مو متعود يسولف كثير مع بنات خالته او يحتك فيهم ..

ودايم مع عمامه ..

دخل يدينه ورا المخده وهو يطالع السقف ويفكر .. كيف بيتأقلم معاهم , ويريح بنت خالته ومايحسسها انها غريبة عنهم ..

وخاصة انه الرجال الوحيد في البيت , بيصير مسؤل عنها بعد ..

بس شكلها ماودها تجي عندنا , شكلها منحرجة أو مغصوبة علينا ..

يللا .. مابيدها شي , اكيد ما جات عندنا برغبتها , خالتي منيرة واعرفها , تسوي اللي براسها ..


في نفس البيت بغرفة منال : حلا اذا ماودك تقعدين لحالك تعالي عندي بالغرفة ترا والله أطفش بلحالي

حلا منحرجه : عادي والله أي مكان

عزيزة : حلا حبيبتي الغرفة اللي اغراضك فيها والله مو غرفة احد , كلها حلالك انتي وشوق , ومعاها حمام بنفس الجناح , خذي راحتك .. واي شي تبينه لا يردك الا لسانك

منال تروح يم حلا : ايه معليه بس تسهر معاي بالغرفة تونسني شوي وتجلس معاي , وغرفتها بس وقت النوم
ولا اقول لك حلا , جيبي اغراضك هنا

حلا تضحك : خلاص عادي والله بقعد معك بس اخاف اجيب اغراضي نحوس عليك الغرفة انا وشوق

عزيزة : معليه منال خليها على راحتها , يللا انا نازلة تحت

منال كانت جالسة على السرير وقالت وهي تطرقع اصابيعها وتبتسم : يللا سولفي

حلا طبت على السرير بكل براءه : انتي سولفي انا ماعندي شي

منال : طب اول شي فكي حجابك ترا طلال مايدخل بدون مايدق الباب ..

حلا فكت طرحتها علطول : فشله في اخوك الحين ماياخذ راحته حتى في بيته

.... : ماعليك منه , ترا هو يمون عادي . بعدين انتي تتحجبين اساساً يعني عادي ..

حلا وهي تفكر بعمق : طيب , وين شوق ماشفتها ؟

...... : تلقينها عند امي او طلال , تعالي نروح الصالة نشوفها , أي صح , عندك بكرة جامعة ؟

...... : ايه عندي

...... : السواق يوديك ؟

...... : ايه

...... : طيب تعالي معنا لا تروحين بلحالك مع السواق

حلا وهي تبتسم : عادي , متعوّده

منال : انتي كذا فري الموضوع عندك عادي ؟

حلا : مدري , امي وابوي عودوني كذا, بس مايفرق معي صراحه ..

....... : طيب , تعالي معنا والله تنبسطين , ترا طلال في السيارة يوسع الصدر ..

...... وهي تمشي مع منال للصالة اللي في الدور الاول : لا مشكورة , بنتعب طلال , انتي بعليشه وانا بالملز .. مشواااااار ( وضحكت ببراءة ) الحين توقف السيارة بنص الطريق ويخلص البنزين

منال : امشي بس يالخبلة ..

شوق من شافت اختها داخلة الصالة .. قامت من حضن طلال وركضت لاختها

حلا تشيلها : هلا حبيبتي

شوق : حلا انا وطلال لعبنا بالتلكيبات ( تركيبات )

حلا بعفوية : والله ؟ سويتوا اشكال شوي ولا كثير ؟

شوق تركض لعند طلال وتطل فوجهه : طلال كم وحده سوينا ؟

طلال يضحك : ثلاثة , حلا ,منال تعالوا العبوا معنا

منال جلست على الكنبة ومسكت الريموت بتفتح التلفزيون

طلال حس ان حلا ودها تلعب معهم بس مستحيه لحالها ,,

التفت على منال وقال : منال اتركي التلفزيون وتعالي , حلا شكلها ودها تلعب بس مستحية ( وابتسم )

حلا ببراءة : لا والله انا ماقلت كذا

طلال : عادي وشفيك مافيها شي شوفي انا كم عمري وجالس العب

منال جلست جمب طلال وشوق على الأرض وقالت باستهبال : حلا اجلسي , ترا الألعاب هذي كلها حقة طلال , لا طفش يلعب فيها ..

طلال : نصابة ماعليك منها

عزيزة جاية من الغرفة : ها شوق تلعبين مع طلال ؟ حلا اجلسي ليه واقفه ؟؟


جلست حلا جمب منال من الجهة الثانية وهي متطمنة , طلال شكله طيب حيل , ومنال بعد .. من اولها حبوا شوق وخذوا عليها .. الحمد لله

عزيزة جلست جمبهم : حتى انا بعد بلعب معكم

طلال : عرفتي حلا ليه انا شاري الألعاب ؟ عشان امي توسع صدرها شوي عقب المطبخ والشغل

عزيزة تدفّ طلال اللي كان يضحك على امه وهي معصبة : بسّك عاد , العب وانت ساكت , وعطني اللون الأخضر اللي عندك

الكل ضحك على عزيزة , واولهم حلا : خالتي والله انكم توسعون الصدر .. الله يديم عليكم جمعتكم ووناستكم

عزيزة : الحمد لله انبسطتي علينا

منال : ايه اشوى على بالي انها اول ماتجي بتقفل على نفسها الغرفة وماتطلع إلا بالموت

حلا ابتسمت ونزلت راسها


وطلال في باله مرتاح , انها دخلت جو معاهم علطول , شكلها اجتماعية وحبوبة , وروحها حلوة , والحمد لله , شكلها تستحي حيل , بس تحاول انها ماتبين هالشي , بعفويتها وبرائتها تغطي على هالشي ..

عزيزة وهي تقوم من الأرض : يللا انا بروح انام , تصبحون على خير

شوق طبت على خالتها وباستها : تصبحين على خير

حلا ضحكت .

عزيزة : ياحلوك بس , تعالي حلا , انتي عندك جامعة بكرة ؟

حلا : ايه , بروح ان شاء الله

منال : يمه شوفي حلا , تبي تروح مع السواق

طلال : خير حلا ؟ تروحين مع السواق وانا موجود ؟

عزيزة : لا يابنتي , طلال يوديك مع منال بكره

حلا وهي منحرجه : لا خالتي مشكورين مابي اتعبكم .بعدين انا مو بنفس جامعة منال , مشوار عليكم

طلال : لا مشوار ولا شي , مافي روحه مع السواق لحالك

حلا طالعت طلال بعدين لفت عنه ماتبي تحط عينها في عينه : خالتي والله احرجتوني بطيبكم ماله داعي , سواقنا موجود وامي قايلة له

طلال وهو يقوم قال : خلاص حلا , بتروحين معانا , وانا اكلم السواق واقول له .. بس استعدوا ( ويلتفت على منال ) قوموا مبكر لاتطفشوني .. ترا ماحب انتظر

حلا ومنال : ان شاء الله ..


ثاني يوم الصبح , الساعة 5 ونص ..

فتحت حلا عيونها على صوت منال تصحيها : حلا , قومي يللا صارت 5 ونص ..

حلا : مابي اروح الجامعة ابي اسحب , ابي اناااااااااام

منال : على كيفك هو لعب الموضوع ’ قومي يللا البسي لا يعصب علينا طلال

حلا وخرت اللحاف عنها ومازالت منسدحة ماودها تقوم : شوق .. صحت ؟

منال : لا لسّه

حلا : طيب خلاص لا تصحينها , ابي اروح وهي مازالت نايمة , الحين تشوفني وتتعلق فيني ..

منال : طيب , قومي يللا من السرير .

سحبت نفسها من السرير , وراحت الحمام , شالت عبايتها ولفت الطرحة وطلعت من الغرفة ..

حلا راحت الصالة : خالتي , منال

طلال من الجهة الثانية في الصالة : هلا , تعالي , بغيتي شي ؟

حلا بحيا وهي واقفه عند الباب : بغيت خالتي ,

طلال : روحي لها الغرفة

حلا ورّدت خدودها : لا خلاص شكرا

طلال : تعالي , مستحية تدخلين لها ؟

حلا ابتسمت : لا خلاص ماله داعي ..!

ترك طلال المجلة اللي بيده , وقام من طوله وراح وقف عند حلا ..

: لا تستحين حنا اهلك , قولي شبيغيتي ؟

حلا باحراج لان طلال ماكان قريب منها مره , بس مافي الا هم لحالهم : لا بس يعني .. ابي اعرف وين المكوى , ثيابي ماكويتهم ..

طلال ابتسم , وطلع من الصالة وطل من الدرج : جميله .. جميلة تعالي فوق

حلا , روحي جيبي ملابسك

حلا ببراءه : ليه ؟

طلال : جيبيهم بس

راحت حلا جابت بلوزتها وتنورتها

طلال مد ايده بحركه تعني ( عطيني) , وخذ الملابس وعطاهم جميله الخدامه

وقال وهو يأشر على حلا : جميله , هذي حلا she is my cosint , أي شي تبغاه سوي لها اياه , اكوي هذي الملابس بتطلع الحين .

جميلة : اوكي ..

التفت عليها بدون مايطالعها لانه حس انها مستحيه : شفتي ؟ كلنا اهل , واي شي تبينه لاتترددين ..

حلا استحت ومشت

راحت لغرفتها , وشوي الا طقت منال الباب ودخلت : حلا تعالي غرفتي نحوس بخششنا مع بعض

حلا بحماس : يللا جايه

راحت حلا عند منال وقعدوا يصلحون شعورهم ,

منال تحب تحط في الجامعة فاونديشن وكحل واحيانا روج , وتلبس اكسسوارات كثيره

حلا بسيطة , تحط فاونديشن وكحل , وبس جلوس , وتلبس اكسسوار قليل , عقد او حلق بس .. !

ضبطوا اشكالهم , والاخت الخدامة تكوي على راحتها

حلا : خالتي صحت ؟

منال : ايه بالصالة

حلا : تعالي معي ابي اسلم عليها

منال : يللا امشي ,

دخلوا الصالة وكانت عزيزة جالسة على الكنبة وطلال جالس جمبها , ويطالعون تلفزيون

منال : عليكم رواقه , تلفزيون من الصبح !

طلال : اخبار ..

منال : اها

تقدمت حلا وسلمت على خالتها : صباح الخير , شلونك خالتي

عزيزة : هلا حبيبتي تعالي , ها تجهزتوا للجامعة ؟

منال : ايه , بس جميلة لسى ماخلصت كوي , باقي بس نلبس

عزيزة : وش عندها ذي والله لو انها تكوي على البخار

طلال يضحك : خليني اروح اصرخ عليها يمكن تخاف

عزيزة : لا لاتخوّف الحرمة , اسمع صوت في الدرج اكيد هي

طلال : طيب بقوم ابدل انا , ( ويأشر على حلا ومنال ) انتظروني في الصالة تحت ..

طلال وهو طالع كانت الخدامة داخلة الصالة وماسكة الملابس بيدها , وكانت بلوزة حلا اول وحده ..

طلال بطبيعته المزوحية , مسك طرف البلوزة بيده والتفت وقال : يا قلبو , هذي شارينها من adams(محل اطفال) ؟

الكل ضحك ,

حلا قالت : طلال يادبّ ترى شاريتها من زارا

طلال يطلع لسانه : أي صح زارا فيه قسم اطفال

منال ماتت من الضحك : حلا شيلي ملابسك عنه ترا والله يقعد لين بكره وهو يضحك عليهم !

حلا راحت عند الخدامة وخذت ملابسها من الخدامة وقالت وهي تبتسم :thank you so much

طلال ابتسم وراح وهو في باله , ياحليلها , بزر بس ذوق ماشاء الله عليها ,,

منال مازالت تضحك على حلا

حلا وهي لابسة البلوزة : حرام عليكم والله مو صغيره , هذا نسائي مقاس small

منال : ماعليك منه , هو متعود على ملابسي استغرب من ملابسك

( منال طويله وعريضة .. مملوحة وفيها شبه من طلال شوي , بس تحب تلبس ملابس واسعة شوي وستايلها سبورات بعكس حلا )

حلا : حليلكم انتو الأثنين , يللا امشي ننزل الحين يعصب علينا ..

نزلوا منال وحلا للصالة وركبوا السيارة وراحوا للجامعة .. طلال وصل حلا اول بعدين منال , عشان ماتحس حلا باحراج لا صارت معاه بلحالها ..

وهذا الشي كانت امه موصيته عليه بعد

دخلت حلا الجامعة , فصخت عبايتها وضبطت نفسها ومشت للمبنى الي فيه محاضرتها

وهي تمشي , كانت تتذكر كلام طلال لها في السيارة ,,

هي عادة تتضايق , بس ماتدري ليه ماكانت متضايقة , كانت مرتاحة شوي ..

قطع تفكيرها صوت غدير : الوووو وين سرحانه

حلا : لا ولا شي ..

غدير : كيفك معاهم ان شاء الله مرتاحة .؟

حلا : ايه الحمد لله .. ارتحت لهم , ودخلت جو معاهم على طول

غدير : الحمد لله

حلا تكمل كلامها وهي تجلس على الكراسي اللي جمب الكافتيريا : تخيلي , علي اجي مع السواق اليوم , وصلني طلال مع منال

بنوتة ذووق
شكرا للمرورك بموضوعي :حبي:::

غدير : ياحليلهم , شكلهم طيبين

حلا : تخيلي وش قال لي طلال بالسيارة اول ماركبت ؟

غدير : وش قال ؟

حلا : كان متردد بس طالعني من المراية وقال : حلا غطي وجهك , سيارتي تظليلها خفيف

غدير باستغراب : من اولها قام يتحكم , وش دخله هو ماعليك منه ؟

..... : بالعكس , والله حسيت انهم حرصانين علي , وتصرفاتهم تثبت هالشي , شوفي انا لسه ماصار لي الا يوم واحد معاهم , والحمد لله مرتاحه , مره محرجيني بطيبتهم وذوقهم .

....... : الله لايغير عليكم , وش عندك محاضرة الحين ؟

....... : نجم ( انجليزي ) وانتي .؟

....... : انا ماعندي الحين , الساعة 10 , الا تعالي وشخبار ابوك ؟

....... : الحمد لله , كلمت امي امس بالليل , وبس اطلع من المحاضرة برجع ادق عليها بس الحين مبكر ..

.....: اوكي اشوفك وقت الصلاة , سلام

...... : يللا مع السلامة

كان يوم ممل وطويييل في الجامعة , رجعت حلا لبيت خالتها , سلمت وطلعت غرفتها ..

بدلت ملابسها ورمت نفسها على السرير من التعب واللّف والدوران في الجامعة وراحت في سابع نومه

قرب الوقت على المغرب

عزيزة : صحت حلا ؟

منال : لا يمه لسّه

..... : طيب صحوها تراها ماتغدت

طلال : يمه خليها على راحتها متى ماقامت اكيد بتجي تاكل

شوق : لا انا بووح اصحيها , ( وركضت للغرفة , وطبت فوق حلا )

حلا قومي , قومي الحين واح النوو وجا الظلام

حلا : اوووو شوق ياحلوه روحي العبي ابي انام

شوق : لأ , مابي ابيك تقومين

حلا عركت عيونها وابتسمت لشوق : دبه ! كم الساعة ؟

شوق تطالع ساعة الجدار : الساعة 17

حلا تضحك : وانا أسألك عاد انتي وش دراك , هههههه يللا قومي انزلي تحت هذاني بنزل

شوق تحط يدها تحت المخده : الدبدوب قام ؟

حلا مسكت دبدوبها اللي لونه وردي : ايه قام ويبي يتروش

..... : تيب , بلوح اخليه يتلوّش , انتي تعالي تحت

قامت حلا وراحت تحت في الصالة

عزيزة : هلا بنتي زين صحيتي , تونا حاطين الشاهي بنشرب

حلا ببراءة : ياسلام , شاهي ,,

عزيزة : زين انك تحبينه , بس ماتبين غدا اول ؟

..... : لا مشكورة , تغديت بالجامعة

...... : طيب يللا نروح برا

( عزيزة وعيالها متعودين يشربون الشاهي برا بالحوش .. كان مره مرتب والجو يساعد على الروقان )

جلست عزيزة على احد الكراسي البيضا اللي بالحوش , وحطت حلا الشاهي على الطاولة , وجات جلست جمب خالتها

حلا : ماشاء الله , خالتي حلو بيتكم ..

عزيزة : تحلى ايامك يابعد عمري والله عيونك الحلوة

حلا : والله خالتي مره عاجبني الجو والديكور هنا

عزيزة : هذا انا مسويته هنا , نحب نجلس هنا انا والعيال نشرب شاهي ونسولف

حلا : الّا وينهم ؟

عزيزة : شوي ويجون

حلا : طيب , بس بروح اجيب شوق تلاقينها حاست المطبخ عليكم

عزيزة تضحك : ههههههه خليها الخدامة معاها .

حلا : لا خالتي معليه اجيبها تحت عيني ع الأقل , بعد شغالتكم تغسل المواعين .

توها حلا بتقوم ولا منال طالعة لهم وشوق بيدها ..


في بيت غدير ..

ام غدير : قومي يابنتي بسك نوم

غدير : اووووو يما خلوني نايمة مابي اقوم

ام غدير : يما قومي صار المغرب , بعدين فيصل دق 3 مرات

غدير : اوووه وش يبي ذا والله ماني فاضية له قوله نايمه

ام غدير : وشلون وش يبغى , خطيبك يعني اكيد يبي يسألك عن شي

غدير لفت جهة امها : ومن قال لكم اني راضية اكلمة قبل الملكة ؟

ام غدير : ماقال يبي يكلمك , هو عارف انك مارح ترضين , نبي نتفق معاك على الملكة

غدير : يمه , انا قلت مابي اتزوج , توني باولى جامعة منتم صاحين ! قلنا نمشيها خطبة وقلتوا اوكي , والحين تبون الملكة قريب ..

ام غدير : أي مافيها شي , خير البر عاجله

........ : مصحيني من نومي عشان تقولون هالكلام , انا قايله لكم ماقدر اوفق بين الزواج والدراسة

....... : الا تقدرين , وانتي ماشاء الله شاطرة , وابوك مانبغاك تزعلينه

....... : ياربي انتو وش اللي غير رايكم ؟

....... : فيصل جايه نقل لمستشفى في الدمام , واذا كنتي موافقة , تتزوجون وتسافرون

غدير باستغراب .... : شكلكم جايين تقولون لي ان الموضوع مغلق , مو جايين تاخذون رايي

ام غدير : اوووووووه , قومي روحي لابوك قولي له هالكلام , لأن شكله بيعطي الرجال الموافقة

نطت غدير من فراشها عشان تلحق تقول لابوها ..

راحت لغرفة ابوها لقته طالع , رجعت غرفتها ..

تفكر في فيصل ..

فيصل ولد صديقة امها , شافها مره يوم كانت امها مسوية عزيمة , وجا ياخذ امه من عندهم ..

وغدير كانت واقفة عند الباب ..

هي مره وحده شافها بس .. !

مارضت تطلع من باله ..

غدير بيضا وطويله شوي , جسمها رويان , شعرها بني غامق , قاصته مدرج لحد كتفها , عيونها واسعه وملامحها متناسقة ..

انسدحت غدير على السرير وهي تفكر : صاحين اهلي يبوني اتزوج الحين ؟ انا حتى ترم في الجامعة ماكملت ..

سمعت جوالها يدق , هذي اكيد حلا ..

لا , رقم غريب ..

ايه اكيد حلا متصله من جوال منال بنت خالتها

ردت غدير عالجوال : الو

...... : السلام عليكم

....... : وعليكم , مين بغيت ؟

....... : غدير ؟

...... بعد تردد : ايه , مين معي . ؟

..... : هلا غدير , انا فيصل

..... تجمدت غدير وماهي عارفه تتكلم , وكانت واقفه وتدور : ه .. هلا فيصل .

فيصل : كيفك غدير عسى مازعجتك ؟

غدير : لا عادي والله

...... : شكلك مشغولة ؟

..... : لا والله , بس .. ماكنت متوقعة اتصالك

فيصل : امك سامحة لي اتصل

غدير : وشدعوة فيصل ماتحتاج لأحد يسمح لك ..

فيصل : تسلمين مشكوره

غدير حمّر وجهها : الله .. يسلمك

فيصل جلس على كرسي المكتب حقه وهو يكلمها : غدير خلينا نتكلم بصراحة , انتي مو مجبورة على شي

غدير : اوكي

فيصل : انتي متى تبين الزواج ؟

سكتت شوي بعدين قالت : مو الحين , تو الناس ..

...... : طيب , عندي لك فكره , ان شاء الله تعجبك

...... : قول

....... : شوفي غدير , انا جايني نقل للدمام , وانتي قلتي ان ماعندك مانع نسكن هناك..

بس انا عندي فرصة شهرين قبل لا اسافر , شرايك نملك في هالوقت , ومو مشكلة مانتزوج , اسافر انا , وعقب تاخذين الفترة اللي تريحك , سنة سنتين , او حتى لما تخلصين من الجامعة ..

غدير بعد فترة صمت : مادري .. !

فيصل : فكري طيب , خذي فرصتك وردي علي بعدين ..

..... : طيب وش بيفرق اذا ملكنا الحين او بعدين , دامك بتسافر .. ؟

قال وهو يبتسم ويشخبط على الاوراق اللي قدامه : يفرق ياغدير , يفرق كثيييييير ..

..... : كيف يفرق ؟

...... : يفرق ياغدير , اني اذا اشتقت لك , اقدر اكلمك متى مابغيت , بدون ماأحس بحرج او اخذ اذن من أحد ,

يفرق اذا جيت في الاجازات , اقدر اشوفك , واقعد معاك ..

اما كذا , ماقدر اتحمل صراحه

غدير حمّر وجهها واستحت من كلامه : .....................

فيصل : غدير ؟

....... : هلا , معاك

........ : ها وش قلتي ؟

....... ركبت السماعات لانها حست ان جوالها بيطيح من يدها : مادري فيصل خلني افكر

فيصل : غدير ..

....... : نعم ؟

....... : لا تطولين علي , ردي بسرعة

....... : طيب , بس توعدني انك ماتزعل مهما كان قراري

....... : ليش ازعل ؟

...... : مادري , يعني اخاف تقول خذت راحتها بزياده او اجلت كثير ..

...... : لا مارح أزعل , وبعدين مهما يكون الموعد اللي تحددينه , انا راضي فيه .. اهم شي انك تكونين لي , ولو بعد 20 سنه

غدير حست نفسها ترجف من كلامه , قالت بسرعه : طيب مع اللسلامة

سكر فيصل وهو يقول في باله : ياحلوها استحت , هذا وانا ماقلت لها شي يستاهل , بس يارب توافق ونملك قبل ماأسافر , يارب يارب



......

وش رايكم الى الآن ..؟

وش تتوقعون راي غدير في الفكرة ..

بتتأقلم حلا معاهم أو لا ؟





انتظر رايكم .. واذا ماعجبتكم مارح اكمل الرواية

شكرا مقدما

يسلمووو ع القصه

بس طويله

يعني ماتبيني اكمل الرواية ماعجبتك

تكفييييييييييييييييييييييييييييييييييييين كمليييهــــــــــــــا بليييييييييييييييييييييييييييييييز

بأقـــــــــــــــــــــرب وقـــــــــــــت

الجزء الثالث ..

حلا ومنال جالسين على الكراسي اللي بحديقة البيت الصغيرة وفارشين كتبهم ودفاترهم يكتبون ويلخصون

حلا تستهبل : 12 في 2 كم ؟

منال بعد تفكير : 16

حلا : ماشاء الله عليك , حافظه جدول الضرب

طلال طالع من باب الصالة , ومتقدم عندهم : 24

منال : جاك هذا العبقري عاد ..

حلا باستهبال : صح عليك

طلال جا وقف عندهم : وش عندكم تدرسون ؟ ممكن اجلس معكم ؟

منال : طبعا نتنمنّى ..

حلا : تعال اجلس

سحب طلال الكرسي اللي مقابلهم ثنتينهم , وجلس .. قال وهو يطالع في الحوسة الي على الطاولة : اف , شكله عندكم برزنتيشن (بحث) ولا شي

حلا : ايه استغفر الله , بكره لازم اسلم تقرير فيزياء .. انحولت وانا قاعدة ارسم رسم بياني

منال : انا ماعندي شي , بس قاعده اترجم قصيدة بالانجليزي ..

حلا : يوووه الله يعينك

طلال : ليه ماتحبين الانجلش ؟

حلا : عادي , بس غثيث شوي , حتى حنا اول ندرس فيزياء وكيمياء بالعربي , والحين بالانجليزي , والقوانين تختلف شوي

منال : انا خليني بعيدة عن التفكير , احفظ واكتب احسن , ليه اقعد افرّ راسي واحوس مخي عشان احل مسأله

حلا وهي تضحك وتطالع منال : تكفين الدكتوره معطتنا مسأله نحلها من السبت , وعجزت منها

طلال وهي يبتسم : عطيني اياها اشوف ..

حلا : شلون يعني ؟

طلال يمد يده : يعني عطيني اياها يمكن اعرف احلّها ..

حلا بفرح مدت له دفترها وقلم رصاص : شوف

خذ الدفتر طلال وطالع فيه شوي بعدين قال : ايه هذي سهله , شوفي ( وقرب كرسيّه شوي منها ) ومد الدفتر لقدام وقال : اول شي تضربين هذولي مع بعض ..

بعدين تجمعين عليهم العدد ...... الخ

منال : تف تف عليك لا اله الا الله , اظاهر انت ماتمسح شي من ذاكرتك , للحين متذكر مقرر 101 ؟

طلال ابتسم وقال : الحمد لله , الحين استفدنا منه ..

حلا ببراءه رفعن راسها له وقالت : انت تخصصك فيزياء ؟

طلال : لا .. انا صيدله ..

حلا : اممم ماشاء الله . الله يعينك على الكيمياء وغثى الكيمياء , وع

طلال : بالعكس حلو , هو صح يلخبط شوي بس اصرف من الفيزياء معقد ..

منال : حسيت اني كرسي جالس , وانتوا تتفلسفون , انتي الحين ماحددتي تخصص لسه ؟

حلا : لا مو الحين , السنه الجايه

طلال : وش ناويه تدخلين ؟

..... : يمكن احول حاسب , او يمكن ادخل علم احياء

..... : اها , الله يوفقك ان شاء الله

( يقطع عليهم صوت جوال حلا وهو يدق على نغمة غدير ......)
حلا : هلا ياحلوه كيفك ؟

غدير : انا تمام الحمد لله , عندك احد ؟.

حلا : قاعده مع خالتي وعيالها , ..

غدير : طب قومي شوي عنهم بغيتك بسالفه ضروري

حلا : اوكيه لحظه ( والتفتت على منال وطلال وقالت ) : دقيقة بس صديقتي على التلفون

منال : خذي راحتك وسلمي عليها

طلال يستهبل : سلام كثيييير ..

حلا طالعت في وهي فيها الضحكه عارفه انه يمزح : اوكي , شوي وجايه ..

هلا غدير , يللا قولي

....... : معليش قومتك من عندهم ..

....... : لا عاااادي , تراني حولهم بس اتمشى قريب منهم .. يللا قولي

...... : تخيلي اليوم اتصل علي فيصل !

........ : احلفي , وش يبغى ؟

......... (قالت لها السالفة ) : والحين مادري محتاره ارفض ولا أوافق ..

حلا تسولف مع غدير وصوتها مسموع شوي , وطبعاً سوالفها كلها عند طلال اللي قاط اذانه

حلا : حرام عليك , طبعا وافقي , شكله الرجال ميّت عليك , ليه ترفضين اساساً ماله سبب رفضك ..

غدير : مادري والله مترددة , يعني تتوقعين يمديني اتجهز كذا على العيد ؟

...... : طبعا يمديك , قسم بالله لو اني منك اوافق , ترا كلها ملكة يعني مو زواج , على الأقل ارحمي الرجال شكله مو متحمل يبعد عنك هي هي هي

....... : اوووه لا تقولين كذا ترا اصدق ..

( هنا التفتت حلا على طلال شافته يبتسم , إه .. فشله شكله سمعني )

غدير : الوووووو وين سرحتي

حلا : هاه , معاك ..

قالت غدير وهي تتربع على سريرها : انزين ماقلتي لي , طلال ولد خالتك , شلون شكله ؟

حلا : ليه تسألين ؟

غدير : كذا , ابي اعرف مين الأحلى فيصل خطيبي ولا طلال ..

حلا تضحك : تصدقين مادري .. ! ماهتمّيت ادقق في شكله ..

غدير : طب طالعيه الحين وقولي لي ...

...... : لااا استحي اطالع فيه و اخاف ينتبه

....... : طيب حلو ؟

....... : انتي ياهبله , تدرين اني ماحب افكر بهالأشياء أصلا ..

....... : طيب , نشوف , بس اذا قدرتي طالعيه عشان توصفين لي اياه

...... : طيب طيب , يللا ضفي وجهك عني بروح لهم , سوالفهم ماتنمل , اما انتي تجيبين المغص

........ : افا

....... تضحك على مزحتها : ايه ابلشتينا انتي وخطيبك , على بالك مستحيه ماتبين توافقين وانتي من داخل تناقزين من الفرحه

...... : طيب يللا روحي لهم بس الشرهه على اللي يدق عليك , بس برضو بدق عليك بالليل مره ثانيه ..

...... : اوكي يللا باي


سكرت حلا وهي تضحك وراحت عندهم , وخطفت نظرة سريعة لطلال تحاول تشوف شكله زين ..
\

طلال.. طويل وعريض ,, ومعضّل شوي ..

حنطي .. حاط سكسوكه بس مو كامله ..

فيه جاذبيه غريبه لما يبتسم ..!

عيونه فيها حنان .. مو طبيعي ..

يشبه منال شوي , بس طلال احلى منها , منال عاديه ..

شخصيته حلوه , مزوحي , وطيب مره ..

بس له هيبه ,, و شكله يعطي اكبر من سنّه ..

قال طلال وهو يرجع على ورا بالكرسي : ماخلصتوا دراسه يالدوافير ؟

منال : ليه بغيت شي ؟

طلال : ايه . من زمان مالعبت بلياردو , وقلت مادام ان بنت خالتنا هنا , نونّسها شوي ..

حلا : عندكم هنا بلياردو ؟

منال : اوو , لسه ماشفتي شي ..

طلال : ها منال , حلا , تلعبون ؟

منال : ايه

حلا : لا مابي مشكورين ..

منال : ليه ؟

حلا وهي مستحية ومنزله راسها , وتشبك يدينها ببعض : صراحه ماعرف ..

طلال : نعلّمك ..

حلا طالعت في طلال ونزلت راسها بسرعة : هاه , لا مو لازم

منال تسحبها من يدها : امشي يالله بس ..

طلال : انزلي للبيسمنت معها , بروح اشوف امي كان تجي معنا

منال : طيب


نزلوا حلا ومنال للبيسمنت , شغلت منال النور ,

البيسمنت كان مره حلو ومرتب , في الوسط في طاولة بلياردو , وبعدين بالجهه الثانية فيه تلفزيون وبلاي ستيشن وجلسه عربيه ..

حلا : ماشاء الله منال , الله يحفظ لكم البيت , مره حلوه تنسيقه

منال تتنهد : ايه , مع اني احسه كبير على ثلاث اشخاص عايشين فيه ..

حلا : بالعكس عادي , والله انتو عارفين كيف تستفيدون من المساحات والغرف , وممتّعين انفسكم ,,

منال : تسلمين مشكورة , اقول حلا ..

حلا : قولي

...... : طلال يحرجك بتصرفاته ؟

....... : شلون يعني يحرجني ,, لا ,, عادي ..

........ : لا بس اشوفك لو يكلمك يحمر وجهك علطول

.......... : منال , انا مو متعوده احد من عيال خالاتي او عماتي يسولفون معاي , عمامي مقاطعينا وانتي تعرفين , وخالاتي مايعطون وجه ..

عشان كذا مو متعوده , ولا أحس عادي , طلال ماشاء الله محترم , وماصار منه شي

منال : أي انا عارفه والله , بس حبيت اقول لك ترا هذا اسلوبه , يعني لاجا يكلم احد يقرب منه شوي , اذا كنتي تكلمينه يحط عينه في عينك مدّه طويله ,

يبتسم كل شوي , يمون في بعض الأشياء ,,

حلا : عادي , بس لسّه ماتعودت .. بعدين تكفين ترا انا من أي شي استحي ويحمر وجهي , اصبري علي شوي بتلاقيني اسولف معاه وماخذه راحتي ..

منال : اوكيه

دخلت عزيزة للبيسمنت : حلا ترى اختك نامت

حلا : كان ناديتيني انوّمها , هي من جات عندكم وهي ناسيتني ..

عزيزة : والله كانت تلعب , بس جا طلال الصالة قبل شوي , خذها وجلس يقرا شي بالجريده وكلها دقيقتين الا نامت بحضنه

حلا : الله يهديها شوق والله بتنشب للرجال الحين

منال : عادي خل يتحمل , هو اللي يعطي البزارين وجه , ( وتلتفت على امها ) وينه يمه الحين ؟

عزيزة : بس راح يحط البنت بالسرير ويجي ..

راحت 5 دقايق وهم يسولفون , الا بجية طلال ..

دخل طلال البيسمنت وكان لابس جلابية بيت نص كم , لونها بيج ..

وقف عند طاولة البلياردو وقال وهو يضحك : يمه ! تعالي نلعب , مشتهي افوز على احد , وابي اورّي حلا كيف اللعب

عزيزة :تكفى عاد, لو ألعب معاك الحين اخسّرك

طلال : يللا ورينا , حلا راقبي , منال شوفي لك صرفة ولا روحي العبي بلاي ستيشن

منال : ياسلام انا انطرد , ماشي , انا اطالع تلفزيون اصرف لي ..

حلا كانت واقفه وتتأمل في طلال وامه عزيزة , ماكانت تبي تعرف شلون تلعب بلياردو , بس كانت تتأمل جوّهم مع بعض ,,

جمعتهم ووناستهم .. تحسينهم عائله صدق ..

حتى امهم نازله لسنهم , تلعب معاهم وتضحك معاهم ..

مع انها مو كبيره مره وأمي اصغر منها ,, , بس ياليت امي تسوي مثلها ...

راحت حلا بأفكارها لبعيد .. بعيد ..

عزيزة : حلا

حلا : سمي

عزيزة : خلي عنك طلال ذا , تعالي نلعب بلاي ستيشن

حلا تضحك : تامرين خالتي

طلال : لا يمه تكفين , خليها بعلّمها ..

حلا انحرجت وسكتت

عزيزة : هذا بيبلشك ترى , خليه يعلّمك وانا بروح العب مع منال , وعقب ابي العب معك , تونا شارين شريط جديد

حلا ضحكت على خالتها عزيزة ونزلت راسها عشان فيها ضحكة اقوى مستحية تطلعها

طلال : زين كذا يمه , ضحكتي البنت علينا ..

عزيزة : اوه , يللا بس علمها وفكنا وانا انتظرك

حلا : طيب

راحت عزيزة للجهة الثانية من البيسمنت اللي فيها التلفزيون

طلال : عاد انا بعلمك غصب , تبين ولا ماتبين

حلا ابتسمت : يللا عادي علمني

وقفت حلا قريب من الطاولة وقالت : ترى انا فاشلة بهالألعاب , بعدين هذي ثقيلة ( تمسك الكورة ) من جدك اقدر ادفّها ؟

طلال اكتفى بابتسامه , وصار يعلمها , يأشر لها على الأماكن ويشرح لها طريقة اللعب

وقف فجأه وهو يتكلم وقال : طيب على الأقل طالعيني , عشان أحس انك سامعتني

حلا حطت عينها بعينه لثواني بعدين قالت : معاك .. والله اسمعك

طلال ابتسم بعدين هز راسه وقال : يللا تبين تجربين ؟

حلا : اوكي ( ومسكت العصا ) هذي كيف تنمسك ؟

طلال قرب يمها , ومسك العصا بيده وقال : زي كذا ( والتفت على البنت شاف وجهها احمر لانه قريب , يوم شافها مستحيه 0 بعد عنها وقال ) : يمه , تعالي حلا تبي تلعب معك

حلا ابتسمت , وانبسطت بينها وبين نفسها لأنه ماحب يحرجها أكثر ..

سوالف ولعب ووناسة ,, وحلا كانت مبسوطة بشكل مو طبيعي , وفرحانه بين اهلها , لانها من زمان ماحسّت بهالجو وعاشت فيه ..

اغلب الوقت بلحالها ..

والحين كل واحد منهم يحاول يرضيها ويسعدها من كل جهه ..

ماحسّوا بالوقت ..

قال طلال وهو يبتسم وفي باله فكره خبيثه : حلا , تبين تشوفين شي يضحك ؟

حلا بحماس : ايه

طلال أشر براسه على منال اللي كانت نايمه على الكنبه , طفشت وهي تطالع تلفزيون , وداخت ونامت

أشر لأمه عزيزة ماتطلع صوت , وعزيزة ضحكت وهي طفشانه من طلال وحركاته ..

مسك طلال عصا البليارد , وقرب شوي من منال والتفت على حلا : لا تطلعين صوت , بدخله في اذانها

حلا مسكت العصا بيدها : لااا حرام عليك والله حرام

طلال : اشششش , والله مشهد مايتفوّت , روحي اوقفي قبالها عشان تشوفينها زين

حلا صارت تتأمل منال وهي تضحك على طلال , شكله هيبه وثقل , بس عليه حركات .. !

منال قامت مفزوعة وحكت اذنها

عزيزة وحلا ماتوا من الضحك , وطلال قال بجديه : منال في شي دخل في اذانك مدري وشو اظاهر حشره

منال صرخت وقامت من مكانها مفزوعة : وين وشو ؟

طلال ضحك : هع هع هع , امزح معك , ( ويرجع العصا للطاولة ) قومي نامي بغرفتك مو هنا

عزيزة : قومي حبيبتي يللا , حلا بتنامين الحين . ؟

حلا : لا مافيني نوم الحين , بس اروح الغرفة .. بغيتي اساعدك بشي خالتي ؟

عزيزة : لا مشكوره بس كنت أسأل , قومي منال فوق ..

راحوا فوق , و خذت حلا جوالها من عند التلفزيون ,عشان بتطلع ..

طلال : طالعة فوق ؟

حلا : ايه

ابتسم : تصبحين على خير

حلا وهي منزله راسها : مشكور طلال , والله ونستوني ..

طلال : افا عليك شكرا على ايش , انتي ونستينا بعد .. بعدين الله يعينك علينا ان حبيناك وارتحنا لك نشبنا فيك ..

حلا استحت ورقت فوق








استغربت ان شوق مو في الغرفة , مو تقول خالتي ان طلال حطها بالسرير ؟

راحت تدور على شوق , عرفت من خالتها ان طلال نومها بسريره , لانه ماحب يدخل غرفتها وهي مو موجوده ..

يا حليله طلال !!


.........

مرت ثلاث ايام , على قعدة حلا عند خالتها ,

وغدير فكرت كثير , ووافقت ان الملكة تصير قبل ما ياسافر فيصل ..

اتصلت غدير على فيصل .. وفي كل رنّه , تسرع دقات قلبها زياده , من الخوف والربكه .. والحيا ,,

فيصل : مرحبا

غدير : هلا والله

فيصل : أخيرا غدير , وينك طولتي ؟

...... : معليش سوري , كنت مشغوله

....... : لا عادي , خذي راحتك , اهم شي سمعتينا صوتك .. ( وهو يبغى يخلص كلامه بسرعه , عشان يعرف ردها على الموضوع )

........ : ........

.......... : وين رحتي ؟ عادي قولي قرارك والله مابزعل

........ : اممممم ( وتضحك )

........ : غدير ! لا تلعبين بأعصابي قولي

غدير: شرايك تبي الخميس الجاي ولا اللي بعده ؟

فيصل : احلفي انك موافقة

غدير : والله !

فيصل : لولولولولو ليش , الف الصلاة والسلام عليك ياحبيب الله محمد , وأخيراً مابغينا

غدير : خلاص عاد لاتقول كذا

فيصل : الا بقول , والملكة ترا علي انا , وبحجز لها استراحة , واعزمي كل اللي تبينهم يجون , حتى الخدامات جيبيهم ..

غدير تضحك : اف اف ليه كل هذا ؟

فيصل بجدية : ابي كل الناس تعرف اني بتزوج غدير , وتشوف زوجتي غدير .. وتقول ياحظه عرف يختار

غدير راحت فيها من الحيا : طيب انت بس حدد الوقت عشان يمديني اتجهز

فيصل يضحك على حياها : طيب , خليها الخميس اللي بعده عشان يمديك تستعدين زين , مو تأجلين في آخر لحظه

غدير :اوكيه صار

فيصل : طيب انا بروح ابشر امي , فمان الله يالغاليه

غدير : مع .. السلامة ..

سكرت غدير السماعة ودرجة حرارتها ضاربة الأربعين , حسبي الله على بليسك يافيصل .. ! 

في نفس اليوم .. بيت عزيزة ..

دخل طلال غرفة امه اللي كانت جالسه على السرير , جلس جمبها وحط راسه على رجلها وقال وهو يتنهد : ها يمه شالأخبار ؟

عزيزة : مافي شي جديد

طلال : حلا شخبارها ؟ وينها ماشفتها اليوم

عزيزة : ليه تسأل ؟

....... : بنت خالتي ويهمني اتطمن عليها

........ : والله الحمد لله , بس شكلها ضايق خلقها , اقول لها شفيك تقول مافيني شي , وحسّيتها زعلانه ..

رفع طلال راسه واعتدل في جلسته وقال باهتمام : مين اللي مزعلها ؟

........ : والله مدري

نزل طلال من السرير ومشى لحد الباب , قالت عزيزة باستغراب : وين رايح؟

طلال : رايح اشوف مين اللي مزعلها ..!

.....................................

الجزء الرابع



ابتسمت عزيزة برضا على اهتمام طلال بحلا , اللي حتى منال ماقدرت تعطيها اهتمام كثير ...

توقع طلال ان حلا قاعده بالصاله , راح هناك وشافها جالسه على الكنبه , وماسكه جوالها , تطالع تلفزيون وبالها مو معاه ..

جلس طلال على نفس الكنبه الكبيره , وقال بهدوء : الحلو ليش زعلان ؟

ابتسمت حلا ابتسامه مزيفة : لا مو زعلانه

طلال ابتسم : لا , زعلانه

حلا : لا مافيني شي , بعدين ليه يهمك تعرف ؟ خلاص قلت لك مافيني شي ( وقامت من على الكنبه )

قام طلال ووقف قبالها , تكتّف وقال : يهمني اعرف , عشان اورّيه شغله اللي يزعل بنت خالتي

حلا استحت , هي تعرف ان هذا اسلوب طلال في الكلام , هو مايقصد شي فيه , بس طريقته في الكلام حلوه , واساساً لسانه عسل مثل مايقولون

حلا باحراج : سبب بايخ اصلا مايستاهل

طلال : معليش , قولي


ترددت حلا قبل ماتتكلم , وجلست على الكنبة ..

حس انها منحرجه منه, قال وهو يتربع على الكنبه : طيب , تبين انادي لك منال تتكلمين معها ؟

حلا : لا عادي , ( وضحكت ببراءة ) بفضفض , بس الله يعينك علي تراني غثيثه ؟؟

طلال بالمصري : فضفضي ياختي فضفضي

( في الايام اللي عاشتها حلا معاهم , ارتاحت لطلال اكثر من منال , ماتدري ليه , مع انها حاسه ان طلال انتبه لهالشي بس ماحبت تبينه زياده , قالت وهي تتنهد : ماما ..

طلال : وشفيها ؟

...... : مادري , احس انها مخبيه علي أشياء ..

...... : زي ايش مثلا ؟

...... : ابوي , احيان احس ان اللي فيه اكبر من سالفة سكري وضغط , بس مافي فايده , شكلهم مغبيّين عني , مايبون يقولون لي , وجهه تعبان , غير عن اول , اول كان يرتفع وينخفض السكر عنده , اعرف شكله وحالته , مو نفس الوضع الحين , شكله فيه شي ثاني ..

بس يارب لأ , ويكون بصحة وعافية

حتى يوم راحت قالت لي بيتعالج برا , ماقالت لي بابا شاللي فيه , حسيت اني بزر , مو معطيني قيمه واهتمام , وشدعوه يعني ماأدري .. ؟

طلال : يابنت الحلال , يمكن ماحبت تقول لك , يعني شدّة وتزول , ان كان شي بسيط وسهل علاجه , يعالجونه بعدين يقولون لك ..

ويمكن بتقول لك , بس تنتظر الوقت المناسب

يعني انتي الحين لا تشيلين هم , متى آخر مره كلمتي امك ؟

حلا : اليوم , وكلمت بابا بس حسيت من صوته انه مو اوكي ! والله خايفه , حاسه ان فيه شي

طلال : حلا , اول شي امسكي دموعك ولا تصيحين , لاني ماتحمل اكلم احد كذا , وما أعرف , يتشتت تركيزي

حلا مسكت نفسها وابتسمت : وشسوي طيب ؟ يعني بالذمه طلال وش بيكون شعورك لو عرفت ان احد من اهلك مخبي عليك شي يهمّك وله علاقه فيك ؟

طلال : معاك حق , قهر صراحه , بس انتي لا تضيقين خلقك عشان هالشي , لما تتأكدين ساعتها يصير خير ..

( وابتسم ) وقال : ابتسم واضحك , ومالك وللألم ..

وازرع البسمه على صحرا الرمال ..



كانت الايام تمر بسرعة .. لين صار بكره موعد وصول منيرة وزوجها محمد , وياخذون حلا وشوق عشان يرجعون للبيت ..

حلا وهي فرحانه ومتضايقة بنفس الوقت : والله ماني عارفه وشبسوي بدونكم , تعودت عليكم ..

منال وهي تتمكيج عشان تستقبل خالتها في بيتهم : والله حتى احنا تعودنا عليك , انتي الى الآن ماكشختي ؟ امك بتجي يللا البسي

حلا : طيب , بروح الحين ..

راحت حلا لبست واستعدت ..

لبست بنطلون جنز وتي شيرت وردي عليه رسومات بالأسود , فكت شعرها , وحطت مكياج خفيف .. طلع شكلها خيال

طلال كان مارّ , وشاف انعكاس حلا بمرايتها , لانها ما كانت مسكره الباب بالكامل ..

علطول راح غرفته , وحمد ربه انها ماكانت منتبهه ..

بس هذي اول مره يشوفها بدون عبايه وحجاب من اول ماجات عندهم ..

مذهله !
ماهي بس قصة حسن
رغم ان الحسن فيها بحد ذاته مشكلة

مذهله
كل شي فيها طبيعي ومو طبيعي
اجمل من الأخيله ..

طلال كان يمشي وباله مع المرايه اللي انصدم منها قبل شوي ..

شكلها غير .. غير !

أحلى بكثير .. !


مع انها لمحه وحده ..!

بس قدرت حلا فيها انها تاخذ قلب طلال , وتخليه عندها ..

ويحبها كل يوم زياده عن اول .. !

اول ماعرفها وجات بيتهم , كان يعتبرها اخته , وكان كل همه انه يسعدها وترتاح معاهم ..

لاشعورياً ..... صارت حلا همّه الوحيد .. !!

وهي الكل بالكل في هذا البيت ..!

نزل طلال للدور الاول من البيت .. شافه فاضي , طلع للحديقة وكانت امه جالسه هناك ..

قال طلال وهو يحب راس امه : متى بتجي خالتي ؟

عزيزة : بعد العشاء ان شاء الله

طلال وكأنه يبي يعرف شي : اجل البنات وينهم ؟ اشوفك قاعده لحالك ؟

عزيزة : الحين ينزلون , بس يلبسون , تعرف البنات حوستهم حوسه , يستعدون لمنيرة ..

طلال : اوكي ..

شوي ويجون البنات تحت , قالت حلا وهي تكلم منال :احدي ربك انتي استغفر الله اليوم كان عندنا كيمياء عملي , بس انواع الضحك , خلص وقت المحاضره والتجربه ماسويناها , ماندري شالموضوع والله نحوس على كيفنا

منال : حمد الله ماعندنا لا كيمياء ولا خرابيط

عزيزة : ماتخافون انتم من ذا الكيمياء والمحاليل ؟

حلا وهي تجلس على الكرسي وتضحك : لا خالتي مايخوف عادي , بس المشكله روائح المركبات والأحماض تجيب الصداع

طلال : ايه في هذي صادقة

نادت عزيزة طلال , وهمست في اذانه شي وابتسمت

طلال : تعالي حلا في شي نبغاك تشوفينه

حلا : وشو ؟

عزيزة : انتي روحي وتشوفين

طلال : تجون ؟

منال : ايه بس دقيقه

عزيزة : روحوا وحنا نلحقكم ..


( كانت عزيزة ملاحظه اهتمام طلال بحلا , وارتياح حلا لطلال .. طبعاً اعتبرته شي عادي , لانها عارفه ان في حدود بينهم ..

بعدين جات في بالها فكره , انها تقوّي العاقه بين طلال وحلا , يمكن تعجبه ويرضى يتزوجها , ولا اول يوم كانوا خاطبينها له , ماكان راضي لا فيها ولا باي احد ثاني .. )


مشى طلال مع حلا , وكانت تمشي وراه , قال طلال وهو يلتفت : ماحب احد يمشي وراي , خليك قدامي ..

حلا : ماحب احد يمشي وراي , خلك قدامي ..

ضحك طلال على هبال البنت ...

قالت حلا باستغراب : انت وين بتوديني ؟ ( كانوا ماشين جهة الحديقة الخلفية اللي بالبيت , وهذا المكان ماقد راحت له حلا من اول ماجات عندهم )

طلال بخبث وهو يفتح باب غرفة خلفية : احب اربي فيران واسوي عليهم تجارب , تعالي شوفيهم

حلا بخوف وهي ترجع على ورا : لأ , منت صاحي تبيني ادخل ؟

........ : طبعا , ابيك تشوفين اشكالهم يجننون ..

........ : وع مابي رح انت

طلال ضحك : امزح معاك , شوفي ( دخل وشغل اللمبة .. وكانت حلا واقفة عند الباب .. )

كان يضحك على وجه حلا وهي مستغربه من اللي شافته ..

كان معمل كيمياء صغييييير .. حق طلال .. لان تخصصه صيدله ..

قال طلال وهو يأشر بيده : مافي فيران , تعالي

حلا بعد تردد دخلت , قال طلال وهو يحوس بالدواليب : تبين تجربين .؟

حلا ببراءة هزت راسها وقالت : ممكن ؟

طلال بابتسامه تدوّخ : طبعا حنا جايبينك هنا عشان تجربين

حست حلا بفرحة مو طبيعية , مهما شكرت طلال واهله , ماتوفيهم حقهم ..

حطت يدينها على الطاوله وجلست تتأمل في الأشياء ..

قال طلال وهو يبتسم : كاشخين اليوم !

حلا ابتسمت بس مافهمت : نعم ؟

أشر طلال على جفنه وقال : الشدو , من جيتي ماشفناك تحطين .. حلو !

حلا طاح وجهها من الحيا وماردت عليه , اما هو اكتفى بابتسامة ..

صاروا يحوسون بالتجارب والمحاليل والزحمة ..

قال طلال بجدية : انكب على يدك ؟ اغسليه بسرعة ترا يدك يصير لونها اخضر بعدين

حلا صدقت وخافت وغسلت على طول : إه ياويلي ,,

طلال اللي كان يضحك لما التفتت عليه حلا , قال : ياحليلك تصدقين بسرعه ..

حلا : اوووووه لاتضحك علي

مر الوقت بدون ماتنتبه حلا انهم لحالهم مع بعض ..

دخلت عزيزة وقالت : ها وش عندكم ؟

طلال يمزح : يمه ابلشتنا ذي حاست الدنيا علينا ماهي عارفه تسوي شي

حلا : اسكت لا تكذب

ضحك طلال على برائتها وعفويتها , وقال وهو يطلع : بروح ابدل ملابسي واجي , لاتفجّرين المعمل علي

ضحكت حلا وقالت : بس تجي تلاقي المعمل في خبر كان

جلست عزيزة على الكرسي وصارت تسولف على حلا

راح طلال لغرفته , كان لابس برمودا جينز وبلوزة كحلي ماسكه على جسمه , بدل ملابسه ولبس ثوب عشان العزيمة , ضبط شعره وحط عطر وطلع




جلسوا كلهم مع بعض , ووصلوا محمد ومنيرة , وكان استقبال حار ..

قالت حلا وهي لازقة بأبوها : شخبارك بابا الحين ؟

محمد : والله الحمد لله

منيرة : ابلشتنا زي البزران كل شوي تسأل .. ها صدقتي ان ابوك بخير ؟

حلا وهي تحط راسها على كتف ابوها : أي صدقت

محمد : خلوها هذي دلوعتي ..

طلال يطالع في حلا ويبتسم على حركتها , حلا انحرجت ووخرت راسها

قام محمد وشال شوق من حضن امها وقال : تعالي حبيبتي انبسطتي عندهم ؟

شوق : ايه , هذا حلو .. ( وتأشر على طلال ) ..

( منال وعزيزة ماكانوا موجودين معاهم ..)

صار الوقت انهم يرجعون , ودخلت حلا الصالة تسلم على عزيزة ومنال ..

سلمت على عزيزة .. قالت عزيزة بحزن : والله تعودنا عليك يابنتي . كلها اسبوع بس والله ماحسينا فيه , ليتك تقعدين عندنا اكثر ..

منال اللي ضمت حلا بعد عزيزة : ايه ليتك والله

حلا بدموع : لا والله ماودي ازعجكم واضايقكم اكثر من كذا .. مع اني مدري شسوي الحين بدونكم اذا رجعت بيتنا

قال طلال وهو جاي ناحيتهم , وكانت منال معطته ظهرها .. ومبين حلا ودموعها تنزل .. : يا إلهي لا أستطيع أن أحتمل كل ذلك .. كم هي مؤلمة لحظات الفراق , هاهي دموعي تنسكب بكل حرقة ...

ضحكت حلا وسط دموعها وقالت : دبّ , والله من جد بشتاق لكم , ما أستهبل ..

ارخت يدينها منال بس حلا رجعت ضمتها مره ثانيه وقالت : والله اذا ماجيتوا زرتونا ترى انا اللي بجي ..

منال تضحك : طيب

طلال حط يدينه على خصره ويبتسم , قال وبعدين طلع لسانه : وأنا مالي ضمّه مثلهم ؟

عزيزة ضربته على ذراعه : استح على وجهك

طلال مات من الضحك على وجه حلا لأنها صدقت كلامه : امزح يمه من جدك انتي ؟ وانتي يالهبله بعد صدقتي ( يطالع حلا )

ابتسمت له حلا وقالت : مع السلامة طلال , مشكور , ومشكورين على كل شي

قرب منها طلال شوي وقال : لا شكر على واجب , نخدمك بعيوننا ..

( وشال شوق من يمها وحبها ) وقال وهو يطالع شوي في شوق وشوي في اختها : تعالي العبي عندنا كل يوم , طيب ؟

شوق قالت : ايه , اذا جات حلا انا اجي

عزيزة : حلا اوعديني اذا احتجتي شي وأهلك مو عندك ولا تحت أي ظرف , علطول اتصلي فينا او حتى تعالي . وارقامنا عندك , واي شي تبينه قولي لا تستحين ..

حلا : ان شاء الله خالتي ماتقصرون والله ..

وخطفت حلا نظرة اخيرة لطلال اللي كان واقف مبتسم وفي نفسها كان ودها تضمّه فعلاً .. لكن مستحيل طبعاً .. ,, وفتحت الباب ,طلعت بدون ماتلتفت مره ثانية , مسكت شوق بيدها وركبت السيارة ..

وتركت حلا دموعها تاخذ راحتها في السيارة ...

( حلا ) ..

كل الأوقات الحلوة ,, راحت !!

ابكي على فرقاهم ..

شي مضحك .. مع اني معاهم بنفس المدينة .. لكني بصراحة خايفة ..

خايفه ما أشوفهم كثير .. وما أقعد معاهم ..

أخاف يحطون حواجز بيننا ..

ما أضحك معاهم كثير وأسولف ..

في أسبوع واحد بس .. تغيرت أشياء كثيرة في حياتي ..

اولها .. أني لما اروح السوق , بشتري برقع أو نقاب .. !!


ناوية افرّح طلال .. بهالتغيير ..!

صحيح اني يمكن ماتغطى عنه هو لانه ولد خالتي واحسه قريب لي ,,

بس على الأقل .. ما أحس أنه متضايق مني اذا طلعت معاهم مكان ..

أحس ان اهلي مارح يخلونا نتقرب من بعض زياده ..

مجرد فترة قضيتها عندهم وانتهينا ..

لا ... ما أبي

ابي اصحى الصباح على وجه خالتي عزيزة وهي تبتسم ..

وأشرب الشاهي على نفس الطاولة اللي يجلس عليها طلال , وجمبه منال .. !

أبي اضحك واسولف مع طلال وهو يوصلني الجامعة , ويجيبني منها ..

طماعه ؟ طيب .. على الأقل يوصلني بس .. !!

بفتقد هذي الأيام كثير ..

أيام ماكان طلال يجي ياخذ شوق مني ويلعب معاها عشان أرسم ( تجربة ) أو أحل ( مسأله ) .. أو أحفظ ( قاعده) ..

وأحيان كان يقعد جمبي ويحلّ معاي ..

ويعلّمني ..

مازلت اتذكر معمل الكيمياء الصغير .. !!

والفوضى اللي سبتتها هناك ..

وحديقتهم الصغيرة ..

اللي كنا نتناوب على سقايتها انا ومنال ,, وطبعا طلال ..

ومرات .. كنا نرش المويه على بعض ..



فجأه ... لقيت طلال يتربع على ذكرياتي كلها ,, وتدور حوله أغلبها ..

لأنني ببساطه .. ماكان لي أي احتكاك بهذا النوع من الناس ..

اقصد ( الجنس الآخر ) ..

!!

أو يمكن لأن شخصيته مميزة وحلوه .. ؟

أو يمكن لأنه عاملني بطريقة ماقد عاملني أحد فيها ؟؟

أو لأن عيونه بس .. فيها حنان ودفى العالم كله ..

وقلبه أكبر قلب عرفته ..

ووجوده حولي .. يحسسني بأمان .. مع أني احس دائما بارتباك وحراره ..

أو عشان ابتسامته تحسسني ان الدنيا بخير ..

ما أدري .. !


أف .. كل هذا استنتجته بأسبوع ..؟

صدق اني هبله ..!!

الجزء الخامس ..



وصلت حلا البيت وخلقها ضايق .. رمت نفسها ع السرير ودها تنام ,, بس ضلت الأفكار والذكريات تتزاحم في بالها ..

دخلت شوق وقالت : حلا , ليش مانلوح عند مشاوي .؟

سمعت حلا الأسم , وابتسمت ,, تذكرت مشاري الموظف اللي في المستشفى ,,

مع انها ماقدرت تتذكر ملامحه زين .. لكنه ظل في بالها دقيقتين ..

قالت حلا في نفسها : وش اللي جابه في بالها الحين ..

شوق : بس طلال احسن منه

ضحكت حلا .. طبعاً طلال احسن ,, طبعاً ..

مافي مجال للمقارنه بينهم أساساً ..

مافي مجال للمقارنة بين طلال واي احد ثاني ..

لانه في كل مره , بترجح كفة طلال ..

وبيكون هو الأحسن والأفضل والأجمل ..

في عيني أنا على الأقل ...!!

يؤ يؤ يؤ ..!

حلا اسمعي نفسك

وش قاعده تقولين .. ؟

صدق انك انهبلتي ..

ضحكت حلا اكثر على نفسها بعدين خذت جوالها واتصلت على غدير ..

حلا : هلا بالعروس .. شخبارك ؟

غدير تضحك : انا تمام , وانتي شدي حيلك عشان تصيرين عروس مثلي

....... : تقولين شدي حيلك كنّه دراسة أو اختبار , لا ..! تكفين , فكيني من هالسالفة ..

........ : والله من جدي , ترا فيصل عنده اخو اصغر منه بسنه , واذا بغيتي اضبط لك الموضوع

......... : هاي انتي ! وش شايفتني عانس ولاداقه اطلب منك رقم خطابة ؟

......... تضحك : لا يعني بس قلت لو ناخذ اخوان عشان نظل قريبين من بعض ..

......... بمزح : لا ! انا ابي فيصل !

.......... بعصبية : نعم ! لا ياماما فيصل حقي . انتي دوري لك واحد ثاني

......... : يالخاينه , وين ايام الثانوي تقولين انا وانتي مانتزوج الا واحد ويسكننا حتى بشقة وحده , هذي الصداقة اللي تعرفينها , طلعتي أي كلام ..!

......... : اوه هذي من جدها صدقت , شوفي لك كل شي تبينه ... الا فيصل . .. ( وتغيظها بنبرة صوتها ) لأ يعني لأ ..

....... : احسن خلي فيصلك لك وععععععععععع من زينه , طلا.. ( بتقول طلال احلى بس ماكملت )

....... وكأنها استنتجت شي : ايه وشفيه طلال ؟

........... : انا ما قلت طلال اصلا

........... : حلااااااااااااااااااا لا تنرفزيني , قلتي طلال

.......... : دبّه , ماقلت ..

......... : طيب خلاص ماقلتي , غيري الموضوع

حلا تعاندها : طلال احلى من فيصل بمليون وعشر طعشر مره !

غدير : الشرهه علي انا اللي اوريك صورته ..

حلا : احسن تستاهلين

غدير : طيب قولي يللا وشصار معاك ..

ضحكت حلا بعفوية على غدير اللي مهتمه تعرف السالفة ومانستها ..

طيب .. اسمعي ..

وقلت السالفه لغدير اللي بدورها قالت قصتها مع فيصل وحددت موعد للملكة ..

قالت بعدها ,, وحسيتها صادقه في كلامها : احس انك مارح تنقطعين عنهم , بالعكس تقوى علاقتك فيهم اكثر , بأي طريقة كانت ..

استغربت من جملتها الأخيره وقلت : كيف بأي طريقة يعني ؟

قالت بتهرب من الإجابه : لا , قصدت يعني .. باي طريقة يعني .. مدري خلاص مدري

قلت انا : دببببببببّه والله انك بايخه , فهمت قصدك اصلا , لا تفرحين ماقد فكرت في هالشي

ماصار لي معاهم اسبوع اصلا ..


قالت غدير وهي تصر على كلامها : تحبينه , والله انك تحبينه ..

قلت وبكل ثقه : أي احبه , بس مافكرت بفكرتك هذي .

قالت غدير وحسيت بالتأكيد في كلامها : يعني طول المده اللي قعدتي فيها عندهم , ماتخيلتي ولو مره , انك تتزوجينه او على الاقل تنخطبين له ؟

انا بكل تأكيد واصرار نبع من قلبي : منتيب صاحية , لا طبعاً , صحيح اني افكر في طلال كثير .. واحبه ,, بس ما أعرف نوع الحب اللي بيني وبينه .. ولا فكرت اصلا او تخيلت ..

قالت بكل هدوء : طيب وش فيك عصبتي ؟ ترا مو عيب ولا حرام انك تفكرين او تتخيلين في شي زي كذا ..

قلت انا وبين في صوتي ضيقة الخلق : يعتبرني اخته , او يمكن حتى بنته .. احس عطف في تعامله , مو اكثر من كذا ..

قالت غدير وحسيتها تتحدى : طيب , الأيام تثبت لك ولي هالشي , وبتقولين غدير قالت ..

توّني بكمل كلامي .. قالت لي غدير باستعجال : حلا اكلمك بعدين .. معاي خط

قلت بمكر : مييييييين ؟

قالت بعصبيه وسكرت بعدها : انقلعي اكيد فيصل ولا ماكا ن صرفتك , باي

ياحليلها غدير ,, ودي اشوف وجهها وهي تكلّمه .. احسّ انها متخبّيه تحت السرير أو ورا الباب ..

ماودي اضحك ,, اكيد انا بلوتي أكبر لو أني بمكانها .. !!


بعد ايام ..

صحيت بدري ,, بديت اروح الجامعة بالباص ..

كنت اروح معاه احيانا بداية السنة .. بعدين بطّلت ..

ليه غيرت رايي الحين ؟

مادري .. منال بنت خالتي تروح بالباص .. بس الفترة اللي قضيتها عندهم كان يودينا اخوها عشان ما أصير بلحالي معاه ..

احم , مبيّنة التصريفة ؟

طيب خلاص ..

رحت مع الباص عشان طلال !



كان يقول ان الباص أحسن ,, ويصير معاك جماعه ومو بلحالك .. ويعوّد الناس على الإلتزام بالوقت والمواعيد ..

مع اني ادري مايهمّه اقتنعت بكلامه ولا لا ..

بس ..


سمعاً وطاعه طلال ..!


ركبت الباص وطبعاً تلفت على كرسي فاضي .. ماحب اقعد جمب احد الا اذا كنت اعرفه ..

مافي سبب كبير .. بس في بنات ملاقيف ,, عينهم عليك طول ماهم قاعدين .. مايمديك تكتبين مسج ولا تقرين شي , حطوا عيونهم عليك ..

كالعادة ,, سندت راسي على الشباك ..

سرحت وأنا أتأمل ( الرايح والجاي ) .. السيارات والناس , وأحاول أحفظ الطريق اللي صار لي شهرين أشوفه وكني أول مره أشوف شوارعه ومبانيه ..

اعتقد انها ميزه تخص الرجال ... !

ماشاء الله عليهم

من اول مره يروحون مكان .. يحفظون الطريق علطول ..

او ان انا مخي مايهتم بهذي الأشياء .. !

الحمد لله ان الحريم مايسوقون سيارات ..

وخاصة أنا ..

اللي مداومه في صحارى مول , ومادري الى الأن في أي شارع هو .. !



المهم .. وقف الباص .. !

كنت اظن انه تعطّل , بس يوم صحيت من غفوتي البسيطه ,, شفت بوابة الجامعة .. !

وصلنا بهالسرعه ..؟

فعلاً ما أحس بالوقت لما أدخل (عالم افكاري ) ..

يـــتــــبــــــــــع

لعيوونـ عبآديـ *؛^

دخلت وشلت عبايتي ..

كنت امشي في طريقي للكافتيريا , اللي التقي فيه بالبنات دايما ..

رن جوالي , وذكرني اني ماحطيته عالسايلنت ..

كانت منال ..

رديت بمرح : يالله صباح خير , نعم وش هالازعاج ؟

قالت منال : شفتي شلون ! ماقدر اصبر عنك

انا : هههههههههههههههههه تكفين عاد

منال : انتي بالجامعه ؟

انا : لا نايمه بالبيت

ضحكت على منال اللي شكلها مافهمت المزحه : تستهبلين ؟

قلت : طبعا , وشلون نايمة واكلمك ؟

ضحكت منال على غبائها : طيب , وش اخبارك ؟

...... : تمام الحمد لله , انتي كيفك ؟

...... :تمام

.......: منال , لا تقولين مو جايين بيتنا الاربعاء هذا , ترا كل يوم تأجلون .!

....... : لا ان شاء الله بنجي ..

قلت بفرحه ,, واعتقد اني صرخت لان البنات اللي كانوا يمشون حولي ,, كلهم التفتوا علي ..

: قولي والله !

انحرجت وابتسمت , وبعدت عنهم شوي قلت باهتمام : وطلال .. بيجي معكم ؟

قالت منال بعد تفكير قصير : مادري , ماتوقع ..

...... : مو على كيفه , لازم يجي !

قلتها بحماس , واعتقد ان منال استغربت من جملتي وقالت : طيب ..! بقول له , وان شاء الله يوافق ..

قلت باحراج : طيب .. ردّي علي ..

....... : اوكي .. يمكن ادق عليك المغرب لان عندي تأخير اليوم ..

.حاولت ارقّع واصرّف .. قلت وانا فيني الضحكة : ايه ترا شوق أبلشتنا في البيت , كل يوم تسأل متى يجي طلال

حسيت ان السالفه ما مشت على منال , بس وشسوي , قالت : ياحليلها , أي والله طلال يحبها ,,



وأنا طيب ؟ تراي حبوبه وحليوه .. وخفيفة دم .. والناس يحبوني ,, ليه شوق بس .. ؟

قلت بمزحه : الله يهني سعيد بسعيده ,, يالله انا وصلت عند البنات , انتظر اتصالك المغرب

قالت منال وهي تضحك , حسيتها تتخيل شوق وطلال : يللا مع السلامه ..

سكرت منها ,, ومسكت الجوال بيدي .. وضحكت ضحكه وانا منزله راسي , عشان ماينتبهون البنات ..

الحين يقولون خبله ..! تضحك بلحالها ..

تخيلوا وحده كذا تمشي تتذكر اشياء وتضحك .. !


اوه وين راحوا البنات .. ؟

رفعت لي وحده منهم يدها , ورحت لعندهم ..

قالت وحده منهم : مضيعة انتي اليوم .. !

قالت الثانيه : ماتدرون شالسالفه , حلا لابسه نظارات , يمكن عشان ماتشوف !

قلت وانا ارفع نظارت الشمسية , واجلس على الكرسي : بااااايخه مايضحك ..

الكل ضحك ,, عداي انا ..

قالت نوره : الله يعين , شكلها حقدت علينا ..

.... : لا ماحقدت , تذكرت ان عندي كيمياء , ودكتورتنا تجيب المغص , مغروره وماتفهّم شي

( ويوم قلت كيميا , تذكرت طلال ,, وابتسمت )

قالت وحده منهم : الحمد لله , قبل شوي مكشّره والحين تبتسم !

ضحكت على نفسي وانا اطلع محفظتي بروح الكافتيريا : اقوم اجيب لي فطور اصرف ..


بعدها ...

طلعت من المحاضره الغثيثه , ورحت ادور على غدير , ابي اقول لها عن مكالمة منال , ماني قادرة اصبر .. !

: الو , غدير يادبّيه وينك فيه ابغاك

غدير بصوت تعبان وكأن مالها خلق : انا في مبنى 21 , تعالي لي

..... : اف حرام عليك بعيد . مالي خلق امشي

.... : اجل اقعدي مكانك !

..... : نعم ! لأ بجي , عندي سالفه لك ..

..... : اجل بلا كسل , انا ماني قايمه , عندي محاضره بعد ربع ساعه بنفس المبنى , تعالي بسرعه

..... : طيب انا جايه , وتلفّتي حولك على مكنسه ولا عصا , عشان اذا جيت تصفعيني فيها !

عليك أخلاق تجاريه غدير ..


قالت غدير : اوه ! نعسانه ,, انتي تعالي بس !

وسكرت منها وانا امشي لعندها ..

دخلت المبنى , وشفتها جالسه تحوس بجوالها , وقفت قبالها وقلت : خير ؟

رفعت راسها باستغراب : وشو ؟

..... : وش عندك قاعده عند المصعد ؟ تشحذين ؟

..... : المبنى هذا دايم مليان , ومافي مكان ..!

تربعت قبالها وقلت السالفه , وتوني مخلصه , ضحكت غدير ,, وضحكه حسستني ان تصريفاتي لمنال من جد بايخه ومضحكه ....

قلت بترجي : قولي يارب يجي معهم

قالت وهي تفرك عيونها : احسب عندك سالفه , قومي على محاضرتك لا تشوتك الدكتوره !

..... : اوووه طيب انتي وش تتوقعين انتبهت منال ولا لا ؟

..... : البزران ماتمشي عليهم ياحلوه .. كيف منال .. ( وقالت حسيتها تبي تخوفني ) : الحين بتقول لطلال وبتطلعين مطفوقه قدامه

شفت الساعه .. وكان باقي 5 دقايق على المحاضره , قمت واقفه ,, وخذت الملزمه اللي بحضن غدير , وطقيتها بخفيف على راسها وقلت بعصبية : والله مقابل وجه الدكتورة سعيدة اصرف من مقابل وجهك وانتي تستهبلين ..

وصلت البيت .. ومادري ليه كنت كل شوي اطالع بالجوال .. انتظر منال تتصل , مع انها قالت لي مارح تتصل قبل المغرب ..

طبعا مافي وقت انام .. المطبخ وأمي ينتظروني عشان عزيمة اليوم .. اقوم ابدل ملابسي وانزل تحت احسن لي ..




الوقت يمر .. والمغرب اذن .. راحت حلا صلت وبدلت ملابسها .. مسكت جوالها وجلست على السرير .. محتاره تدق هي على منال ولا لأ .. !

اخر شي قررت انها ماتدق ...

بعد فترة .. وصلوا الضيوف .. عزيزة ومنال .. و ................طلال ..!


جلس طلال 5 دقايق بعدها استأذن ..

ماحبّ انه يطول عندهم عشان تاخذ حلا راحتها ..

طلع وراح يتمشى ,, وقضوا الاربعة احلى اوقات مع بعض .. وحلا مبسوطة بس كان ودها ان طلال يكون معاهم ..

صحيح انه مايجلس معاهم كثير لانه يبيها تاخذ راحتها , بس كانت الاوقات اللي يكون فيها موجود .. من احلى الاوقات .. وامتعها ..

قالت منيرة وهي تكلم حلا : قومي البسي عبايتك , الحين بيجي طلال بياخذ اهله , وروحي المطبخ جهزي كاسة عصير عشان اذا جا ..

حلا وهي بتنط من الفرحة لان طلال بيرجع : ان شاء الله

راحت حلا وجهزت الصينية وطلال دخل المجلس وارتاح على الكنبة في الوقت اللي كانوا عزيزة ومنال يلبسون عباياتهم ..

دخلت حلا ووقفت من بعيد .. وحطت الصينية من بعيد برضو .. وقالت : تفضل طلال ..

طلال : يزيد فضلك مشكوره .. ( وابتسم ابتسامه خلت حلا تلتفت على منال ) وتصرّف وتغير الموضوع : عاد لاتقطعون عنا تعالوا دايم

منيرة : أي والله ماودنا ننقطع مره عليكم ومره علينا .. الله يعينكم عاد ( وتضحك )

عزيزة تضحك : والله حياكم الله باي وقت , انا مدري ليه حنا من زمان قاطعين , خلاص ا شاء الله المره الجاية علينا احنا

منيرة : ان شاء الله

سكتت عزيزة شوي بعدين ابتسمت وطالعت في حلا وقالت : ليه مانلم الشمل , وناخذ حلا لطلال , ويصير مانقطع ابد .. وشرايك .. ؟

الكل سكت وعيونهم على اثنين .. حلا .. وطلال .. في انتظار ردّة فعلهم ..!!

الجزء السادس ..

وجه حلا كان خالي من أي تعابير .. غير انها نزلت راسها ومانطقت بكلمة ..

طلال كان يشرب العصير .. وجّه نظراته لأمه وابتسم , بس كانت ابتسامه مانتبهت لها حلا , لان شفايفه كانت مازالت على الكاس , وهو مارفع الكاس عن وجهه , وظل يشرب ..

قالت منيرة وهي تبتسم : موضوع سابق لأوانه , نفكر ونرد عليكم ( وغمزت لعزيزة )

حط طلال العصير على الطاولة , وقال لما شاف حلا بينفجر وجهها من حمرته : يللا يمه , مشينا ؟

ضحكت عزيزة على حلا وسلمت وطلعوا ..

سكرت حلا الباب وراهم وقفلته بقوه خلت امها تضحك عليها . قالت منيرة وهي تمسك نفسها من الضحك :

وشفيك حلا ترا ماقلنا شي غلط .!

...... : نعم ! وش غلط قسم بالله فشله , كذا علطول يللا لصّقوني بالرجال .. ما أحب هالأسلوب

...... : هي قالتها بس كذا , بس يوم فكرت فيها , قلت ليه لا ! ,

خلاص طيب لاتعصبين علينا اعتبريها تمزح

...... : حتى لو تمزح , تقول قدامه كيفها , او قدامي كيفها , بس مو وحنّا مع بعض ,

...... : حلا تراك مكبره الموضوع , ماتبينه خلاص عادي مارح نغصبك عليه .. !

......: من جدكم انتوا ؟ توّك تقولين نمزح ..!

...... : اقول حلا , شيلي الصينية لو سمحتي وروحي بدلي لشوق اختك وخليها تنام , ومدام ان حنّا ازعجناك بالموضوع , خلاض فكري فيه بعدين .!

شالت حلا الصينية وحطتها بالمطبخ ورقت فوق علطول وفيها الصيحة من الاحراج ..

رمت نفسها على السرير ..

قمة الاحراج ..!

الله يهديهم ذا الكبار مايهمهم احد ..

لا وتقول لي قدامه ..!

المشكلة اني ماقدرت حتى اشوف تعابير وجهه ووش ردة فعلة ..

يالله احس اني مالي وجه فيه ..

ماقدرت اطالعه حتى ..

بغيت اطلع من المجلس بكبره .. !!

اعوذ بالله على هالسوالف ما أحبهاااااااااا ..


وفي السيارة .. انفتح نفس الموضوع مع طلال

قالت منال الملقوفه : ها طلال ماقلت لنا وش رايك تبغى البنت ولا لا ؟

طلال رفع راسه على منال من مراية السيارة بس ماردّ عليها

عزيزة : أي ياولدي وهي الصادقه وشفيها حلا والله ان مافي مثلها وتناسب لك

قال طلال : يمه ..! الحين انا قلت لكم بتزوج ؟ انا خلصت دراستي اصلا ..؟

...... : لا ياولدي ماقلت .. بس انت باقي لك ترم او سنه بالكثير وتتخرج ان شاء الله .. احنا مانقول لك تزوجها الحين .. على الاقل نخطبها .. عشان ماتروح البنت مننا

يعني بنت اختي واعرفها , صح ماكانت علاقتنا فيها قويه بس انت بنفسك شفت , شهرين مدري ثلاثه من جات عندنا وكأنها وحده مننا , وانا ملاحظه على معاملتك لها مره حلوه , ومو مقصر عليها بشي ..

قال طلال بعد ما أخذ نفس طويل : طيب , لما اهتم فيها واسأل عنها واعاملها اوكيه , معناها اني ابغاها ؟

منال : لا . بس ماقلت ماتبغاها ..!

طلال : قفلوا الموضوع بليز مو وقته .. اصلا انا تشغلني دراستي ماني فاضي لشي ثاني .. وطول ماهي بنت خالتي وحسبة اختي بظل اهتم فيها واحرص عليها وأسأل عنها , انتي تعرفين ان خالتي الله يهديها مخليتها على راحتها , وابوها تعبان هالفترة ..

وفتح طلال موضوع ثااني تهرباً من الموضوع هذا ..






الايام تمر .. وطلال يروح ويجي على بالي .. مو عشان الكلام اللي قالته خالتي عزيزة ..

كل فترة وفترة تتصل علي منال , وتسألني ان كنت ابي شي ...

حلا طلال يقول لك بيروح المكتبة تبين شي منها ..؟

حلا , انا وطلال بنروح السوق توصين شي ..

حلا , اكيد مو محتاجه تروحين مكان او تشترين شي ..؟

مع ان عندي سواق واقدر اطلع بس الفترة الاخيرة عشان ابوي تعبان , ماقدرت اطلع , والصراحة استحيت اقول لهم ..

بس طلال بنفسه قال لمنال وخالتي خلينا نطلع نتمشى وناخذها معانا ..

رحت لابوي استأذنه , وبالموت وافق , مدري ليه ..

وامي حسيتها بعد مو راضيه مره , بس وافقت ..

صراحه طفشت من البيت ..!


وكانت طلعتنا , احلى طلعة , وكانت احلى مره اروح فيها لصحارى مول .. ليه مادري ..!

خاصة ان شوق ماكانت معانا , وخليتها عند امي , ارتاح من مسؤليتها والمراكض وراها في كل مكان ..

بس من جد .. حياتي معاهم . غير ..

وتعاملهم معاي وطيبتهم ..

بس مدري هل لان انا كاسرة خاطرهم , ولا وش القصه ..؟

المهم , شريت اكسسوارات لفستان ملكة غدير ,, واللي بعد يومين ان شاء الله ..

ياعمري غدير .. حالتها حاله .. خليني اكلمها واتطمن عليها

........ : الووووووو غدير يالشينة وينك

.......... بصوت نايم : هلا والله

....... : انتي نايمه من جدك , الساعه 8 بالليل ترى

......... : تكفين اسكتي , ترا بالموت انام هالايام ..

.........: ههههههههههههههههههههههههههههههههههههههههه الله يعينك على ما بلاك , انتي اللي تبين فيصل وتبين الزواج .. تحملي

........ : والله لو انك حولي كان مايردني الا جوالي في جبهتك , يللا .... قفلي الخط .. ابي انام

........ : ماشاء الله عليك ذوق , لا مارح اقفل وش رايك , قومي يللا بعدين تسهرين بالليل ..

قالت غدير بطفش ممزوج بشوي عصبية : الله يسلط عليك طلال ..... ويحرمك من النوم .... مثل ماحرمني فصيل منه

........ : لااااااااااااااااااااااااااااااااااااااااااااااااا ااااااااا استغفري ربك , خلاص والله بقفّل الخط روحي نامي للصبح مابي منك شي , يللا مع السلامه مع السلامه ...


صاحية ذي ؟ وش فيهم علي يبغوني اتزوج غصب .. ؟

صحت غدير بعدما تقلبت على السرير كم مره وماجاها نوم بعد ما اتصلت عليها حلا , خذت جوالها وكتبت مسج لحلا وهي تضحك : ( الله ياخذ بليسك , عيّا يجيني نوم جالسه اتقلب زي الدجاجه على الفحم , مالت عليك ..!)

ردت حلا : احسن ! محد قال لك تدعين علي يادبّه

غدير : وبدعي هالدعوه بعد في اوقات الدعاء المستجابه ..!

حلا حطت ايقونة وجه مطلع لسانه , وكتبت : انقلعي , بس أي شي يجي منك حلو ( وجلست تضحك بقوه)

غدير ضحكت وقامت من سريرها


راحت سلمت على ابوها وامها , وققفت تتكلم معاهم عن الملكة شوي ..

رجعت لغرفتها , وكانت تسمع جوالها يرن ويوم وصلت له قطع ..

هذي اكيد حلا الهبلة ..

شافت الرقم .. فيصل !

معقولة ..؟

يقطع تفكيرها صوت رسالة جديدة , وتفتحها تلاقي مكتوب فيها : هلا غدير .. كيف الأوضاع عندك محتاجة شي ولا كل شي أوكيه ؟

فكرت كثير وش ترسل .. ووقفت قدام المراية وشافت وجهها احمر , ضحكت على نفسها وكتبت بالمسج : هلا فيصل ..لا .. كل شي تمام , مشكور ..

وارسلتها ..

ثواني ويتصل طلال .. دق الجوال اربع مرات على ما استوعبت وردت عليه ..

فيصل : مرحبا غدير

غدير : هلا ..

فيصل : كيفك ؟

...... : تمام

...... : ليه ماتصلتي , ولا خايفة على حدّك الائتماني ؟ ( ويضحك )

...... : لا ... بس ماحبيت ازعجك ..

سكتت غدير تبغى تنهي المكالمة ,, قال فيصل وكسر الصمت اللي بينهم : طيب اكيد مو ناقصك شي , كل شي تمام حتى الاستراحة والتجهيزات ؟

...... : ايه كل شي

...... : الحمد لله , يللا اشوفك على خير

سكرت غدير الجوال ورمته على السرير , وطلعت من الغرفة تشرب مويه لان حلقها نشف ..!





**


كذا هي الايام ... تمر احيان بسرعه , واحيان ببطء .. وهالمرة .. مرت بسرعة .. وصار وقت ملكة غدير .. وباقي ساعتين على الملكة ..

قالت حلا لامها وهي ماسكة فرشة الشعر ومعصبه : ماما , وخري شوق عني , ماني عارفه اضبط شعري ..

منيرة : وش اسوي فيها هي لازقة فيك

حلا : الحين بتأخر وانا لسه مالبست , انا بقول لها امي تبغاك وانتي جلسيها عندك ولا عطيها أي شي تلتهي فيه

منيرة بتأفف : طيب ..

لبست حلا واستعدت .. وخذت نظره على المراية قبل لاتطلع ..

ابتسمت برضا ..

من زمان ماطلعت عزايم او عروس .. وكشخت هالكشخة ..

كانت لابسة بلوزة جبانيز(كم صغير) سكري ماسك فيه شك ناااعم بلون وردي غامق شوي .. وتنورة ميدي ساده بنفس لون الشك ..

طالعه ناعمه وشكلها روعه ...

دخلت منيرة الغرفة , طالعت في حلا وقالت : ماشاء الله , الله يحفظك يابنتي ..

حلا : والله حلو ؟

منيرة : ايه يهبل (سكتت شوي بعدين قالت بمزح) , بس هذا وهي ملكة صديقتك , اجل لو ملكتك ولا عرسك كان وش بتلبسين ؟

حلا طالعت لبسها : هذا بدله اصلا حتى مو فستان , وبعدين هذي غدير مو أي وحده ...

منيرة : بكيفك , ماقول الا الله يبلغني فيك واشوفك لابسة فستان عرسك

حلا حست ان امها تبي تفتح معاها موضوع طلال : ايه يصير خير بعد 8 او عشر سنين ..

....... : اف ! وليه انتي وش ناقصك عن باقي البنات اللي تزوجوا في سنك وقبلك بعد ؟؟

....... : لا مو ناقصني شي , بس الحياة مو كلها زواج , خليني ادرس واتوظف بعدين يصير خير !

...... قالت ومو عاجبها الوضع : مين اللي بينتظرك عاد لين يلين راسك وتتزوجين ؟

ابتسمت حلا : اذا في احد يبيني بصدق , بينتظرني ..

قالت منيرة وهي تطلع من الغرفة : الله يكملك بعقلك بس ..! .. ايه تذكرت وش جايه بقول لك .. , وانتي طالعه خذي شوق ونزليها بيت خالتك عزيزة , انا وابوك بنطلع بعد شوي , واذا اخذناها معانا بتبلشنا

تنهدت حلا , وقالت باستياء : اخاف اتأخر

....... : اذا طلعتي الحين ماراح تتأخرين .. انا كلمت خالتك عزيزة وقلت لها وقالت انهم موجودين بالبيت ..


**

لبست عبايتي وخذت شوق .. ركبت السيارة وانا اطالع الساعة .. خايفة أتأخر ..

كانت شوق تسولف .. بس بالي ماكان معاها .. كان مع غدير ..

اخاف تزعل لو تأخرت عليها , عاد وش يفكني منها ..

وصلنا بيت خالتي وحسيت المسافة طويييييله , انا ومن لقافتي ووسط زمحة افكاري وتأخيري ,, طليت في الكراج ادور سيارة طلال .!


والحمد لله كانت موجوده ..

مع اني مارح اشوفه بس ارتحت يوم لقيت سيارته ..

دقيت الجرس وانفتح الباب ... دفيت شوق لداخل , وظليت واقفه في مكاني ..



سمعت صوت منال من ورا الباب تقول : حلا , ادخلي

ماحبيت اردّها وماعندي وقت دخلت وسلمت عليها بسرعه .. وعطيتها شوق ..

قلت وانا اضحك : عسى ماتزعجكم , تراها شيطااااااانه ماتخلي شي في مكانه

منال : لا عادي بالعكس تونسنا ..

اقبل طلال من بعيد , وكان صوته واصل قبله. ناداها بدون ماينتبه لي وقال : منااال كم مره اقول لك لا تفتحين الباب وانا موجود ؟

قالت منال : وشفيك عادي .... هذي حلا جايبه شوق ..

تقدم طلال ناحيتنا انا وشوق , وقال وهو يبتسم بفرحة يوم شافها لابسه البرقع : هلا والله بنت خالتي , ادخلي حياك (والتفت على منال ) انتي ليه مخليه البنت واقفه برا ؟

قالت منال : قلت لها والله بس هي تقول مستعجلة ..

حلا : مشكورين والله ماتقصرون بس السواق ينتظر ..



انا قلت هالكلام .. وليتني ماقلته ...!!


لأني خفت من طلال ..



التفت علي وطلعت عيونه على برا .!! . وقال باستغراب وعصبية خفيفة : جايه مع السواق .. لحالك ؟ ؟

الجزء السابع :

قلت بصوت خايف , وبعد ثواني من السكوت : ايه .. اضطريت .. بابا تعبان ..

ودارت عيوني حول طلال .. في انتظار ردة فعله ..

غمض عيونه واخذ نفس . وقال بصوت جاد : كم مرة اقول لك لاتروحين لحالك .. ماتخافين على نفسك انتي ؟


رجعت على وراي .. واظن ان عيوني اطلقت صفارة الانذار .. وفي دموع تنتظر أي كلمه زياده من طلال عشان تنزل


قلت بعفوية : لاتهاوشني ..!


طالع فيني طلال ثانيتين ... التفت لمنال وقال : لحظه لاتخلينها تروح ..


استغربت منه ..ناوي يحبسني عندهم ؟ خير ان شاء الله .. ؟

صح قلنا حريص علي ويخاف , بس مو يهاوشني , وش دخلني انا ابوي اللي راضي .. !.. وبعدين ماله حق يصرخ علي


حركتك بايخة طلال ؟؟



قالت منال : معليه حلا , ترا اكيد مو قصده .. هو بس مايحب احد يروح مع السواق لحاله , ما يأتمنهم يعني


لفيت عن منال ومارديت عليها , جا طلال عند المدخل وفي يده مفتاح وجوال ,و قال لمنال : قولي لامي اني بروح اوصلها وارجع ..

!!

كذا يعني غصب .؟!

طيب مابي نصير انا ويّاه لحالنا .........!

قال بدون مايطالعني : يللا حلا


تقدم هو ومشيت وراه .. ركب سيارتنا جمب السواق ..

طول الطريق مانطقت انا بكلمه .. ومافتحت أي موضوع ..

وطلال .. شكله ماوده يعتذر ..

ومايبي يفتح أي موضوع ابد ..!

احسن , لانه لو تكلم .. ماكنت رح اردّ عليه ..

كذا .. انا عارفه انه معصب .. لاني ماتصلت وطلبت احد يوصلني ..

طيب .. والله احراج علي ..



اوووه , والله الحين بشغل بالي بطلال وبضيّق خلقي .. ووراي ملكة المفروض اوسع صدري فيها ..


دخلت موقع الملكة ..(بيت غدير) .. واتجهت علطول لغرفتها ..

غدير : ويييييييينك ليه تأخرتي والله فكرتك مارح تجين

....... : افا عليك وانا اقدر افوّت شي مهم مثل هذا .؟

........: طيب كيف مكياجي زين ؟

....... : ايه ماشاء الله مره حلو ومضبوط ... ولا الفستان اللي احلى ,,,,,, الله يثبت قلب فيصل في مكانه ..!

(كانت غدير لابسه فستان تفاحي بدون اكمام وجيبه واسع شوي .. وفيه شك كثييير .. وفيه تشجيرات خفيفة من تحت وفي الذيل .. ومبين جسمها حلو مع المكياج)

ضربتني بخفيف على راسي بمزح وقالت : وانتي الله يعين طلال عليك

..... : وش دخل طلاااااااال لاتدخلينه بكل سالفه غصب

...... : طيب خلاص ولايهمك , لاني ماني فاضية لك الحين .. بعدين يصير خير انتي وياه


طلعت لساني لها وقلت بمرح : لا الحين ولا بعدين ..! انا بنزل يللا اقري المعوذات على نفسك ..

نزلت تحت .. وانا اضحك على نفسي ..



على فكره .. انا اكثر وحده في الدنيا .. تحب تكابر ..!




صارت الساعه 11 .. واستأذنت عشان ارجع البيت .. امي اتصلت وقالت انهم بيمرّوني .. سلمت على غدير .. ولبست عبايتي وطلعت ..

ركبت السيارة وسلمت ..

قالت امي : كيف الملكة حلوة ؟

...... : أي والله خطيرة

قال بابا : عسى انبسطتي ووسعتي صدرك .. ؟

كمّلت ماما : وقطعتي نفسك رقص ؟

ضحكت : ايه انبسطت .. بس مارقصت كثير لاتخافين ماما , اغلب العزيمة ناس ما أعرفهم فشله

قالت امي برضا : ايه زين

...... : وين شوق ؟ مازالت بيت خالتي ..؟

قال بابا : ايه الحين بنروح ناخذها

سكتت انا .. ماكان ودي تطول شوق عندهم .. بس وش اسوي في ابوي وامي ..

بعد دقيقتين من الصمت .. رفعت ماما جوالها واتصلت

قالت بعد ترحيب وسلام طويل : الله يعافيك عزيزة هذا احنا عند الباب بناخذ شوق ..

عزيزة : لا والله تدخلون وتتقهوون ..!

....... : لا عزيزة أي قهوه الساعه 11؟

....... :شوفي عاد .. اليوم اربعاء.. يعني اما انكم تدخلون تتقهوون .. ولا مانردّ لكم شوق ..!

....... : كذا يعني ؟ خلاص بس عشر دقايق ..

....... : ايه يصير خير انتوا تعالوا بس ..

فهمت حلا من المكالمه انهم بينزلون شوي بيت خالتهم .. فرحت بس كانت متضايقه بنفس الوقت من موقف طلال يوم يهاوشها

يارب يكون طلال مو موجود ..!!

نزلت حلا وامها .. اما محمد نزلهم ومارضى ينزل معهم لانه حس بالحرج خصوصا طلال مو موجود .. قال بيروح السوبرماركت وبيرجع ..


قالت عزيزة : ها حلا .. انبسطتي ؟

حلا : ايه الحمد لله

جات منال وقالت : عن اذنكم ,, انا باخذ هذي شوي ابيها تسولف لي من زمان عن هبالها

عفست حلا وجهها : مقبوله منك , امشي يللا عندي سوالف كثييره ( وتضحك)

جلست منيرة تسولف مع عزيزة .. وحلا راحت مع منال غرفتها فوق

قالت منال : وش تبين تشربين ؟

حلا : شوفي مارح اجاملك ولاّ ماله داعي و تسلمين , ابغى ببسي تكفيييين عطشانه ..

منال : طيب .. ( وفتحت باب الغرفة وقالت : جميلة جيبي ببسي فوق)

شالت حلا عبايتها , وقالت منال وهي تصفّر : ارحمينا شوي لو سمحتي ايش الاناقه هذي

حلا : تكفين ترا والله شاريته ومو معجبني بالموت اقتنعت فيه ..

....... : انطمي والله روعه ماشاء الله , من وين شريتيه ؟

...... : ماأذكر والله اسم المحل بس اتذكر مكانه

..... : والله انك هبله

..... : شكرا

طق الباب , قالت منال بسرعه : مفتوح تعالي

انفتح الباب .. كانت منال معطه ظهرها للباب وحلا فوجهه ..

صنمت حلا في مكانها وماتحركت .. وطلال من عند الباب لسّه ماستوعب الموضوع ..

قال طلال باحراج وهو يطلع ويسكر الباب : اوه ! .. آسف آسف ..

كانت منال تفكر ان الخدامه عند الباب , لان طلال كان طالع ماتوقعت انه بيرجع الحين ..)

وطلال جا من برا وراح فوق علطول بدون مايروح غرفة الحريم اللي فيها امه وعزيزة وشوق ..

والبيت كان هاااادي مايبين ان فيه ضيوف

راح طلال غرفته بعد الموقف المحرج .. وقفل الباب ووقف وراه .. وقال بعد ما أخذ نفس وابتسم باعجاب غصبا عنه : لا والله .. ماني آسف ..!

قطع افكاره وتخيلاته صوت امه تناديه .. طلع من الغرفه ونزل تحت .. وكانت خالته لسه ماراحت ..

قالت شوق : طلااااااال وينك ؟

نزل طلال لمستواها : انا هنا , طلعت شويه وجيت

شوق ضحكت : طيب

التفت طلال لأمه ومنال وحلا اللي واقفين في الصالة .. حلا راحت تلبّس شوق جزمتها وعزيزة راحت لمنيرة ا المجلس

وقفت حلا تسولف مع منال دقيقتين وشوق فلتت منهم .. راحت المطبخ وبعد فتره قصيره سمت حلا صوت تكسير قزاز ..

ركضت حلا وكانت شوق جالسه على الارض تصيح

قالت حلا بخوف : شوووق وش سويتي ......... ياللله شوفي يدك كلها دم

منال : شوق حبيبتي ليه كسرتي الكاسات؟

قالت شوق بصياح : كنت ابغى اشرب مويه ..

كانت حلا تطالعها وماهي عارفه كيف تتصرف .. فجأه انمدّت يدين من فوقهم وهم جالسين على ركبهم .. وكانت يدين طلال

رفعها من وسط القزاز وعلى المغسه يغسل يدها علطول ..

قالت حلا : ياربي والله امي الحين بتسوي لي سالفه ..

كلها ثواني ويدخلون عزيزة ومنيرة المطبخ ..

علطول وجهت منيرة انظارها لبنتها وقالت بعصبية : انا مو قايلة لك حطي عينك على اختك ؟

قال طلال وشوق في حضنه : لا خالتي لاتهاوشينها . شوق كانت معاي انا .. دخلتها المطبخ معاي ومانتبهت لها , وبعيدن هي شيطانه بسم الله عليها ..

سكتت حلا .. وطالعت باستغرااااااب في طلال .. ومنيرة سكتت برضو لانها ماتقدر تهاوش طلال طبعا .. وكانت حلا ماسكه صيحتها .. لان امها هاوشتها قدامهم ..

ومنال استغربت من موقف اخوها .. بس ابتسمت من حركته

ورجعت حلا وهي مندهشه من موقف طلال ..!!



الساعه 12 و30



ماطلع طلال من غرفته .. دخل وتروش وبدل ملابسه .. بعد فترة من الوقت .. طق باب غرفته وكانت منال



قال طلال وهو يرجع يدينه ورا ويعتدل على الكنبه الواسعه : ايوه منال وش بغيتي ..؟


منال بخبث : ماغيرت رايك ؟

طلال يستهبل وبدون مايطالعها : رايي في ايش ؟

منال وهي تجلس جمبه وبمكر : انت شفتها قبل شوي بنفسك .. حلوه ولا لا ؟

طلال طالعها بعمق دقيقتين وقال : لعلمك .. انا مادريت انها موجوده عندك .. يعني مو متعمّد ..

....بعناد : الاّ متعمد ..!

طلال طالعها بجدية وقال بصوت حازم : منال ! عيب هالكلام ..! انتي تعرفيني زين ماحب هالحركات ..

قالت منال بأسف : عادي يعني وش فيها هي مو خطيبتك ؟

........ : لأ .. مو خطيبتي .. ! وقلت لكم قفلوا الموضوع , واذا انا بغيت اتزوج .. بقول بنفسي

...... : طيب ليه دافعت عنها قبل شوي ؟

........ بعد فترة صمت : ماكان ودي تهاوشها امها وهي مو مقصره في مسؤلية اختها , وانتي عارفه شوق بسم الله عليها حركتها كثيره يبغى لها طولة بال ..

طالعت فيه منال بنظرة غير تصديق .. بس هو ماعطاها وجه .. قال بمزح : ماعندك سالفه اطلعي بس ابي انام

وهو منسدح على سريره .. تخيّل حلا تكون زوجته ..

حلا كبيرة بعقلها وتفكيرها .. كبيرة بمسؤليتها وحرصها .. كبيرة بأحاسيسها ومشاعرها ..

صغيرة في برائتها .. نعومتها .. مسالمة .. طيّبة وحنونه ..!


تنفع تكون زوجه ..

لكن مو له هو ..

ينفع يتزوج هو ..

لكن مو حلا ..!


حلا مو حاطه في بالها فكرة الزواج ..!



حلا مارح توافق عليه اصلا .. !


تعتبره أخوها ..


كذا كان يفكر طلال ..



وبعد آخر مره راحت حلا لبيت خالتها وشافتهم .. مرت اسابيع بدون مايتزاورون .. لانها كانت فترة امتحانات ..

وحلا شاده حيلها تبي تجيب معدّل كويس ...

غدير برضو كانت تدرس كثير عشان امتحاناتها .. وفيصل كان يتصل عليها كل فترة .. يسولف معاها شوي ويقفل ..

غدير : هلا باللي ناسينا

فيصل : وانا اقدر انساك ..؟ من جدك انتي !

غدير استحت : وينك كل هذا شغل ؟ من زمان ماتصلت

....... : والله شغل تعرفين مو بيدّي .. أنا لو بيدي كان تشوفيني كل ويك اند ببيتكم ..

....... : ايه صح صادق ! هي مره وحده وبعدها ماجيت ..

....... : ليش يعني بتحسبين لي عدد المرات اللي اجي فيها ..؟

..... : ايه بحسبهم .. وبكتبهم في دفتر بعد ..!

......(يمزح وهو ماسك ضحكته) : خلاص ولا يهمك , بس لاتفكرين فيني دايم عشان ماتفقديني كثير ..

..... بغرور ودلع : اصلاً دراستي شاغلتني عنك .. وماجيت في بالي الا يوم اتصلت ..

......... : غدير .؟

......... : نعم ؟

......... : احلفي انك ماتفكرين فيني ..!

....... : مارح احلف وش عندك ؟

....... : ماعندي شي

....... سكتت شوي بعدين قالت : طيب انا عندي امتحان لازم اروح اذاكر , متى بتجي ان شاء الله ؟

اعتدل في جلسته وقال وهو ينتظر الرد : ليه .. مشتاقة لي .؟

........ : لأ ! بس ابي اعرف

......... : مو من قلبك

........ : الا ( وتضحك)

........ : خلاص مارح اجي

....... : لااااااا تعااااااااال

ضحك عليها فيصل وقال : خلاص اذا خلصتي امتحانات اجي عشان ما أشغلك الحين

....... : الله اكبر ! عادي انت بس تعال وانا اجيب كتابي واذاكر عندك ( وتضحك)

....... : لا وش ذا الغثا اعوذ بالله , انا ابيك انتي مابغى كتبك , خلصي امتحاناتك ويصير خير

....... : طيب

....... : مع السلامه

بعدها بكم يوم


كانت الساعه 1و30 .. وصلت منال للبيت ودخلت الصاله

وكانوا عزيزة وطلال موجودين , ومن سوءحظ منال ان محاضرات طلال اليوم كانت كلها قبل الظهر ..

قامت عزيزة من مكانها وهي مستغربه ومرتاعه وقالت : منال بنتي وش اللي سوى فيك كذا ؟

منال : لا يمه مافيني شي

قام طلال من الكنبه وقال بصوته العالي : منال ..! وش مسوية انتي ؟ ( ويطالعها من فوق لتحت .. شعرها منفوش وخشمها احمر وعيونها دايخه )

منال بيأس : متهاوشه مع بنات في الجامعه

عزيزه : لاحول ولا قوة الا بالله ...

طلال: كذا الهواش عاد ؟ بنات ولا عيال انتوا ؟ اول مره اشوف بنات يتهاوشون بضرب ..!

منال بعصبية : وش اسوي يعني البنت قليلة ادب هي اللي بدت .. وحطت يدها على شعري وسحبته

عزيزة : وطبعا انتي ردّيتيها لها ؟

..... : طبعا يمه وشلون تبيني اسكت لها .. سوينا هواشه كبيره وورّيتها من هي منال

طلال باستغراب : الحمد لله والشكر ..! اعوذ بالله من شرك .. انا مالي دخل فيك لو تتذابحين مع البنات .. انا طالع انام وبقفل الباب علي بعد .. يمه امسكيها عني لا تجي تكفخني وانا نايم ..

رقى الدرج طلال واول ماجا في باله : (( ماتعقل هالمنال .. ليتها تصير مثل بنت خالتها مسالمه وبريئة ..!))

منال ضحكت على نفسها مع انها معصبه من البنت

عزيزة : مين هي يمه البنت تعرفينها ؟

...... : كانت صديقتي باولى ثانوي بعدين قطعتها

...... : ليه ؟

....... : قليلة ادب .. وعليها حركات ..

يمه لاتشغلين نفسك فيها ...انسيها هذي وحده ماتستاهل .. انا رايحه انام

عزيزة بأسى : الله يهديك ..ويهديها ..

راحت عزيزة تتفرج على التلفزيون لان ماجاها النوم .. بعد فترة اتصلت على منيرة تسلم عليها ..
واتفقوا انهم ان شاء الله بعد الامتحانات يطلعون استراحه .. لانهم طفشوا وودّهم يغيرون ..


منيرة : وانتي متى تخلصين امتحاناتك ..؟

حلا : بعد 3 اسابيع

..... : حرام عليك .. ودنا نطلع مع خالتك شوي لما تخلصون امتحانات وانتي 3 اسابيع ؟

....... : مو انا اللي احدد اوقات الامتحانات وبعدين مافي استعجال مو لازم نروح الحين , خلوها بالاجازه احسن ,,, ابوي نايم ؟

....... : لا .. صاحي

....... : بروح له

راحت حلا تسولف لابوها عن الجامعه والامتحانات .. وكانت كل ماراحت تجلس معاه ..تتأمل تعابير وجهه وكنها تتأكد هو بخير او لا ..

وكنها مازالت تشك ان اهلها مخبّين عليها شي

فترة وعدت الحمد لله ومحمد ابوها الحين احسن من اول ..

قال محمد : وش باقي لك من امتحانات ؟

حلا : باقي بعد بكره امتحان انجليزي

...... : طيب .. ذاكريه زين يابنتي هاه ؟

...... : ان شاء الله , تصبح على خير بابا

......: وانتي من اهل الخير


راحت حلا تنام .. وتوها غافيه الا وتحسه الصبح .. والمنبه يرن بأقوى ماعنده وحلا مكسّله تقوم من سريرها

ضربت المنبه بيدها وقامت .. راحت تصحي امها لقت ان باب غرفتها مفتوح ... طقت الباب ودخلت ..

شافت امها ماسكه الجوال ووجهها مهموم .. والحزن يغطيه ..

حلا : ماما .. ايش فيه ؟

منيرة : طلال في المستشفى ..!

...... بخوف : طلال ؟ ليه وش فيه ؟؟

........ : مدري والله .. خالتك مكلمتني تقول انها يوم جات تقوّمه للفجر ماقام بسهوله .. بعد فتره قال لها ودوني المستشفى بعدين طاح عليهم .. وهذا ابوك راح يودّيه .. وانا انتظر احد منهم يتصل والى الان محد ردّ علي ..

وتشوف الساعه 6 الا ربع

وقفت حلا متجمدة من الخوف والربكه ..

قالت منيرة : حلا .. روحي استعدي للجامعه لايفوتك الباص .. وخلي شوق اختك لاتصحينها للروضه .. امس عندها حراره وتعبانه من الزكام

قاالت حلا بيأس : طيب

راحت حلا ولبست وراحت للجامعه وطول الوقت تفكيرها مربوط بطلال .. خايفه ... وجوالها كل دقيقه تطالع فيه .. محد اتصل عليها ولا قال لها او طمنها على شي ..

كانت جالسه في مبنى 4 وسط البنات وهم يسولفون .. وبالها مو معاهم ..

قالت وحده من البنات (نوره) : حلا ! معانا على الخط انتي ؟

حلا : هاه ؟ ايه ..

....... تأشر على علبة الببسي الفاضيه اللي بيد حلا : شايفة وشصار بالببسي اللي في يدك ؟

طالعت حلا في يدها .. وكانت علبة الببسي معفّطه من كثر قلق حلا .. كانت تكسّر في العلبة ..

حلا : سوري بنات .. بس بنت خالتي في المستشفى وقلقانه عليها

نوره : ليه وش فيها ؟

...... : مادري ولسّه امي ماقالت لي , عن اذنكم انا بتصل في امي اسألها

طلعت من المبنى وجلست على احد الطاولات اللي برا .. وترددت تتصل في امها ولا لا ..

الحين بتقول ليه تسألين عنه وليه قلقانه عليه

طيب اتصل في منال ولا لأ ..؟

كانت منال جالسه في المحاضره وتفكيرها مع طلال وخايفه عليه ..

استأذنت من الدكتوره وطلعت من المحاضره عشان تتصل .. وطلعت الجوال.. لقت 8 مكالمات لم يرد عليها ..

4 من امها و3 من خالتها ووحده من حلا .. !

اتصلت على امها اول تتطمن على طلال .. بعدين اتصلت على حلا

حلا : هلا منال كيفك ؟

منال : الحمد لله

...... : منال انا عندي محاضره الحين , بس كنت بطمن على طلال ومستحية أسأل ماما عنه

...... : توني متصله على امي الحين , تقول انه الحمد لله بخير

...... بارتياح : الله يريح قلبك والله اني كنت خايفه , شوفي منال انا عند القاعه الحين اكلمك بعدين .. مشكورة

...... : العفو .. مع السلامه

...... دخلت القاعه وجلست على الكرسي اللي جمب نوره .. وسألتها نوره

نوره : وشخبارها منال بنت خالتك الحين ؟

حلا استغربت .. وش منال ؟

نوره : انتي مو تقولين ان بنت خالتك بالمستشفى ؟ مو هي نفسها منال اللي تسولفين لنا عنها ؟

حلا : أها ! إلا الا هي , توني مكلمه امي تقول الحمد لله الحين احسن , بس ماخذت التفاصيل منها عشان المحاضره قلت بكلمها بعد شوي

وابتسمت حلا بارتياح .. ومع ان كانت هذي المحاضره من المحاضرات الممتعه بالنسبة لها .. الا ان بالها انشغل وتبي تعرف طلال وش فيه ووش اللي خلاه يطيح عليهم ؟؟







كنها الدقايق ساعات .. اوف . متى تجي الساعه 1 ابي ارجع البيت ..

نوره : امشي نركب الباص طيب .. ترى نعسانه ودي احط راسي وانام هناك ..!

مشت حلا وراها بدون ماتنطق بكلمة وركبت الباص .. ووصلت البيت ..

وكان فاضي .. رمت شنطتها بالارض وشالت عبايتها .. وراحت عند التلفون واتصلت بأمها

حلا : ماما انا جيت البيت .. انتوا وينكم ؟

منيرة : بالمستشفى عند ولد خالتك .. وشوق معنا ..

حلا وهي تحاول تحبس صيحتها : طيب متى بتجون ؟

....... : يبغى لنا نص ساعه تقريبا ..

....... : اها , اوكيه ,(سكتت بعدين قالت) .. والحين هو احسن ؟

........ : ايه الحمد لله بس لسّه نايم .. بيطلّعونه العصر وبنروح لهم البيت

...... : اوكِ , مع السلامه

في اللحظه اللي سكرت فيها حلا السماعه .. نزلت دموعها ..

كانت مقهوره .. ليش صار الظهر ومحد قال لها شي عن طلال ..

صحيح محد يعرف انها تعزه حيل ..

لكن كانت تتوقع ان امها تتصل عليها وتطمنها .. لانها تعرف ان بنتها من النوع اللي يقلق بسرعه ..!

دايم يستبعدوني .. ما كأني وحده منهم !

يمكن انا حساسه زياده عن اللزوم .. بس المفروض يفهمون هالشي .. مهما كان يبقى ولد خالتي ويهمني اتطمن عليه ..!


راحت حلا تتصل على غدير تفضفض لها .. ومع مرور الوقت صار العصر ..

منيرة : حلا .. ليه ما لبستي الى الآن ؟

...... : ليه وين بنروح ؟

...... : عند خالتك يعني وين ؟

....... : ماما مابغى اروح معاكم .. فشله

....... : وش فشله عادي هذا ولد خالتك وواجب ان كلنا نروح

..... : خلاص سلموا عليه بس

....... : والله ان مازعل هو خالتك بتزعل , البسي بس بلا دلع مارح نطول عندهم ..

صعدت حلا الدرج وهي متضايقه .. من قال لهم اني مهمه عند طلال عشان يزعل لو مارحت قلت له الحمد لله على السلامه ..؟


لبست وركبوا السياره .. وكلها دقايق ويوصلون لبيت خالتهم .. كان طلال في المجلس .. دخل محمد وسلم عليه بعدين طلع وخلى منيرة والبنات ..

تقدمت منيرة تسلم على طلال اللي وقف وسلم عليها ..

..... : ها طلال ان شاء الله الحين احسن ؟

....... : ايه خالتي احسن .. ترا مافيني شي بس اتدلع عليهم ..

ضحكت منيرة .. وقالت حلا بصوت مرتبك وواطي شوي : الحمد .. لله .. على سلامتك ..

ابتسم وهو يطل من ورا خالته : الله يسلمك ,,

قال لما شافها ساكته : لازم تشوفين حل لمنال .. طحت في المستشفى بسببها .. تهاوشت مع البنات في الجامعه وجات البيت كملت فيني ....

التفتت حلا على منال بنظرات استغراب خلت الكل في الغرفه يضحك ..

منال : انتي من جدك صدقتي ؟ والله من الدفاره مدخّل خشمه بالكتب وماياكل زين وعايش على النسكافيه .. اكيد بيصير شي في ضغطه ..

حلا بعفوية : ياشين الدفارة بس .. !

ضحك طلال من قلبه عليها وقالت عزيزة : تعبت منه .. ماياكل زين كل ما سألته قال مو مشتهي .. كن الحياة كلها دراسة ..

منال : أي والله صحتك اهم ..

قال طلال : ما عرفت لكم .. مو انتوا اللي تقولون لي تخرّج بسرعة ؟

حلا فهمت قصده , وخافت ينفتح طاري الزواج قدامها .. لفّـت على شوق وصارت تصلح شعرها ..

منيرة : لا خلاص مانبي منك الا انك تكون بصحة وعافيه

عزيزة : عاد باقي وراه اختبارين ,, بس انهم الاسبوع الجاي , يعني الحمد لله يمديه يرتاح شوي ..

قال طلال بمزح : لا وين ارتاح ؟ الحين بروح افتح الكتاب ..

عزيزة : اقعد بس والله ماتذاكر شي اليوم .. ! اجلس طالع تلفزيون معي ولا نلعب بلاي ستيشن ..

عن آخر كلمه .. حلا ماتت من الضحك .. ومنيرة بعد

منال : عادي خالتي منيرة ترا امي هاذي اصغر مني ..

منيرة تضحك : ياحليلك عزيزة تلعبين بلاي ستيشن ؟

..... : ايه العب وش زينه والله ,, تعالي اوريك بس

..... : لا ماحبّّ هذي الاشياء .. خليها لك ..

...... : لا تعالي والله بتعجبك

شوق : ماما .. خالتي عزيزة دايم تفوز على طلال في السوني

طلال : ايه انا اخليها تفوز , ارحمها ماودي يضيق صدرها ..

عزيزة : اسكت بس تكفى ,,

شوق تسحب طلال من يدينه : طلا تعاللالعب مع خالتي عشان ماما تشوف

طلال : لا حبيبتي مو الحين , روحي العبي معاهم الحين وبعد شوي انا اجي , تعرفين تشغلينه ؟

شوق بحماس : ايه ( وراحت تركض وهي تسحب خالتها وامها وراها )

قالت حلا: منال انتي الحين من جدك تهاوشتي مع بنات في الجامعه ؟

منال بفخر : طبعا .. مع بنات عرابجه

طلال : ليتك شايفه شكلها اول ماجات ..

منال : الّا ليتك معي بنفس الجامعه عشان وقتها تفزعين لي ..

حلا : لا والله ؟

..... : أي والله

..... : والله لو اني معك كان مافزعت لك ..!

..... : افا

..... : خير تبيني اتهاوش مع عرابجه , ؟ لا اخاف

طلال : هذي مسالمه مو مثلك تدوّر على الشر ..

حلا ضحكت : لا والله من جدها تبيني افزع لها .. عشان يسوّوني كفته ..!

منال : تكفين يارقيقه ..

طلال : تهاوشي انتي مع اللي تبين بس لاتسحبين بنات الناس معاك , والله هذي (يأشر على حلا) لو يدفونها من

كتفها كان تجي لأمها تصيح

التفتت حلا على طلال وقالت : وش قالوا لك شوق